Matayo 4 - KITABU KITAKATIFU

¹ Hene yaho Roho ya hila Yesu mwigendanyama. Setani a mu geridze.

² Lwa ya mala kuhonga lilia madiku makumi gane mbasu no budiku, ya li nenzala.

³ Ma, mugeridzi yadza na a mbolera, Ive nu u va nu u ve Mwana wa Nyasaye, u lage amagina yaga ga gwe ubu kima.

⁴ Navutswa ya tivula na a vola, Ga ng'odeywi, Avandu si va nyala kuva mwoyo nobukima bweng'ine, navutswa namakuva gosi aga twula mmunwa gwa Nyasaye.

⁵ Ma Setani ya mu hila mu lidala litakatifu, na a mu singiridza ku kisegese kyelitempeli,

⁶ na a mbolera, Ive nu u va nu u ve Mwana wa Nyasaye, u tuume hasi: kigira ga ng'odeywi, A la ha tsingelosi veve munwa ku ive: Na kandi Va la ku ginga mmakono gavo, Gase u likigitala kirenge kikyo kwigina.

⁷ Yesu ya mbolera, Kandi ga ng'odeywi, U ta geridza Mwami Nyasaye wowo mba.

⁸ Kandi, Setani ya mu hila mkigulu kitambi munonono, na a mmannya bwami bwosi bwelirova, nobukumi bwabwo;

⁹ na a mbolera, Vindu yivi vyosi nda ku ha, ive nu u va nu u gwa hasi, u nsigamire.

¹⁰ Ma Yesu ya mbolera Twula hano, Setani: kigira ga ng'odeywi, U la sigamira Mwami Nyasaye wowo, kandi u la tumekira uyu weng'ine.

¹¹ Ma Setani ya mu leka; kandi henza, tsingelosi vadza ni va mu tumekira.

¹² Lwa ya hulira Yohana u mali kuzamwa, ya tsia Galilaya:

¹³ na a twula Nazareti, yadza na a menya Kapernaume, lya li ku luginga lwenyanza, mu tsinzako tsya Zebuloni na Nafitali:

¹⁴ ga duke kukolwa agomprofeti Isaya ya vola na a vola,

¹⁵ Kivala kya Zebuloni nekivala kya Nafitali, Ku inzira yokuduka ku inyanza, engereka wa Yordani, Galilaya ye Tsihiri,

¹⁶ Avandu va li va menya mkisundi Va lola ubulavu bunene, Kandi kuvo ava menya mu kivala kyekiriri kyelikudza, Ubulavu bwa ng'ereng'ana kuvo.

¹⁷ Kutwula inyinga yeyo Yesu va tanga kwilwadza na a vola, Mweganire; kigira ubwami bwomigulu bu veye himbi.

¹⁸ Kandi ya vaya ku luginga lwenyanza ye Galilaya, na a lola vaviri amwavo namwavo, Simoni u langwa Petro na Andreya amwavo wewe, va li ni vinika miluvo munyanza; kigira va li avaluvi.

¹⁹ Ya va volera, Hambi mu nonde, na inze nda mu kola avaluvi vavandu.

²⁰ Nonoho va leka miluvo ni va mu londa.

²¹ Lwa yesunda hambiri kandi ya lola avandi vaviri amwavo namwavo, Yakobo wa Zebedayo, na Yohana amwavo wewe, va veye mu liato halala na Zebedayo ise wavo, ni va nava miluvo gyavo; ya va langa.

²² Nonoho va leka liato na ise wavo, ni va mu londa.

²³ Yesu ya vodonkana mu Galilaya mwosi, ni yegidza mu masomero gavo, ni yilwadza ivangeli yobwami, na a honnya tsinkudzo tsyosi nobudekeranu bwosi bwavandu.

²⁴ Amakuva gege ga landa mu Siria yosi: ni va mletera avalwaye vosi, ava li netsinkudzo lugano lugano, nobusaliri, navo ava li na mademone, na va li nendulume, navaleema; naye ya va honnya.

²⁵ Kiduma kinene kya mu londa kya twula Galilaya ne Dekapoli ne Yerusalemi ne Buyuda nengereka wa Yordani.