Marko 13 - KITABU KITAKATIFU

¹ Lwa ya li na a twula mu litempeli, mulala ku vegidzwi veve ya mu volera, Mwegidzi, henza, magina kuli wa ga veye netsinyumba kuli wa tsi veye

² Yesu ya mu volera, U lola tsinyumba tsinene vitsi? Si li la tigala hano ligina lilala ku lindi, li li vula kutsomwa hasi.

³ Lwa yikala mu kigulu kya Mizeituni, litempeli lya li engereka, Petro na Yakobo na Yohana na Andreya va mu teva, lwa va li veng'ine,

⁴ va vola, U ku volere, vindu yivi vi la kolwa inyinga ki? Kandi lilolekidza li la va ki inyinga vindu yivi vyosi vyenya kukolwa?

⁵ Yesu ya tanga kuvavolera, Mu gelihe, mundu a ta mu gotidza mba.

⁶ Kigira vanyingi va ladza mu lieta lyange ni va vola, Inze niye; kandi va la gotidza vanyingi.

⁷ Kandi lwa mu li hulira mahe nolusuma lwamahe mu ta henda myoyo mba: vindu yivi vi la niga kukolwa; navutswa kiheri ki kikiri kuduka.

⁸ Ihiri nehiri va la vukerana, nobwami nobwami bu la vukerana, kandi mu vivala vinyingi lirova li la degera; tsitodzo tsi la va mu lirova: vindu yivi vi veye litanga lyokukupa kivi.

⁹ Mu gelihe avene, kigira va la mu zama mu hilwe mu kyina; va la mu duya mu masomero; mu la singira imbiri wa vanyampara na vami kigira inze, mu ve kilolekidzu kuvo.

¹⁰ Litanga ivangeli i lilwadzwa mu tsihiri tsyosi.

¹¹ Lwa va mu hila mu kyina nokumuzama, mu ta henda myoyo imbiri ku livola lyenyu: navutswa amakuva ga mu li hebwa inyinga yiyi mu vole; kigira si mu li mwinye mu vola, navutswa ni Roho Mtakatifu.

¹² Mundu a la zama amwavo wewe a kudze, kandi ise a la zama mwana wewe; kandi avana va la vuha avivuli va viite.

¹³ Na vandu vosi va la mu dunyira kigira lieta lyange: navutswa u li dinya ku kuduka ku kiheri a la honnywa.

¹⁴ Lwa mu li lola mudamano munonono wokwonogonnya na a singiye ha bu ta li bulahi a singire (a huiire wa soma), ava veye Ebuyuda inyinga yeyo viruke va tsie mu vigulu:

¹⁵ uyu u veye ku inyumba yeye higulu, a tika mba kwingira mu, a vugule kindu ki veye mu inyumba:

¹⁶ noyu u veye mu mulimi a ta gerera kuvugula ingubo yeye mba.

¹⁷ Navutswa ubudamano bu la va ku yava ava veye inda na va nyunnya mu madiku yago

¹⁸ Kandi mu saave i ta va inyinga yobukindu.

¹⁹ Kigira mu madiku yago ha la va nekivi kuvita madiku gosi kutanga inyinga Nyasaye ya lomba vindu vyosi kuduka lero, kandi mu madiku gosi gadza.

²⁰ Kandi Mwami a vula kwimbihidzi madiku yago, nkano si ha li nomundu u nyala kuhonnywa; navutswa wimbihidza madiku yago kigira avatovole va ya tovola.

²¹ Inyinga yeyo mundu na a mu volera, Henza, nguyu Kristo; kinga, Henza ngoyo; mu ta suuvira mba:

²² kigira vakristo vabehi va la twula, navaprofeti vabehi, va la leta vyokulolekidza nevyokugennya, va duke va gotidze avatovole, ni ga nyalika.

²³ Navutswa mu gelihe: henzi, mmali kumuvolera vindu vyosi ni vi kikiri kuduka.

²⁴ Navutswa mu madiku yago inyima yekivi yikyo, liuva li la kingwa, nomweli gu la sula kwaaka,

²⁵ netsing'ereng'ani tsyegulu tsi laguluka, netsingulu tsyegulu tsi la degeridzwa.

²⁶ Hene yaho va la lola Mwana wa Adamu ni yadza mu malesi netsingulu tsinene nobukumi.

²⁷ Hene yaho a la tuma tsingelosi, kandi a la vungidza halala vatovole veve va twula mu tsimbuudzi tsine, kutwula ku tsindulu tsyelirova kandi ku tsindulu tsyegulu.

²⁸ Kalunu mu hulire lugano lwomukuyu: inyinga lusya lu veye ludoto, kandi lu sibuka mu manya inyinga yokutaga i veye himbi.

²⁹ Kandi ndiyo lwa mu lola vindu yivi vi dukanga, mwinye mu manye a veye himbi ligali, ha viliariiro.

³⁰ Ligali mmu volera, Likula yili si li li vita, vindu yivi vyosi vi luhe vi kolwe.

³¹ Ligulu nelirova li la vita, navutswa amakuva gange si ga la vita mba.

³² Navutswa lidiku yilyo nenyinga yeyo mundu si a manya mba, kali tsingelosi vomigulu, kinga Mwana, navutswa Dada weng'ine.

³³ Mu gelihe, mu linde, mu saale, kigira si mu manya inyinga mba.

³⁴ Ga veye kuli mundu a tsia lugendo mu kivala kindi, na a leka inyumba yeye, na a ha vatumekiri veve tsillgulu, na a ha vosi miyinzi gyavo na a ha u linda kiliango munwa a linde.

³⁵ Kigira yaga mu linde: kigira si mu manya inyinga yomwami wenyumba a li duka, ni i va mgolova, kinga mu budiku hagati, kinga inyinga idaywa i lagula, kinga mugamba tsuli;

³⁶ gase a la duka bwangu na a mu nyole, ni mu gona tsindolo.

³⁷ Kandi aga mu volera, mbolera vosi, Lindi.