Matayo 24 - KITABU KITAKATIFU

¹ Yesu ya twula mu litempeli, ni yenya kutsia; na vegidzwi veve vadza kuye kummannya tsinyumba tsyelitempeli.

² Navutswa ya tivula na a va volera, Mu lola vindu yivi vyosi? Iigali mmu volera Si li la tigala hano ligina lilala ku lindi li ta gwihidzwa hasi.

³ Lwa yikala mu kigulu kya Mizeituni, avegidzwi vadza makiriri, ni va vola U ku volere vindu yivi vi la va inyinga ki? Kandi kilolekidzu kyeliduka lilyo ki la va ndi, kandi kyelihera lyenyinga yiyi?

⁴ Yesu ya tivula na a va volera, Mu gelihe avandu kali mulala va ta mu gotidza.

⁵ Kigira vanyingi va ladza ni lieta lyange, ni va vola, Inze niye Kristo; va la gotidza vanyingi.

⁶ Kandi mu la hulira mahe namakuva gamahe mu henze, mu ta henda myoyo mba kigira vindu yivi vi ladza; navutswa kiheri ki kikiri.

⁷ Kigira ihiri i la vukira ihiri, nobwami bu la vukira ubwami; kandi ha la va netsinzala nokudegera kwelirova hale ne hale.

⁸ Navutswa vindu yivi vyosi vi veye litanga lyobusaliri.

⁹ Inyinga yeneyo va la mu zama mu kivi, nokumwita: kandi tsihiri tsyosi tsi la mu dun ira kigira lieta lyange.

¹⁰ Hene yaho vanyingi va likigitala, kandi va la zamana avene, nokudunyirana.

¹¹ Navaprofeti vobubehi vanyingi va la twula na va gotidze vanyingi

¹² Kandi kigira kirage ki la daswa, ubuyanzi bwavanyingi bu loneka

¹³ Navutswa uyu wikudzihidza kuduka ku kiheri, a la honnywa.

¹⁴ Kandi amakuva malahi yaga gobwami ga lilwadzwa mu lirova lyosi ga ve kilolekidzu ku tsihiri tsyosi; ma kiheri ki la duka.

¹⁵ Lwa mu lola livihiridzwa lyokwononya ya Danyeli mprofeti ya vola, li singira mu hatakatifu (u somanga a manye),

¹⁶ hene yaho ava veye mu Buyuda virukire mu vigulu:

¹⁷ uyu u veye ku inyumba igulu a tika mba kuvugula vindu vi veye mu inyumba yeye:

¹⁸ na uyu u veye mu mulimi a tirana kuvugula ingubo yeye.

¹⁹ Navutswa ubuda mano bu veye kuvo ava veye inda, nokuvo ava nyunnya, mmadiku yago

²⁰ Navutswa mu saale liruka lyenyu li ta va inyinga yobukindu, kandi ku lidiku lyelisabato:

²¹ kigira yeneyo kivi kinene ki la duka, kusira kyosi kutwula ku litanga lyelirova kuduka kalunu, kandi si ki li va ho.

²² Madiku yago ni ga vula kwimbihidzwa mibiri gyosi si gyi li nyala kuhona: navutswa madiku yago ga limbihidzwa kigira avatovoleywi.

²³ Inyinga yiyo mundu na a mu volera, Nguyu hano Kristo, kinga Ngoyo yaho, mu ta bugirira mba.

²⁴ Kigira va la twula vakristo vobubehi navaprofeti vobubehi, kandi va ia leta vilolekidzu vinene, nevyokugennya vinene; kuduka kugotidza kali ava tovoleywi, ni va nyala kuvagada.

²⁵ Henza, inze ntangi kumuvolera.

²⁶ Kunangwa ni va li mu volera Henza, a veye mwigendanyama; mu ta tsia mba: Henza, a veye mu inyumba mu bwasi; mu ta bugirira mba.

