Luka 3 - KITABU KITAKATIFU

¹ Ku muhiga gwelikumi na gyitanu gwelyameha lya Tiberio Kaisari, Pontio Pilatu lwa ya li govuna we Buyuda, na Herodi ya li munyampara we Galilaya, na Filipu amwavo wewe ya li munyampara wekivala kye Turea nekye Tarakoniti, na Lusania ya li munyampara wa Abilene,

² inyinga yobusalisi bwa Annas na Kaiafa, likuva lya Nyasaye lya duka ku Yohana mwana wa Zekaria na a veye mwigendanyama.

³ Ya duka mu tsimbega tsyosi tsya li himbi Yordani, ni yilwadza libatidza lyokweganira lyokuduka kusamefwa ubwoni.

⁴ Kuli ga ng'odwa mu kitabu kyamakuva ga Isaya muprofeti, Mwoyo gwomulala u hanzuka mwigendanyama Mu lombe inzira yo Mwami Mu lungikidze mihanda gyigye.

⁵ Vivanda vyosi vi lizulidzwa; Vigulu vyosi notugulu twosi tulikidzwa; Vya kyama vi la lungika Tsinzira tsyamagyiki tsi la leng'ana;

⁶ Navandu vosi va la lola ubuhonnyi bwa Nyasaye.

⁷ Kunangwa ya volera viduma vya twula ni vadza kuye a va batidze, Mwinye avana venzoka, ibwaha wa mu gerihidza kwiruka ubutima buudzanga?

⁸ Mu kole makuyu ga dukana nelyeganira, mu ta tanga kuganagana, Ku veye naguga wetu Abrahamu: kigira mmu volera, Nyasaye a nyala kutwulidzira Abrahamu avana ku magina yaga.

⁹ Kali ka lunu imbadzi i vikeywi ha vitinya vyemisala: kigira yaga, ku misala gyosi gu tama makuyu malahi gu temagwa, gu tebwa mu muliru.

¹⁰ Viduma vya mu teva, Ku kola ndi?

¹¹ Naye ya tivula, na a va volera, U veye netsikanzu tsiviri a he u ta li nayo; kandi u veye nevyokulia a kole ndiyo.

¹² Ni vadza kandi avaso loli vobushutu kubatidzwa, navo va mu volera, Mwegidzi, Ku kola ndi?

¹³ Naye ya va volera, Mu ta kiridza kusolola kuvita ga mwa lagwa.

¹⁴ Navasikari kandi va mu teva, ni va vola, Na kwinye ku kola ndi? Naye ya va volera, Mu ta nuula mundu kindu, kandi mu ta gina mundu; kandi mu bugirire madanyi genyu.

¹⁵ Kandi avandu lwa va lindirira ni va ganagana mu myoyo gyavo ku Yohana, na a va na a veye Kristo;

¹⁶ Yohana ya tivula na a va volera vosi, Inze ligali mmu batidza namadzi; navutswa udzanga a veye netsingulu kuvita inze, wa nta duka kuboholola tsinkova tsyevilatu vivye: uyu a la mu batidza na Roho Mutakatifu nomuliru.

¹⁷ Kiseseru kikye ki veye mu mukono gwigwe, kulavidza ligali lodze lwilwe, kandi kutera ingano mu kideera; navutswa mukuudzi a la samba nomuliru gu ta simika.

¹⁸ Kandi yilwadzira avandu nelyeganehidza linyingi lindi, amakuva malahi.

¹⁹ Navutswa lwa ya gaya Herodi munyampara ku amakuva ga Herodiya mka amwavo wewe, kandi ku vindu vidamano vyosi vya Herodi ya kola,

²⁰ ya meda yiki kandi kuvyo vosi, ya boha Yohana mu inyumba yavahambe.

²¹ Avandu vosi lwa va batidzwa, kandi Yesu lwa ya mala kubatidzwa, lwa ya li na a saala, ligulu li gulika,

²² na Roho Mutakatifu yika kuye neligondo kuli mubiri gwelikuula, kandi mwoyo gwa twula migulu, gu vola, Ive u veye Mwana wange wa nyanza; nyanzeywi ligali ku ive.

²³ Yesu mwene, lwa ya tanga kwegidza liduka lilye lya duka himbi imihiga amakumi gavaka, a veye mwana (kuli ya ganaganwa) wa Yosefa, wa Heli,

²⁴ wa Mathati, wa Levi, wa Melchi, wa Tanai, wa Yosefa,

²⁵ wa Matathia, wa Amosi, wa Nahum, wa Esili, wa Nage,

²⁶ wa Maathi, wa Matathia, wa Semeini, wa Yosechi, wa Yuda,

²⁷ wa Yoanani, wa Resa, wa Zerubabeli, wa Shealatieli, wa Neri,

²⁸ wa Melchi, wa Adi, wa Kosamu, wa Elmodama, wa Eri,

²⁹ wa Yosi, wa Eliezeri, wa Jorim, wa Mathati, wa Levi,

³⁰ wa Simeoni, wa Yuda, wa Yosefa, wa Yonamu, wa Eliakim,

³¹ wa Melea, wa Mena, wa Matatha, wa Nathani, wa Daudi,

³² wa Jesse, wa Obed, wa Boaz, wa Salmona, wa Nahashoni,

³³ wa Aminidabu, wa Aram, wa Heziron wa Pereze, wa Yuda,

³⁴ wa Yakobo wa Isaka, wa Abrahamu, wa Tera, wa Nahoru,

³⁵ wa Serugu, wa Reu, wa Pelegu, wa Eberi wa Shela,

³⁶ wa Kainani, wa Aripakishadi, wa Shem, wa Nuhu, wa Lameku,

³⁷ wa Methusala, wa Enoku, wa Jaredu, wa Mahalaleli, wa Kainani,

³⁸ wa Enosh, wa Seth, wa Adamu, wa li wa Nyasaye.