Malaki 2 - KITABU KITAKATIFU

¹ Kandi kalunu, O mwinye avasalisi, lilaga yili li veye ku mwinye.

² Ni mu va ni mu vula kuhulira, ni mu va ni mu vula kulivika mu myoyo gyenyu, kukuminya lieta lyange, Yahova wa mahe a vola, hene yaho nda leta lilaamwa ku mwinye, na nda laama ubugasu bwenyu; yee, mmali kubulaama, kigira si mwa li vika mu myoyo gyenyu.

³ Henza, nda go ndokera visukululwi vyenyu, na nda vaka amabi mmoni mwenyu, livola li veye amabi gevihaanwa vyenyu: na mu la twulidzwa halala nago.

⁴ Na mu la manya inze nda letera mwinye lilaga yili, lilagana lyange li ve halala na Levi, Yahova wa mahe a vola.

⁵ Lilagana lyange lya li halala naye lyelivamwoyo na lyemirembe nda mu ha a duke kutia, naye ya ntia, na ya tia lieta lyange.

⁶ Lilaga lya geligali lya li mu munwa gwigwe, na bukyamu si bwa loleka mu minwa gyigye mba: ya genda halala ninze mu mirembe nomu bulungi, na ya girunkannya avanyingi va leke ubudamano.

⁷ Kigira ga dukira minwa gyomusalisi kulinda limanya, kandi ga va dukira kwenya lilaga mu munwa gwigwe: kigira a veye mutumwa wa Yahova wa mahe.

⁸ Navutswa mwa girunnkana nokuleka inzira zana; mwikigitalidzi avanyingi mu lilaga; mwononnyi lilagana lya Levi, Yahova wa mahe a vola.

⁹ Kigira yaga mmali kukolera mwinye avokulegwa na vahanzahanza imbiri wa avandu vosi, kuli mwinye mwa vula kulinda tsinzira tsyange, navutswa mwa li nelyelidza ku vandu mu malago.

¹⁰ Kwinye kwosi si ku veye na dada mulala? Si a veye Nyasaye mulala wa ku lomba? Kigira ki kwinye ku tumekiranga ubugadi sa mulala ku amwavo wewe, ni kwononnya amalaga ga vaguga vetu?

¹¹ Yuda ya kola nobugadi, na livihiriridza li veye mu Israeli nomu Yerusalemi: kigira Yuda yononnya ubutakatifu bwa Yahova bwa a yanzanga, na ya kwa mu kana wa nyasaye mugeni.

¹² Ku uyu u kolanga vindu yivi, Yahova a la twulidza mwegidzi nomwegidzwi, ku mahema ga Yakobo, na uyu u haananga kihaanwa ku Yahova wa mahe.

¹³ Kandi mu kolanga yaga: mu tonya maliga ku bwali bwa Yahova, halala nokulira, nokukenya, a luhe a vule kuhenza vihaanangwa kinga kuvibugirira mmakono genyu nomwoyo gwokuyanza.

¹⁴ Na mwi nye mu volanga, Kigira ki? Kigira Yahova ya li muloli hagati hoho na mukali wobusoleli bubwo, wa ive wa mu kolera ubugadi, kali ni ya li wakyo, na mukali welilagana lilyo.

¹⁵ Si ya kola mwinye mulala, kali ni ya li nelitigala lya Roho? Kandi mulala kigira ki? Ya li na yenya kisukululwi kyokutia Nyasaye. Kigira yaga mu linde ligali mwoyo gwenyu ku vosi mundu a ta kola agobugadi ku mukali wobusoleli bwibwe.

¹⁶ Kigira inze mbihiriranga likunga mukali, Yahova a vola, Nyasaye wa Israeli, na uyu u kunikanga ingubo yeye nekirage, Yahova wa mahe a vola: kigira yaga mu linde ligali myoyo gyenyu, gase mu la kola ubugadi.

¹⁷ Mu mali kuluhidza Yahova na makuva genyu. Navutswa mu volanga, Ku mu luhidza ku makuva ki? Ga veye ku livola lya mu volanga, Sa mulala u kolanga ubudamano a veye mulahi mu tsimoni tsya Yahova, naye a sangaliranga avandu yava; kinga Nyasaye welikalaga a veye haliha?