Luka 5 - KITABU KITAKATIFU

¹ Kiduma lwa kya mu mina ni ki hulira likuva lya Nyasaye, ya singira ku luginga lwenyanza ya Genesareta.

² Ya lola bwato buviri bu singiye ku luginga: navutswa avaluvi va twula mu ni vogidza imiluvo gyavo.

³ Ya nina mu bwato bulala, nabwo bwa li bwa Simoni, na a mu saava a bu twulidze ku luginga hakekeke. Ni yikala mu bwato ni yegidza viduma.

⁴ Lwa ya mala kuvola, ya volera Simoni, U bu hile mu luliva, mu vike imiluvo gyenyu mu luve.

⁵ Simoni ya tivula na a mu volera, Mwami, kwa li kukola miyinzi ubudiku pei si kwa nyola kindu: navutswa kigira likuva lilyo nda vika imiluvo.

⁶ Lwa va mala kukola ndiyo, va nyola tsisudzi tsinyingi ligali; kandi miluvo gyavo gyenya kutanduka;

⁷ ni va sima ava va sanga navo vobwato bundi, vadze kuvakonya. Kandi vadza ni vizulitsa bwato bwombi, bwa duka bwenya kwiina.

⁸ Navutswa Petro lwa ya lola ndiyo, ya gwa hasi ku malu ga Yesu, na a vola, Twula ku inze; kigira mbeye mundu mwoni, O Mwami.

⁹ Kigira ya genya, navo vosi ava veye halala naye, ku tsisudzi tsya va luva.

¹⁰ Kandi Yakobo na Yohana avana va Zebedayo va veye ndiyo, navo va li ava va sanga na Simoni. Kandi Yesu ya volera Simoni, U ta tia; kutwula kalunu ive u la luva avandu.

¹¹ Lwa va mala kuleta bwato bwavo ku luginga, va leka vyosi, ni va mu londa.

¹² Lwa ya li mu lidala lilala, henza, mundu wekisatsa wizula ubugere: lwa ya lola Yesu, ya gwa mammama, na a mu saala, na a vola, Mwami, nu u yanza u nyala kuntakasa. Mwami, nu u yanza u nyala kuntakasa.

¹³ Ya nyira mukono gwi gwe, na a mu dira, na a vola, Nyanza, u takaswe. Nonoho ubugere bwibwe bwa mu leka.

¹⁴ Na a mwegane hidza u ta volera mundu kali mulala: navutswa u tsie kwemannya ku musalisi, u hile vyokutakaswa kukwo, kuli Musa ya laga, vi veye vyokulolekidzakuvo.

¹⁵ Navutswa amakuva gege ga kira kulanda; na viduma vinyingi vya vugana kumu hulira nokuhonnywa tsinkudzo tsyavo.

¹⁶ Navutswa mwene yiyahula na a tsia mwigendanyama, na a saala.

¹⁷ Lidiku lilala ku madiku yago ya li ni yegdza: li ho Avafarisayo navegidzi ve lilaga ni vikaye, ava twula mu tudala twosi twe Galilaya ne Buyuda ne Yerusalemi: kandi tsingulu tsyo Mwami tsya li kuye kuhonnya.

¹⁸ Henza, avandu va gingira mundu wa fwogoya ku kitali, ni venya kumwingiridza nokumuvika imbiri wewe.

¹⁹ Lwa va vula kulola ha va mwingiridzira kigira avandu va li avanyingi, va nina ku inyumba igulu, ni va gi hudula ni va mwikidzira ku kitali hagati imbiri wa Yesu.

²⁰ Ya lola lisuuvira lyavo, na a vola, Mundu ive, ubwoni bubwo bu sameheywi.

²¹ Avang'odi na Vafarisayo va volerana avene, ni va vola, Ibwaha uyu u vola manyego? Ibwaha u nyala kusameha ubwoni navutswa Nyasaye yeng'ine?

²² Navutswa Yesu ya manya tsiganagani tsyavo, na a tivula na a va volera, Kigira ki mu ganagana mu myoyo gyenyu?

²³ Li veye liangu ni li ha, kuvola, Bwoni bubwo bu sameheywi; naho kuvola, Singira u gende?

²⁴ Navutswa mu duke kumanya Mwana wa Adamu a veye netsingulu mu lirova kusameha ubwoni (ya volera wa fwogoya), Nku volera, Singira, u vugule kitali kikyo, u tsie yengo wowo.

²⁵ Nonoho ya singira imbiri wavo vosi na a vugula kya ya gona ku na a tsia n yengo wewe, ni yidzominya Nyasaye.

²⁶ Ubugenyi bwa gumira vosi, ni vidzominya Nyasaye; ni vizula ubutii, ni va vola, Lero ku loli vindu vyokugenya.

²⁷ Inyima wa yaga ya twula na a lola musololi wobushutu, wa langwa Levi, ni yikaye ha va sololera ubushutu, na a mu volera, U nonde.

²⁸ Ya leka vyosi, na a singira na a mu londa.

²⁹ Na Levi ya mu lombera lilia linene mu inyumba yeye: kya li ho kiduma kinene kyavasololi vobushutu kandi kyavandi vikala ku vyokulia halala navo.

³⁰ Kandi Avafarisayo navang'odi vavo va monya avegidzwi veve, ni va vola, Kigira ki mu litsa nokunwa halala navasololi vobushutu navoni?

³¹ Yesu ya tivula na a va volera, Avalamu si venya wetsinyasi; navutswa avalwaye.

³² Si nzidza kulanga avalungi navutswa avoni va duke kweganira.

³³ Navo va mu volera, Avegidzwi va Yohana va honga lilia hali kanyingi, ni va saala; kandi ndiyo avegidzwi va Vafarisayo; navutswa avovo va litsa kandi va nwedza.

³⁴ Yesu ya va volera, Mu nyala kukola avalina voserereywi va honge lilia woserereywi na a veye halala navo?

³⁵ Navutswa amadiku ga la duka; inyinga woserereywi a twulidzwa kuvo, kunangwa va la honga lilia mu madiku yago.

³⁶ Kandi ya kupa lugano: Si ha li nomundu u tandula kilave ku ingubo impya na a ki kupa ku ingubo inkulu; na a kupa, a la tandula impya, kandi kilave kyempya si ki leng'ana nenkulu.

³⁷ Si ha li nomundu u tsuka iwaini impya mu tsimuya tsinkulu; na a kola yaga gi la tandula tsimuya, yene gi la sunduka, netsimuya tsi loneka.

³⁸ Navutswa iwaini impya gi tsukangwa mu tsimuya tsimpya.

³⁹ Kandi si ha li nomundu u nweye iwaini indulu yenya impya; kigira a vola, indulu ni indahi.