Matayo 13 - KITABU KITAKATIFU

¹ Ku lidiku yilyo, Yesu ya twula mu inyumba ni yikala ku luginga lwenyanza.

² Vya vungidzwa kuye viduma vinene ndi, ya manya na a nina mu liato ni yikala; na kiduma kyosi kya singira ku luginga.

³ Na a va volera amakuva manyingi mu tsing'ano, na a vola, Henza, mumidzi ya twula na a tsia kumidza.

⁴ Lwa ya midza, bulala bwa gwa ku inzira ha luvega, na manyonyi gadza ni ga bu vodza.

⁵ Na bundi bwa gwa ku marova goku magina, ha bwa nyola marova makekeke: nonoho bwa mera kigira si bwa li namarova manene:

⁶ liuva lwa lya twula bwa niala; kigira si bwa li nemiri, ni bwuma.

⁷ Na bundi bwa gwa mma fwa; na mafwa ga viruka ni ga bu kunika.

⁸ Na bundi bwa gwa mmarova malahi, ni bwama, bulala bwama mia na bundi makumi gatanu neliiala, na bundi makumi gavaka.

⁹ U veye namatu gokuhulira, a hulire.

¹⁰ Avegidzwi vadza ni va mbolera, Kigira ki u va kupa tsing'ano?

¹¹ Naye ya tivula na a va volera, Mwinye mu hebeywi kumanya ama kuva ga viswa gobwami bwomigulu, navutswa yava si va hebeywi ndiyo.

¹² Kigira ku vosi u veye navyo a la hebwa, a la medwa: navutswa ku vosi u ta li navyo, a la nyagwa kali vya a veye navyo.

¹³ Yiki ni ki gira mba kupa tsing'ano; kigira lilola va vula kulola, lihulira va vula kuhulira, kandi si va manya.

¹⁴ Kandi kuvo ga kolwa liprofeta lya Isaya li vola Lihulira mu la hulira, si mu limanya ligali; Kandi lihenza mu la henza, si muli lola ligali:

¹⁵ Kigira mwoyo gwavandu yava gu gwiye mudamano, Kandi amatu gavo si ga hulira bulahi Va hannyi tsimoni tsyavo; Gase va la lola netsimoni tsyavo, Nokuhulira namatu gavo Nokumanya mmwoyo gwavo, Nokweganira, Na inze mba honnye.

¹⁶ Navutswa tsimoni tsyenyu tsi veye nobugasu, kigira tsi lola; namatu genyu, kigira ga hulira.

¹⁷ Kigira ligali mmu volera, avaprofeti vanyingi navandu valungi venya kulola vindu vya mu lolanga, ni va vula kuv lola nokuhulira vindu vya mu hulira, ni va vula kuvihulira.

¹⁸ Mu hulire lugano lwomumidzi.

¹⁹ Mulala lwa a hulira likuvalyobwami, na a vula kulimanya, mudamano yadza na a mu nyaga yili lya a ve kumidzwa mmwoyo gwigwe. Uyu niye wa midzwa ku inzira ha luvega.

²⁰ Na uyu wa midzwa mmarova goku magina, uyu niye u hulira likuva, kandi nonoho a li vugula nobuyanzi;

²¹ navutswa si a li nemiri muye, ma a dinya hakekeke; navutswa kivi kinga lidambidzwa lwa li duka kigira likuva, nonoho yikigitala.

²² Na uyu wa midzwa mmafwa, uyu niye u hulira likuva, navutswa madidikano gekivala, nobugadi bwobutugi, bu kunika likuva, naye a vula kwama.

²³ Na uyu wa midzwa mmarova malahi, uyu niye u hulira likuva na a li manya; ni yama ligali, avalala va kola mia, navandi makumi gatanu nelilala, navandi amakumi gavaka.

²⁴ Kandi ya kupa lugano lundi, na a va volera, Ubwami bwomigulu bu fwanana nomundu u midza bugutsa bugasu mmulimi gwigwe:

²⁵ navutswa inyinga avandu va gona tsindolo, musigu wewe ya duka na a midza amavanze hagati hengano, na a tsia.

²⁶ Navutswa amatu lwa ga viruka ni gama, maku mavanze kandi ga loleka.

²⁷ Avatugwa vomwene inyumba vadza ni va mbolera, Mwami, si wa midza bugutsa bulahi mmulimi gugwo? Gwa nyola ha li ha ma vanze?

²⁸ Na a va volera, Mundu musigu wa kola yaga. Avatugwa va mbolera, U yanza ku tsie kugavungi dza?

²⁹ Navutswa ya va volera, Auwa, gase mu liha ingano inyinga mu vungidza mavanze.

³⁰ Mu leke vyombi vi viruke halala vi duke mu ligesa: ku ligesa nda volera avagesi, Mu tange kuvugula amavanze, mu ga bohe tsinkanya kugasamba; navutswa mu tera ingano mu kideera.

