Marko 11 - KITABU KITAKATIFU

¹ Lwa va duka himbi ne Yerusalemi, mu Bethfage na Betani, mu kigulu kya Mizeituni, ya tuma vaviri ku vegidzwi veve,

² na a va volera, Mu tsie mu lidala ku lwangereka: nonoho lwa mwingira, mu la nyola kimoli kyesukiri, kyomundu a kikiri kwikala ku; mu ki boholole, mu ki lete.

³ Mundu na a mu volera, Kigira ki mu kola ndi? Mu vole, Mwami a kyenya; nonoho a la mu ha mu ki lete hano.

⁴ Ku, va twula ni va nyola kimoli ki boheywi ha kiliangu ku inzira habulavu; ni va ki boholola.

⁵ Na valala ava singira ho va va volera, Mu kola ki, ni mu boholola kimoli?

⁶ Navo va va volera amakuva ga Yesu ya va volera: ma va va leka.

⁷ Ni va leta kimoli ku Yesu, ni va vika ku tsingubo tsyavo; na yikala ku.

⁸ Na vanyingi vaala tsingubo tsyavo ku inzira; navandi vaala tsisya tsya va kalaga mu milimi.

⁹ Avimiri navenyima va hanzuka ni va vola, Hozana; a gasidzwe yadza ku lieta lyo Mwami:

¹⁰ Bugasi bwami buudzanga, bwa Daudi guga wetu: Hozana igulu ku ligulu.

¹¹ Kandi yingira Yerusalemi no mu litempeli; lwa ya mala kuhenza ku vindu vyosi, isi ya li ni ya ka mwama, ya twula na a tsia Betani halala nava li likumi na vaviri.

¹² Na mugamba lwa ya twula Betani, ya li nenzala.

¹³ Na a lola mkuyu gwa li hale gwa li namatu, ni yadza, mbula a la nyola ku kindu. Lwa ya duka si ya nyola ku kindu mba, navutswa amatu geng'ine; ki gira si ya li inyinga yamakuyu mba.

¹⁴ Ya tivula na a gu volera, Mundu a ta lia kandi makuyu gogo mihiga gyosi. Na vegidzwi veve va ga hulira.

¹⁵ Ku, va duka Yerusalemi: ni yingira mu litempeli, na a tanga kukunga ava li ni va gulannya nava li ni va gula mu litempeli, na a kunaminya tsim za tsya va li ni va kiranyira ku tsishilling, nevisako vya va gula makuulu;

¹⁶ kandi yamba kannya mundu a ta ginga kiju na a vita mu litempeli.

¹⁷ Ni yegidza, na a va volera, Si ga ng'odwa, Inyumba yange i la gulikwa inyumba yokusaala yetsihiri tsyosi? Navutswa mwinye mu gi kola i ve inyumba yavivi.

¹⁸ Avasalisi vanene nava ng'odi va ga hulira, ni venya ku mwiita: kigira va mu tia, kigira avandu vosi va genya megidzo gege.

¹⁹ Madiku gosi lwa isi ya mwama ya twula mu lidala.

²⁰ Na mugamba lwa va vita, va lola mukuyu gu niyaye, liniala lya twulira mu miri.

²¹ Petro yidzu litsa na a mu volera, Mwegidzwi, henza, mukuyu gwa wa kyena gu niyaye.

²² Na Yesu ya tivula na a va volera, Mu suuvire Nyasaye.

²³ Ligali mmu volera, Ku vosi u li volera kigulu yiki, Ive u gingwe u sikiswe mu inyanza; kandi u ta hayahayidza mu mwoyo gwigwe, navutswa a suuvira mu mwoyo amakuva gege ga la kolwa; uyu a la ga nyola.

²⁴ Yiki ni kigira mmu volera, Ku vindu vyosi vya mu saala nokuteva, mu suuvire mu vi nyola, mu la vi nyola.

²⁵ Lwa mu singera kusaala, ni mu ve nekindu kumundu, mu mu samehe; Dada wenyu u veye migulu a duke kumusameha ubwoni bwenyu.

²⁶ Navutswa mwinye ni mu ta sameha, Dada wenyu u veye migulu, si a la sameha mahyolo genyu.

²⁷ Virana ni va duka kandi Yerusalemi: kandi lwa ya li na a genda mu litempeli, vadza kuye avasalisi navang'odi navakulundu;

²⁸ ni va mu volera, Ive u kolanga vindu yivi ni tsingulu ki? Kinga ibwaha wa ku ha tsingulu kukola vindu yivi?

²⁹ Ku, Yesu ya va volera, Kandi inze nda mu teva liteva lilala, mu ntivulire, kandi nda mu volera tsingulu ki tsya nkolera vindu yivi

³⁰ Libatidza lya Yohana, lya twula migulu naho mu vandu? Mu ntivulire.

³¹ Ku, va hangala avene navene, ni va vola, Ni ku vola, Lya twula migulu; a la vola, Kigira ki mwa sula kumusuuvira?

³² Navutswa ni ku vola, Lya twula mu vanduva tia vandu: kigira vosi va vola Yohana nu muprofeti.

³³ Ku, va tivulira Yesu ni va vola, Si ku manya mba. Yesu ya va volera, Kandi inze si nda mu volera tsingulu ki tsya nkolera vindu yivi.