Marko 8 - KITABU KITAKATIFU

¹ Mu madiku yago, lwa kya li ho kiduma kinene, ni va vula kuva nevyokulia, Yesu ya langa avegidzwi veve na a va volera,

² Mbererera kiduma, kigira kalunu va menyi ninze madiku gavaka, na va ta li nevyokulia mba:

³ kandi ni mba volera va tsia yengo wavo ni va ta lie, va la va nehuyuki ku inzira: kandi avalala va twula hale.

⁴ Avegidzwi veve va mu tivulira, Mundu a la nyala kunyola ha li ha vyokulia mu kyangalangwi yigutidze avandu yava?

⁵ Ya va teva, Mu veye nemilango gyanga? Va vola, Gyitanu na gyiviri.

⁶ Na a ha avandu munwa vikale hasi ku marova: na a vugula milango gyitanu na gyiviri, na a santidza na a megannya, na a ha avegidzwi veve, va vike imbiri wavo; ni va gyi vika imbiri wekiduma.

⁷ Kandi va li netsisudzi tsigehi tsinkekeke: lwa ya mala kutsigasidza ya va volera kuvika yitsi kandi imbiri wavo.

⁸ Va lagira, ni viguta: ni va vungidza vihinda vitanu na viviri vi zuye amadonye ga tigala.

⁹ Va li himbi tsielfu tsine: na a va sendukidza.

¹⁰ Nonoho yingira mu liato halala navegidzwi veve, na a duka mu kivala kya Dalamanuta.

¹¹ Na Vafarisayo va twula ni va tanga kumuteva, venya kulola kyokulolekidzira kya twula migulu, ni va mu geridza.

¹² Na a twula imiyika ligali mu roho gwigwe, na a vola, Kigira ki likula yili lyenya kulola kyokulolekidzira? Ligali mmu volera, likula yili si li li hebwa kyokulolekidzira mba.

¹³ Na a va leka, ni yingira kandi mu liato na a tsia engereka.

¹⁴ Vivirira kuvugula ubukima; va li nomulango mulala gweng'ine mu liato.

¹⁵ Na a va gerihidza na a vola, Henza, mu gelihe bulahi mamera ga Vafarisayo namamera ga Herodi.

¹⁶ Ni va hangalidzana, ni va vole rana, Kivune si ku veye nobukima mba.

¹⁷ Yesu ya manya, na a va volera, Kigira ki mu hangalidzana, kigira mu vula kuva nobukima? Si mu manya, si mu hulira mba? Mu mali kudinnya mwoyo gwenyu?

¹⁸ Mu veye netsimoni, mu vula kulola? Mu veye namatu, mu vula kuhulira? Kandi si mwidzulitsa mba?

¹⁹ Lwa nda megannya milango gyi tanu mu va li tsielfu tsitanu, mwa vungidza amadonye vihinda vyanga? Ni va mu volera, Likumi na viviri.

²⁰ Lwa nda meganya gyitanu na gyiviri mu va li tsielfu tsine, mwa vungidza amadonye vihinda vyanga? Ni va mu volera, Vitanu na viviri.

²¹ Na a va volera, Mu kikiri ku manya?

²² Ku, va duka Betsaida. Ni va mu letera mundu mboku, ni va mu saala a mu dire.

²³ Na a gumira mboku mkono, na a mu twulidza mu lidala; lwa ya ka tudza amate mu tsimoni, na a vika kuye makono, ya mu teva, U lola kindu?

²⁴ Naye na a henza na a vola, Ndola avandu; kigira mba lola va fwana misala gyi genda.

²⁵ Ku, kandi ya vika ma kono ku tsimoni tsitsye; naye yumika, na a honnywa, na a lola bulahi, vindu vyosi.

²⁶ Na a mu volera, tsia yengo, na a vola, U tingira mu lidala.

²⁷ Yesu ya twula, navegidzwi veve, kutsia mu madala ga Kaisaria Filipi: lwa ya li ku inzira ya teva avegidzwi veve, na a va volera, Avandu va vola inze ni bwaha?

²⁸ Va tivula ni va vola, Yohana Mbatidzi; navandi va vola, Elija; navandi va vola, mulala ku vaprofeti.

²⁹ Ma ya va teva, Navutswa mwinye mu vola inze ni bwaha? Petro ya tivula na a mu volera, Ive ni Kristo.

³⁰ Na a veganehi dza va ta volera mundu, kali mulala.

³¹ Na a tanga kuvegidza vindu vinyingi, na a vola, Mwana wa Adamu, ga mu dukira kukupidzwa kivi kinene, kandi avakulundu, na vasalisi vanene, navang'odi va la mu lega nokumwiita, kandi inyima yama diku gavaka a la simuguka kandi.

³² Livola yili ya vola habulavu. Petro ya mu vugula na a tanga kumugaya.

³³ Na a girunkana, na a lola avegidzwi veve, na a gondokera Petro, na a mu volera, Yirane inyima wange, Setani; kigira ive si u ganagana vindu vya Nyasaye, navutswa vindu vyavandu.

³⁴ Ya langa avandu navegidzwi veve, na a va volera, Mundu na a va ni yenya kunonda, yegaye, a ginge musalaba gwigwe a nonde.

³⁵ Ku vosi yenya kuhonnya liva mwoyo lilye a la li gotidza; kandi uyu u gotidza liva mwoyo lilye kigira inze nevangeli, a la li honnya.

³⁶ Mundu na a va na a nyola vyomu lirova vyosi na a gotidza liva mwoyo lilye, vi mu konya ki?

³⁷ Mundu a la gulidza ki liva mwoyo lilye?

³⁸ Ku vosi u vera inze tsisoni namakuva gange mu likula lyobuheyi yili nelyobwoni; Mwana wa Adamu a la mu vera tsisoni, lwa a li duka nobu kumi bwa Ise wewe netsingelosi.