Matayo 15 - KITABU KITAKATIFU

¹ Hene yaho vadza ku Yesu Avafarisayo navang'odi va twula Yerusalemi, ni va vola,

² Kigira ki avegidzwi vovo vononnya miima gyavakulundu? Kigira si visaavanga makono gavo lwa venya kulia.

³ Ya tivula na a va volera, Na mwinye, kigira ki mwononnya malago ga Nyasaye nemiima gyenyu?

⁴ Kigira Nyasaye ya laga na a vola, Widzominye dada wowo na mama wowo: kandi u nyega ise kinga mama wewe, likudza a kudze.

⁵ Navutswa mwinye mu vola, Ku vosi uyu wenya kuvolera ise kinga mama wewe, Vyosi vya ga dukira inze kuha mwinye, mmali kuha Nyasaye;

⁶ a tidzominya ise kandi mba. Mwononnyi likuva lya Nyasaye nemiima gyenyu.

⁷ Mwinye avagadi Isaya ya profeta bulahi ku mwinye, na a vola,

⁸ Avandu yava va nzidzominya neminwa gyavo; Navutswa mwoyo gwavo gu veye ihale ninze.

⁹ Navutswa va nsigamira vutswa, Na vegidza migidzo ga vandu.

¹⁰ Naye ya langa kiduma na a va volera, Mu hulire na mmanye:

¹¹ Si ki li kingira mmunwa ki nyala kukola mundu mudamano; navutswa vi twula mmunwa, yivi vi kola mundu mudamano.

¹² Hene yaho avegi dzwi vadza kuye ni va mu volera, U manya Avafarisayo vikigitalidzwa lwa va hulira amakuva yaga?

¹³ Navutswa ya tivula na a vola, Misala gyosi gya Dada wange womigulu ya vula kusimika; gyi lifwa.

¹⁴ Mu va leke va ve: va veye avimiri vaboku. Mboku ni yimirira mboku, vombi va la gwa mbogo.

¹⁵ Na Petro ya tivula na a mu volera, U ku vuulire lugano yilu.

¹⁶ Ya vola, Mwinye kandi kali kalunu mu kikiri kuva nelimanya?

¹⁷ Si mu manya vindu vyosi vingira mmunwa vi tsitsa munda na vi twulidzangwa?

¹⁸ Navutswa vindu vi twula mmu nwa vi twula mmwoyo; na yivi vi kola mundu mudamano.

¹⁹ Kigira mmwoyo vi twula tsiganagani tsi ndamano, neliluminda, nobuheyi, nokutsia mbakana, nobwivi, nobugini, nobunyegi:

²⁰ yivi nivyo vi kola mundu mudamano; navutswa kula gira namamisu si ga kola mundu mudamano mba.

²¹ Yesu ya twula na a tsia mu kivala kya Turo na Sidone.

²² Henza, mkali Mukanani wekivala yikyo yanira na a vola, U mbere tsimba basi, Mwami, mwana wa Daudi; lidemone li kupidza kivi munonono mwana mkana wange.

²³ Navu tswa si ya mu tivulira likuva. Ma avegidzwi veve vadza ni va mu saala ni va vola, U mu kunge; kigira a kola liyoga inyima wetu.

²⁴ Navutswa ya tivula na a vola, Inze si nda tumwa navutswa ku magondi ga gota age nyumba ya Israeli.

²⁵ Navutswa yadza na a mu sigamira, na a vola, Mwami, u nkonye.

²⁶ Naye ya tivula na a vola, Si bu li bulahi kuvugula ubukima bwavana nokubusikisira tsimbwa.

²⁷ Navutswa ya vola, Yee, Mwami: navutswa kali tsimbwa tsi litsa amadonye ga twula ku meza yavenetsyo.

²⁸ Ma Yesu ya tivula na a mu volera, Mkali, lisuuvira lilyo li veye linene: u nyole kuli kya wenya. Na mkana wewe ya honnywa inyinga zana.

²⁹ Yesu ya twula ho ni yadza himbi inyanza ya Galilaya; ni yanegira mu kigulu ni yikala yo.

³⁰ Va tsia kuye viduma vinyingi, ni va ginga avahenyeri, navaboku, netsidi mbidi, navaleemi, navandi vanyingi halala, ni va va vika ha virenge vivye, na a va honnya:

³¹ viduma vya luha vi genya lwa va lola tsidimbidi tsi vola, navaleemi va gwiye avagima, navahenyeri va genda, navaboku va lola: ni vidzominya Nyasaye wa Israeli.

³² Hene yaho Yesu ya langa avegidzwi veve vadze kuye, na a vola Mbererera kiduma, kigira ki menya ninze kalunu madiku gavaka, va ta li nevyokulia: si nyenya kuvahila ni va ta lia, gase ihuyuki i la va malira ku inzira.

³³ Navegidzwi va mu volera, Ha mwigendanyama hano, ku nyola ha li ha milango minyingi kuduka kwigutidza avandu vanyingi yava?

³⁴ Yesu ya va volera, Mu veye nemilango gyanga? Navo va vola, Gyitanu na gyiviri netsisudzi tsinyerere tsinkekeke.

³⁵ Ya ha kiduma munwa kwikala hasi;

³⁶ na a vugula milango gyitanu na gviviri netsisudzi, na a santidza na a meganyira avegidzwi, navegidzwi va ha viduma.

³⁷ Ni va lagira vosi ni vigutn: ni va vungidza amadonye aga tigala, vihinda vitnnu na viviri vi zuye.

³⁸ Navo ava lagira va li tsielfu tsine vasatsa, na kandi avakali navana.

³⁹ Lwa ya mala kuha munwa viduma vi tsie, yingira mbwato ni yadza mu tsinzako tsya Magadani.