Luka 7 - KITABU KITAKATIFU

¹ Lwa ya mala kudukidza amakuva gege gosi mu matu gavandu, yingira mu Kapernaume.

² Mutugwa womunyampara mulala, wa ya mu yanza, ya li na a lwala ni yenya kukinda.

³ Lwa ya hulira makuva ga Yesu, ya tuma avakulundu va Vayuda va tsie kuye, va mu saave yadze kuhonnya mutugwa wewe.

⁴ Na yava lwa va duka ku Yesu va mu saala ligali, ni va vola, A veye mulahi kuduka u mu kolere kindu yiki;

⁵ kigira a yanza ihiri yetu, na mwene ya kwombakira lisomero lyetu.

⁶ Ma Yesu ya tsia navo. Kandi lwa ya duka ha inyumba yeye himbi, munyampara ya tuma avalina veve na a mu volera, Mwami u ta nyankana; kigira si mbeye mundu u dukana na ive udze kwingira mu inyumba yange:

⁷ kunangwa si nzelola bulahi kuduka ku ive. Navutswa u vole likuva vutswa na mutugwa wange a la honnywa.

⁸ Kigira inze mbeye mundu mukekeke ku vamehi, kandi mbeye navasikari avakekeke ku inze: kandi mbolera mulala uyu, Tsia, ma a tsia; kandi wundi, Hamba, ma yadza; kandi mutugwa wange, Kola ndi, ma a kola ndiyo.

⁹ Yesu lwa ya hulira vindu yivi ya genya, na a girunkana na a volera kiduma kya mu londa, Mmu volera, Nkikiri kulola lisuuvira linene kuli yili, kali mu Israeli.

¹⁰ Navo va tumwa virana yengo ni va nyola mutugwa na a honi.

¹¹ Lwa inyima hakekeke ya tsia mu lidala lya langwa Naini; navegidzwi va mu londa, nekiduma kinene.

¹² Lwa ya duka himbi ha kiribwa kyelidala, henza, mukudzu ya letwa kyova, a veye muderwa ku mama wewe, naye nu mukunzakali, navandu vanyingi velidala va li halala naye.

¹³ Mwami, lwa ya mu lola ya mu vererera, na a mu volera, U ta lira mba.

¹⁴ Yisunda himbi na a dira ku ludigi: navo ava lu ginga va singira. Naye ya mu volera, Muyai, nku volera, Vuka.

¹⁵ Uyu mukudzu ya vuka ni yikala, na a tanga kuvola. Yesu ya mu ha mama wewe.

¹⁶ Nobutii bwa gumira vosi, ni vidzominya Nyasaye, ni va vola, Muprofeti munene u vuki mu kwinye: Nyasaye u henzi avandu veve.

¹⁷ Amakuva gege yaga ga landa mu kivala kyosi kye Buyuda nomu vivala vyosi vya himbi.

¹⁸ Avegidzwi va Yohana va mu volera vindu yivi vyosi.

¹⁹ Na Yohana ya langa avegidzwi veve vaviri, na a va tuma ku Mwami, na a vola, Ive niye udzanga, naho ku linde wundi?

²⁰ Avasatsa yava lwa va duka kuye, va vola, Yohana Mubatidzi u ku tumi ku ive, a ku teve Ive niye udzanga, naho ku linde wundi?

²¹ Ku isaa yeyo ya honnya vanyingi ubulwaye nobusaliri na roho midamano; navaboku vanyingi ya va ha lilola.

²² Ma ya tivula na a va volera, Mu tsie kuvolera Y ohana amakuva yaga ga mu loli na ga mu huliye; avaboku va hebwa lilola, navaleema va gendanga, navagere va takaswa, navahana amatu va huliranga, navakudzu va sirnuguki dzangwa, navadaka vilwadzirangwa amakuva malahi.

²³ Kandi uyu a veye nobugasu u li vula kulala ku inze kyokwikigitala.

²⁴ Navo avatumwa va Yohana, lwa va mala kutsia ya tanga kuvolera viduma amakuva ga Yohana. Mwa tsia kulola ki mwigendanyama? Kidundu kyembuudza ya sung'usa?

²⁵ Navutswa mwa tsia kulola ki? Mundu wevika tsingubo tsinzeserelu? Henza, yava vevika tsingubo tsing'e reng'anu ni va lia ivilahi, va menya mu tsinyumba tsyavami.

