Matayo 14 - KITABU KITAKATIFU

¹ Inyinga yeyo Herodi mtetrarka ya hulira amakuva ga Yesu,

² na a volera avatumwa veve, Uyu niye Yohana Mbatidzi: u simuguki kutwula mbakudzi; yiki ni kigira tsingulu yitsi tsi veye muye.

³ Kigira Herodi ya gumira Yohana, na a mboha, na a mbika munyumba yavahambe, ya mboha kigira Herodiya mka Filipu amwavo wewe.

⁴ Kigira Yohana ya mbolera, Ni mugyiru ive kuva naye.

⁵ Lwa yenya kumwiita, ya tia kiduma, kigira va li va vola a veye mprofeti.

⁶ Navutswa lwa lya duka lidiku lya Herodi yivulwa, mkana wa Herodiya ya vinira mugati, na a yanzidza Herodi.

⁷ Yisuha na a mlaga kumuha ku vyosi kya a teva.

⁸ Mama wewe ya mgerehidza, na a voia, Mbeera mutwe gwa Yohana Mbatidzi ku ludigi.

⁹ Mwami ya verera; navutswa kigira ku lisuha lilye, kandi kigira avikaye ku vyokulia halala naye ya vola, a hebwe;

¹⁰ ya tuma mundu na a kalaga mutwe gwa Yohana munyumba yavahambe.

¹¹ Mutwe gwigwe gwa leterwa ku ludigi, mkana ya hebwa na a hilira mama wewe.

¹² Avegidzwi veve vadza ni va vugula mubiri gwigwe, ni va gu ta; ni va tsia ni va volera Yesu.

¹³ Yesu lwa ya hulira ya twula ho na a nina mbwato na a tsia ha vandu va ta li. Viduma lwa vya hulira vya mu londa ne virenge kutwula mu madala.

¹⁴ Ya twula mbwato na a lola kiduma kinene, na a va vera tsimbabasi, na a va honnyira avalwaye vavo.

¹⁵ Lwa gwa duka mgolova, avegidzwi veve vadza kuye vavola, Hano si ha li navandu, kandi inyinga i viti; u volere viduma vi tsie mu tudala vyegulire vyokulia.

¹⁶ Navutsva Yesu ya va volera, Si va li namakuva gokutsia; mwinye mba he vyokulia.

¹⁷ Navo va mu volera Ku veye nemilango gyitano gyeng ine hano, netsisudzi tsiviri.

¹⁸ Na a vola, Ndetere yivyo hano.

¹⁹ Ya haana munwa viduma vikale hasi mu kiguti; na a vugula milango gyitano netsisudzi tsiviri na a henza migulu, ya vi gasidza, na a megannya na a ha avegidzwi, navegidzwi va ha viduma.

²⁰ Va lagira vosi ni viguta: ni va vungidza ama donye aga tigala, vihinda likumi na viviri vi zuye.

²¹ Navo va lagira va li tsielfu tsitano vasatsa vong'ine, bugira livalidza avakali navana.

²² Nonoho ya viiriridza avegidzwi va nine mbwato, nokwimira imbiri wewe kutsia engereka, a luha a duke kuvolera viduma vi tsie.

²³ Lwa ya mala kuvolera viduma vi tsie, yanegira mu kigulu yeng'ine kusaala: lwa bwa duka mgolova ya li ho yeng'ine.

²⁴ Bwato bwa li hagati henyanza, bwa kupidzwa kivi ni viguvuli; kigira imbuudza ya yingoyidza bwato.

²⁵ M u bulindi bwa kane bwobudiku Yesu yadza kuvo, na a genda ku inyanza.

²⁶ Avegidzwi lwa va mu lola na a genda ku inyanza, va henda myoyo, ni va vola, Ni kigingi; ni va kupa tsikwili kigira ubutii.

²⁷ Nonoho Yesu ya va volera, na a vola, Mweleminye mu myoyo; ninze; mu ta tia mba.

²⁸ Petro ya mu tivulira na a vola, Mwami, na a va na a veye ive, u mbe munwa, ntsitse ku ive ku madzi.

²⁹ Na a vola, Hamba. Petro ya twula mbwato, na a genda ku madzi kutsia ku Yesu.

³⁰ Navutswa lwa ya lola imbuudza ya tia; na a tanga kwiina ni yanira na a vola, Mwami, u mbonnye.

³¹ Nonoho Yesu ya nyira mkono, na a mgumira, na a mu volera, Ive welisuuvira likekeke, kigira ki u hayahaya?

³² Lwa va nina mbwato, imbuudza ya kiri ng'ana.

³³ Navo ava li mbwato, va mu sigamira, ni va vola, Ligali ive u veye Mwana wa Nyasaye.

³⁴ Lwa va mala kwambuka va duka ku kivala, mu Genesareta.

³⁵ Avandu va ha zana yaho, lwa va mmanya, va tuma avandu mtsimbega tsyosi tsya himbi, ni va mu letera avalwaye vosi;

³⁶ ni va mu saala va dire vutswa lukigiti lwengubo yeye: navo vosi va dira ku va honnywa.