Matayo 23 - KITABU KITAKATIFU

¹ Hene yaho Yesu ya volera viduma na vegidzwi veve,

² na a vola, Avang'odi na Vafarisayo vikala ku kisako kya Musa:

³ kunangwa vyosi vya va mu volera mu kole, mu vi gumire: navutswa mu ta kola kuli va kola; kigira va vola, navutswa si va kola.

⁴ Yee, va boha misigo miliduhu gyi mina, ni va vika ku mavega gavandu; navutswa avene va sula kugyisunda kali nekidete.

⁵ Navutswa miyinzi gyavo gyosi gya va kola, va kolanga avandu va va lole: va kola tsifilateri tsyavo tsimamba lalu, ni va dasa tsing'oli ku nyasi kwetsingubo tsyavo,

⁶ ni va yanza kwikala hambiri mu lilia, kandi visako vinene mu masomero,

⁷ nokuchelidzwa mu vitu, nokulangwa Rabi

⁸ Navutswa mwinye mu ta langwa Rabi mba: kigira mulala a veye mwegidzi wenyu, na mwinye vosi mu veye avamwavo navamwavo.

⁹ Mu ta langa mundu dada wenyu mu lirova mba: kigira mulala a veye Dada wenyu, uyu u veye migulu.

¹⁰ Kandi mu ta langwa avami: kigira mulala a veye Mwami wenyu, ni Kristo.

¹¹ Navutswa uyu a veye munene ku mwinye a la va mtumekiri wenyu.

¹² Uyu wenenehidza a la gehidzwa; naye wegehidza a la nenehidzwa.

¹³ Navutswa O Bayaye bu veye ku mwinye, avang'odi na Vafarisayo, avagadi kigira mwigalira avandu mu bwami bwomigulu: kigira mwinye si mwingira mba, kandi si mu va leka avingiranga, vingire.

¹⁴ O Bayaye bu veye ku mwinye, avang'odi na Vafarisayo, avagadi kigira mu mira tsinyumba tsya vakunzakali, nokwelolekidza mu saala masaala matambi: kigira yaga likalagirwa lyenyu li la va budinyu kuvita vya avandi.

¹⁵ O Bayaye bu veye ku mwinye, avang'odi na Vafarisayo avagadi kigira mu vodonkana inyanza nelirova mu duke kukola mundu mulala a hambane na mwinye; na lwa a mala kugwa ndiyo, mwinye mu mu kola mwana wa gehena kuvita mwinye hali kaviri.

¹⁶ O Bayaye bu veye ku mwinye, avimiri avaboku, ava vola, Uyu wisuha ku litempeli, si ki li kindu; navutswa ku vosi wisuha ku ithahabu yelitempeli, webohi.

¹⁷ Avasiru na vaboku ki li ha kinene, ithahabu, naho litempeli li kola ithahabu i ve intakatifu?

¹⁸ Kandi kuvosi wisuha ubwali, si ki li kindu; navutswa uyu wisuha isadaka i veye ku, webohi.

¹⁹ Mwinye avaboku: ki li ha kinene, isadaka, nabo ubwali bu kola isadaka i ve intakatifu?

²⁰ Kigira yaga, uyu wisuha ku ubwali, yisuha ku ubwali nevindu vyosi vi veye ku.

²¹ Na uyu wisuha ku litempeli, yisuha ku litempeli, kandi ku uyu u menya mu.

²² Kandi uyu wisuha ku ligulu, yisuha ku kisako kya Nyasaye, kandi uyu wikala ku.

²³ O Bayaye bu veye ku mwinye, avang'odi na Vafarisayo, avagadi kigira mu tunga izaka ya inaana, nebizari, nekumini, navutswa mu leki amakuva manene gelilaga, bulungi, netsimbabasi, nelisuuvira: navutswa yivi nu bulahi kuvikola, vindu vindi vyembiri muvule kuvileka.

²⁴ Avimiri vaboku, mu lomba kiseso kwigalira ingi, navutswa mu mira ing'amia.

²⁵ O Bayaye bu veye ku mwinye, avang'odi na Vafarisayo, avagadi kigira mwogidza kikombe nesahani igulu, navutswa mugati vi zuye ubunyagi nubunuuli.

²⁶ Ive Mufarisayo mboku u tange kwogidza mugati mwekikombe nomwesahani vi duke kandi kuva vilahi igulu.

²⁷ O Bayaye bu veye ku mwinye, avang'odi na Vafarisayo, avagadi kigira mu veye kuli vilindwa vi lavidzeywi, igulu vi fwana vi veye vilahi, navutswa mugati vizuye vigumba vyavakudzu, nobugundu bwosi.

²⁸ Kandi ndiyo mwinye habulavu mu loleka ku vandu kuli avalungi, navutswa mugati mwizuye ubugadi nekirage.

²⁹ Ubudamano bu veye ku mwinye, avang'odi na Vafarisayo, avagadi kigira mwombaka vilindwa vyavaprofeti, na mu gasidza tsindidza tsvavalungi,

³⁰ kandi mu vola, Kwinye ku va kwa li ho mu madiku ga vaguga vetu, nkano si kwa nyala kusanga navo mu masahi gavaprofeti.

³¹ Ku yaga mweyama mu veye avana va yavo aviita avaprofeti.

³² Mwizulitse kigero kyavaguga venyu.

³³ Tsinzoka mwinye, avana vevihirigoma, mu la hona naki mu likalagirwa lyegehena?

³⁴ Kigira yaga, henza, ntuma ku mwinye avaprofeti, navageeri, navang'odi: avalala kuvo mu liita nokuvabamba; navandi kuvo mu la va kuya mu masomero genyu nokuvadambidza mu madala na madala:

³⁵ amasahi malungi gosi aga tadza mu lirova ga duke kuva ku mwinye, kutwula ku masahi ga Habili mulungi kali kuduka ku masahi ga Zekaria mwana wa Barakia, wa mwiitira hagati ha hatakatifu nobwali.

³⁶ Ligali, mmu volera, Vindu yivi vyosi vi la gwira likula yili.

³⁷ O Yerusalemi, Yerusalemi, lidala liita avaprofeti, nokulasa magina avatumwa kulyo Kuduka tsinyinga hali kanga ni nyenya kuvungidza avana vovo kuli inyavuli i vungidza viminyo vyayo mu mwetsimbaha tsyayo, navutswa mwambakana

³⁸ Henza, inyumba yenyu i tigaye ku mwinye yoneki.

³⁹ Kigira mmu volera, Si mu li ndola kandi, mu luhe mu duke kuvola, A veye nobugasu yadza ku lieta lyo Mwami.