Marko 3 - KITABU KITAKATIFU

¹ Ni yingira kandi mu lisomero; ya li mu mundu wa ng'era mukono.

² Ni va mu henza na a va na a mu honnya mu lisabato, va mbuule.

³ Ku, ya volera mundu wa li nomukono gwa ng'era, Singira hagati.

⁴ Kandi ya va volera, Nobulahi kukola bulahi mu lisabato naho kukola ubudamano? Kuhonnya liva mwoyo naho kwiita? Navutswa va kiring'ana.

⁵ Lwa ya va henza na a vihirirwa, na a verera kigira budinyu bwemyoyo gyavo, ya volera mundu, Nyira mukono gugwo. Na a nyira mukono ni gu hona ni gu leng'ana nogundi.

⁶ Nonoho Vafarisayo va twula mu, ni va volerana nava nga Herodi kuli wa va duka kumwiita.

⁷ Na Yesu yiyahula navegidzwi veve ni va tsia kuluginga lwenyanza nekiduma kya twula Galilaya kya mu londa, navandi va twula Ebuyuda,

⁸ ne Yerusalemi ne Dumea na engereka wa Yordani; na vandi va twula Turo na Sidone, kiduma kinene, lwa va hulira amakuva ga ya kola, vadza kuye.

⁹ Na a volera avegidzwi veve li honge himbi liato likekeke li mu linde kigira kiduma gase ki la mmina.

¹⁰ Kigira ya honnya vanyingi; ni va mu mina va duke kumudira, vosi va li ni va veye netsinkudzo.

¹¹ Nemyoyo mida mano lwa gya mu lola, gya gwa hasi imbiri wewe ni gyi hanzuka ni gyi vola, Ive nu Mwana wa Nyasaye.

¹² Na a gyambakannya ligali gyi ta mbuula mba.

¹³ Na a tsia mkigulu na a langa vosi va ya li ni yenya; vadze kuye.

¹⁴ Na a tovola ava, li likumi na vaviri va ve halala naye, kandi a va hile kwilwadza,

¹⁵ nokuva netsingulu tsyokutwulidza amademone:

¹⁶ na a gulika Simoni lieta Petro;

¹⁷ na Yakobo wa Zebedayo na Yohana amwavo wa Yakobo, ya va gulika lyeta Boanergese li veye kuvola Avana viligita.

¹⁸ Kandi Andreya na Filipu, na Bartlomeyo, na Matayo, na Tomasi, na Yakobo wa Alfayo na Tadayo na Simoni Mukanani

¹⁹ na Yuda Iskarioti wa mu zama. Na a tsia munyumba.

²⁰ Nekiduma kirana kuvunga kandi, kali si va nyala kulagira mba.

²¹ Navalina veve lwa va hulira va tsia kumgumira: kigira va vola, A lalu kanga.

²² Navang'odi va sulunguta ni va twula Yerusalemi, va vola A veye na Beelzebuli; na a twulidza amademone netsingulu tsyo mwami wamademone.

²³ Na a va langa, na a va volera mutsing'ano, Setani a nyala ndi kukunga Setani?

²⁴ Ubwami ni bwavukani bwene, ubwami yibwo si bu nyala kusingira.

²⁵ Nenyumba ni yavukani yene inyumba yeyo, si i nyala kusingira mba.

²⁶ Setani ni yevukira mwene na a gavanywa si a nyala kusingira mba, navutswa a la hera.

²⁷ Si ha veye nomundu a nyala kwingira munyumba vomundu wetsingulu, na a mu nyaga vindu vivye, bugira na a ta boha wetsingulu; ma a la mu nyaga inyumba yeye.

²⁸ Ligali mmu volera, Avana va vandu va la samefwa ubwoni bwosi namanyego gavo ga va li nyega:

²⁹ navutswa uyu li nyega Roho Mutakatifu si a li nelisamefwa mihiga nemihiga, navutswa a veye nobwoni kuye bu ta hera:

³⁰ kigira va li ni va vola, A veye nomwoyo mudamano.

³¹ Vadza vamwavo veve na mama wewe; ni va singira kyova ni va tuma mundu kumulanga.

³² Kiduma kya li ni kikaye ni ki mu kumbiridza, ki mu volera, Henza mama wowo nava mwavo vovo va veye kyova va kwenya.

³³ Na a va tivulira, na a vola, U veye mama wange na vamitu vange ni bwaha?

³⁴ Na a henza ava li ni va mkumbiridza, na a vola, Henza mama wange na vamitu vange.

³⁵ Ku vosi u li kola ubulaliri bwa Nyasaye, uyu niye amitu wange, na mbotso wange, na mama wange.