³¹ Ya va kupa lugano lundi, na a vola, Ubwami bwomigulu bu fwanana nolugutsa lwelisatsi, lwomundu ya vugula na a taga mu mulimi gwigwe:

³² nalwo nu lukekeke ku bugutsa bwosi; navutswa lwa lu mera li viruka li vita tsingutsa tsyosi, li gwa musala, kuduka manyonyi ge igulu gadza kugunza mu tsisya.

³³ Ya va kupa lugano lundi; Ubwami bwomigulu bu fwanana namamera gomkali ya vugula na a ga visa mu migero gyivaka gyobusie bwa luha ni bu gwa mamera bwosi.

³⁴ Vindu yivi vyosi Yesu ya volera viduma mutsing'ano; kandi bugira lugano si ya va volera kindu.

³⁵ Ga duke aga volwa nomunwa gwomuprofeti, na a vola, Nda kunula munwa gwange kukupa tsing'ano; Nda vola vindu vya yiswa kutwula inyinga yelirova lya lombwa.

³⁶ Hene yaho ya leka viduma na a tsia mu inyumba. Na vegidzwi veve vadza kuye, ni va vola, U ku vuulire lugano lwamavanze gomulimi.

³⁷ Ya tivula na a vola, Wa midza bugutsa bulahi nu Mwana wa Adamu;

³⁸ mulimi na vomulirova, na bugutsa bulahi, yava na vana vobwami; na mavanze na vana vomu damano;

³⁹ na musigu wa ga midza ni Setani: na ligesa ni kiheri kyenyinga; na vagesi ni tsingelosi.

⁴⁰ Kuli mavanze ga vungidzwa halala ni ga sambwa mu muliru, ga la va ndiyo mu kiheri kyenyinga yiyi.

⁴¹ Mwana wa Adamu a la tuma tsingelosi veve, navo va la vungidza mu bwami bwibwe vindu vyosi vikigitalidza, navo ava kola ubwoni,

⁴² va va te mu kisambiru: li la va ho lilira nokudyedyeidza amino.

⁴³ Hene yaho avalungi va la ng'ereng'ana kuli liuva mu bwami bwa Dada wavo. U veye namatu gokuhulira, a hulire.

⁴⁴ Ubwami bwomigulu bu fwanana na kiba ya viswa mu mulimi; yomundu lwa a nyola ma a visa; mu buyanzi bwibwe a tsia na a gulidza vyosi vya a veye navyo na a gula mulimi yigwo.

⁴⁵ Kandi, ubwami bwomigulu bu fwanana nomuguli wenya tsilulu tsindahi:

⁴⁶ naye lwa a mali kunyola lulu lulala lwe tsishilling tsinyingi, ya tsia kugulidza vyosi vya a veye navyo na a lu gula.

⁴⁷ Kandi, ubwami bwomigulu bu fwanana nomuluvo gwinikwa mu inyanza, ni gu vugula tsisudzi ku tsing'ano tsyosi:

⁴⁸ lwa gwizula va gu leta ku luginga, vikala, ni va vika tsindahi mu vihinda, navutswa tsindamano va ta.

⁴⁹ Gu la va ndiyo mu kiheri kyenyinga yiyi. Tsingelosi va la twula va tsie kutwulidza vadamano mu valungi,

⁵⁰ va va te mu kisambiru: li la va ho lilira nokudyedyeidza amino.

⁵¹ Mu huliye vindu yivi vyosi? Va mu volera Yee, Mwami.

⁵² Naye ya va voiera, Yiki ni kigira ku mung'odi samulala u koleywi mwegidzwi mu bwami bwomigulu, a veye kuli mundu mwene inyumba, a twulidza mu kiba yeye vindu vihya na vindu vikulu.

⁵³ Yesu lwa ya mala kukupa tsing'ano yitsi tsyosi ya twula ho.

⁵⁴ Na lwa a duka mu kivala kikye ya vegidza mu lisomero lyavo va duka va genya ni va vola, Mundu uyu ya twulidza ha li ha ubugeeri yibu nemiyinzi gyetsingulu yigyi?

⁵⁵ Si a li mwana wombadzi? Mama wewe si a langwa Maria? Nuvamwavo veve si va li Yakobo na Yosefa na Simoni na Yuda?

⁵⁶ Navabotso veve, si va li halala nekwinye? Kunangwa mundu uyu a nyoye ha li ha vindu yivi vyosi?

⁵⁷ Ku, va mu vihirirwa. Navutswa Yesu ya va volera, Muprofeti si a vula kwidzominywa navutswa mu kivala kikye, nomunyumba yeye heng'ine.

⁵⁸ Naye si ya kola yo miyinzi minene minyingi, kigira litasuuvira lyavo.