²⁶ Navutswa mwa tsia kulola ki? Muprofeti? Yee, mmu volera, kandi a vita muprofeti.

²⁷ Uyu niye wa ng'odirwa yaga, Henza, ntuma mutumwa wange kwimira imbiri wowo, U li lomba inzira yoyo imbiri wowo

²⁸ Mmu volera, Kuvo vavakali vivula si ha li no u vita Yohana: navutswa u veye mukekeke vutswa mu bwami bwa Nyasaye a veye munene kuvita uyu.

²⁹ Na vandu vosi lwa va hulira, navasololi vobushutu, va ha Nyasaye ubulungi, va mali kubatidzwa nelibatidza lya Yohana.

³⁰ Navutswa Avafarisayo navegidzi velilaga va hangala amakuva ga Nyasaye avene, va vula kubatidzwa nelibatidza lilye.

³¹ Yesu ya vola, Nda fwanannya na ki, avandu velikula yili? Navo va fwana na ki?

³² Va fwanana navana vikalanga mu kitu, ni va langana, ni va vola, Kwa mu kupira lilere, si mwa kina; kwa leterera lwikuulu na mwinye si mwa lira.

³³ Kigira Yohana Mubatidzi yadza si ya lagira ubukima kandi si ya nwa iwaini; na mwinye mu vola A veye nelidemone.

³⁴ Mwana wa Adamu yadza a litsanga na a nwa; na mwinye mu vola, Henza, na muhuvali no hongera kunwa iwaini, nomulina wavasololi vobushutu na voni

³⁵ Ubugeeri bu hebeywi ubulungi navana vabwo.

³⁶ Mulala ku Vafarisayo ya mwenya a tsie kulia naye. Yingira mu inyumba yo Mufarisayo uyu, ni yikala ku vyokulia.

³⁷ Henza, mukali wa li mu lidala, mwoni; kandi lwa ya manya yikalanga ku vyokulia mu inyumba yo Mufarisayo, ya leta ichupa ya maguta go buguli budinyu ga funya mwayu,

³⁸ na a singira inyima ha virenge vivye, na a lira, na a tanga kusavidza virenge vivye namaliga gege, na a vyeya netisu Iyoku mutwe gwigwe, kandi ya busa busa virenge vivye na a vi vaka namaguta ga funya mwayu.

³⁹ Kunangwa Mufarisayo wa mu langa, lwa ya lola ndi, ya ganagana, Mundu uyu na a va muprofeti, nkano u manyi ya li bwaha, kandi kuli a veye mukali wa liva ki u mu diranga, kigira a veye mwoni.

⁴⁰ Yesu ya tivula na a mu volera, Simoni, mbeye nelikuva lya nyenya kukuvolera. Naye ya mu volera, Mwegidzi, vola.

⁴¹ Mwekopidzi mulala ya li nava magovi veve vaviri: mulala ya li neligovi lyetsishilling tsimia tsitanu, nowundi amakumi gatanu.

⁴² Lwa va daka kya va mu tunga, ya va sameha vombi. Ku yava u li ha u li mu yanza kuvita?

⁴³ Simoni ya tivula na a mu volera, Nganagana uyu wa samefwa tsinyingi. Kandi ya mu volera, U voye bulahi.

⁴⁴ Ya girunkana na a henza mukali na a volera Simoni, U lola mukali uyu? Ndingira mu inyumba yoyo, si wa mba amadzi gokwisavidza virenge vyange: navutswa uyu u nzisavidzi virenge vyange namaliga gege, kandi u veyi nelisu lyoku mutwe gwigwe.

⁴⁵ Ive si wa li mbusa: navutswa uyu kutwula inyinga ndingira, si ya lekera kubusa virenge vyange.

⁴⁶ Ive si wa mbaka mutwe gwange amaguta: navutswa uyu u mbaki virenge vyange namaguta ga funya mwayu.

⁴⁷ Kigira yaga, nku volera, U sameheywi ubwoni bwibwe bu li bunyingi, kigira ya yanza ligali: navutswa u samehangwa hakekeke a yanzanga hakekeke.

⁴⁸ Kandi ya mu volera, Ubwoni bubwo bu sameheywi.

⁴⁹ Navo avikala naye ku v yokulia, va tanga kuganagana mu myoyo gyavo, Ibwaha uyu u samehanga ubwoni?

⁵⁰ Ya volera mukali, Lisuuvira lilyo li ku honnyi; u tsie nemirembe.