²⁷ Kigira kuli luheni lu twula ivugwe na lu ng'ereng'ana madioli; iduka lyo Mwana wa Adamu li la va ndiyo.

²⁸ Hekikudzu ki veye tsididzu tsi la vuganira ho.

²⁹ Navutswa inyima yekivi kyanadiku yago bwangu liuva li la nwaminywa, nomweli si gu liaaka etsing'ereng'ani tsi la guluka mwigulu, netsingulu tsyomwigulu tsi la degeridzwa:

³⁰ kunangwaheneyaho ki la lolekana migulu kilolekidzu kyo Mwana wa Adamu: ma tsihiri tsyosi tsyelirova tsi la lira, kandi va la lola Mwana wa Adamu yadza ku malesi gegulu netsingulu nobukumi bunene.

³¹ A la tuma tsingelosi veve nomwoyo munene gwekisiliva, navo va la vu gannya avatovoleywi veve va twule ku tsimbuudza tsine, kandi va twule ku kiheri kilala kandi kuduka ku kiheri kindi kyegulu.

³² Kalunu mwegi ku mkuyu, mu manye lugano lwagwo: lwa lusya lu gwiye ludoto ni lu sibuka amatu, mu manya inyinga yoluya i veye himbi.

³³ Ndiyo kandi mwinye inyinga mu lola vindu yivi vyosi, mu manye a veye himbi, kali ha kiliango.

³⁴ Ligali mmu volera, Likula yili si li li vita, vindu yivi vyosi vi kikiri kukolwa.

³⁵ Ligulu nelirova li la vita, navutswa amakuva gange si ga li vita mba.

³⁶ Navutswa lidiku yilyo nenyinga yiyo si ha li nomundu u manya, kali tsingelosi, kandi Mwana, navutswa Dada yeng'ine.

³⁷ Kuli mu madiku ga Nuhu, kandi liduka lyo Mwana wa Adamu li la va ndiyo.

³⁸ Kuli mu madiku yago imbiri wa madzi manene va li ni va lia, ni va nwa, ni va sererana, ni va kwebwa, kali kuduka ku lidiku lya Nuhu yingira mbwato,

³⁹ si va manya, amadzi ga luha ga duka ni ga hila vosi; kandi liduka lyo Mwana wa Adamu li la va ndiyo.

⁴⁰ Inyinga yeyo avandu vaviri va la va mummulimi; mulala a la hilwa na mulala a la tigala:

⁴¹ avakali vaviri va la siya ku lugina; mulala a la hilwa na mulala a la tigala.

⁴² Kigira yaga, Lindi: kigira si mu manya lidiku lyo Mwami wenyu yadza.

⁴³ Navutswa mu manye yaga, mwene inyumba a va wa manya inyinga mwivi yadza, nkano ya linda a la vula kuleka inyumba yeye i hudulwe.

⁴⁴ Kigira yaga mwinye kandi mwetegeke; kigira isaa ya mu ta gana gana Mwana wa Adamu yadza.

⁴⁵ Mutugwa mulahi nomugeeri ni bwaha, womwami wewe a vika a ve munene wenyumba yeye, kuvaha vyokulia vyavo vyetsinyinga tsi duka?

⁴⁶ A veye nobugasu womwami wewe a li nyola na a kola ndiyo lwa a ladza.

⁴⁷ Ligali, mmu volera, a la mu vika ku vyosi vya a veye navyo.

⁴⁸ Navutswa mutugwa uyu mudamano na a va na a la vola mu mwoyo gwigwe, Mwami wange a ki lindagira;

⁴⁹ na a tanga kukuya avakye veve, na a lia na a nwa halala navahambiki;

⁵⁰ mwami womutugwa uyo a ladza ku lidiku lya a ta ganagana, ne isaa ya a ta manya,

⁵¹ a la mu temlnya, na a mu ha kidieli kikye halala navagadi: ha la va nokulira nokudyedyeidza amino.