Luka 24 - KITABU KITAKATIFU

¹ Kandi ku lisabato va honga kuli malago. Navutswa ku lidiku lyokutanga lisidza, mabwebwe, va tsia ha kilindwa, ni va hila vya funya mwayu vya va lombi.

² Ni va nyola ligina li gomagominyeywi kutwula ku kilindwa.

³ Kandi vingira mu, si va nyola mubiri gwo Mwami Yesu.

⁴ Lwa va genya yaga, henza, avandu vaviri va singira navo, vivika tsingubo tsing'ereng'anu:

⁵ lwa va tia ni vinaminya mitwe gyavo ni va kupa tsimoni hasi, va va volera, Kigira ki mwinye mwenya mu vakudzi, u veye mwoyo?

⁶ Si a veye hano, navutswa u simuguki: mwidzulitse kuli wa ya mu volera lwa ya li mu Galilaya,

⁷ na a vola, Mwana wa Adamu ga mu dukira kuvikwa mu makono gavoni, nokubambwa, nokusimuguka ku lidiku lyagavaka.

⁸ Kandi vidzulitsa amakuva gege,

⁹ ni va twula ha kilindwa ni virana ni va volera ava li likumi na mulala vindu yivi vyosi, kandi va volera avandi vosi.

¹⁰ Yavo va li Maria Magdalene, na Yoana, na Maria mama wa Yakobo: na vakali avandi halala navo va volera avatumwa vindu yivi.

¹¹ Kandi amakuva yaga ga li kuvo kuli tsimbaka; kandi va vula kugasuuvira.

¹² Navutswa Petro ya singira na a nyagula kuduka ha kilindwa; ni yinama na a henza mu, na a lola tsingubo tsyakatani tsyeng'ine; na a twula kutsia yengo wewe, na a genya vya kolwa.

¹³ Kandi henza ku lidiku zana vaviri kuvo va li ni va tsitsa mu kadala ihale ne Yerusalemi ulugendo lwetsisaa tsiviri, ka langwa Emau.

¹⁴ Ni va volerana avene ku vindu vyosi vya kolwa.

¹⁵ Lwa va vole rana ni va tevana avene, Yesu mwene yisunda himbi na a tsia halala navo.

¹⁶ Navutswa tsimoni tsyavo tsya bofwa va ta mu manya mba.

¹⁷ Naye ya va volera, Amakuva ki ga mu volerana, ni mu genda? Navo va singira va loleka kuli va verera.

¹⁸ Na mulala kuvo wa langwa Kileopa, ya tivula na a mu volera, Ive weng'ine u veye mugeni mu Yerusalemi, kandi u ta manya vindu vi koleywi mu madiku yaga?

¹⁹ Naye ya va volera, Ni vindu ki? Navo va mu volera, Vindu vya li ku Yesu Munazareti, wa li muprofeti wetsingulu tsyokukola netsyokuvola imbiri wa Nyasaye, nembiri wavandu vosi:

²⁰ kandi kuli avasalisi vanene navanene vetu va mu zama mu likalaga lyelikudza, ni va mu bamba.

²¹ Navutswa kwinye kwa suuvira ya li uyu u li honnya Israeli. Kandi halala na yaga, kutwula inyinga vindu yivi vya kolwa lero ikavaka.

²² Kandi avalala ku vakali vowetu va ku gennya, ava kivira ha kilindwa mugamba tsuri;

²³ kandi lwa va vula kulola mubiri gwigwe; vadza ni va vola, va loli tsingelosi va loleka kuvo, ava vola, A veye mwoyo.

²⁴ Kandi avalala ku kwinye va tsia ku kilindwa, ni va ki nyola kuli avakali va voye, navutswa uyu mwene si va mu lola.

²⁵ Kandi ya va volera, O avandu avasiru, avemyoyo midinyu kusuuvira vyosi vyavaprofeti va vola

²⁶ Si bu li bulahi Kristo a saliridzwe vindu yivi vyosi nokwingira mu bukumi bwibwe?

²⁷ Kandi ya tanga kutwula ku Musa noku vaprofeti vosi, na a va vuulira mu mang'oda gosi vindu vya volwa kuye mwene.

²⁸ Navo va duka himbi kadala aka va tsitsa mu: naye ya fwana yenya kuvita.

²⁹ Va mu saala, ni va vola, U gona nekwinye; kigira i veye himbi ku mwama, kandi mbasu gu mali kuvita. Naye yingira na a gona yo.

³⁰ Lwa yikala navo ku vyokulia, ya vugula mulango na a gu gasidza na a megannya na a va ha.

³¹ Tsimoni tsyavo tsya kunulwa, ni va mu manya; ya va gota mu tsimoni tsyavo ni va vula kumulola.

³² Ni va volerana, Myoyo gyetu si gya liaaka mu kwinye lwa ya ku volera ku inzira, na a ku vuulira mang'oda?

³³ Kandi va twula ku isaa zana ni virana Yerusalemi; ni va nyola ava li likumi na mulala ni va vugana halala navandi ava li navo,

³⁴ ni va vola, Mwami u simuguki ligali, u mali kuloleka ku Simoni.

³⁵ Navo va vola vindu vya kolwa ku inzira, kandi kuli wa ya manyekana kuvo ku limegannya lyomulango.

³⁶ Lwa va li ni va vola amakuva yaga, Yesu mwene ya singira hagati havo, na a va volera, Mirembe ku mwinye.

³⁷ Navutswa vegosa lignli, ni va tia, ni va ganagana va lola kigingi.

³⁸ Kandi ya va volera, Kigira ki mu henda mwoyo? Kandi kigira ki ubuhayahayidzi bu duka mu myoyo gyenyu?

³⁹ Mu henze makono gange nevirenge vyange, ni inze mwene: mu mminamine, mu lole; kigira roho si gu veye nomubiri nevigumba, kuli mu lola mbeye navyo.

⁴⁰ Kandi lwa ya mala kuvola yaga, ya va mannya makono gege nevirenge vivye.

⁴¹ Lwa va vula kusuuvira kigira ubuyanzi bwavo, ni va genya, ya va volera, Mu veye nevyokulia hano?

⁴² Ni va mu ha kidonye kyesudzi inyuminyi.

⁴³ Na a ki vugula na a lia imbiri wavo.

⁴⁴ Kandi ya va volera, Yaga namakuva ga nda mu volera, lwa nda li halala nemwinye, Vindu vyosi vya ng'odwa ku inze mu lilaga ya Musa nomu vaprofeti nomu zaburi, vi nigwa vi kolwa.

⁴⁵ Hene yaho ya va kunulira ubugeeri bwavo, va duke kumanya mang'oda;

⁴⁶ ka ndi ya va volera, Ga ng'odwa ndiyo, Kristo a la saliridzwa, nokusimuguka mu vakudzi ku lidiku lya kavaka;

⁴⁷ kandi lilwadzwa mu tsihiri tsyosi, lyeganira nelisameha lyobwoni ku lieta lilye, kutanga mu Yerusalemi.

⁴⁸ Kandi mwinye mu veye avalole kidzi ku vindu yivi.

⁴⁹ Kandi henza, inze ndeta lisuuviridza lya Dada wange ku mwinye: navutswa mu linde mu lidala mu duke kuvikwa tsingulu tsi twula migulu.

⁵⁰ Yimira na a tsia navo kuduka himbi Betani, kandi ya ginga makono gege na a va gasidza.

⁵¹ Lwa ya li na a va gasidza yahuka kuvo, na a hilwa migulu.

⁵² Navo va mu sigamira, ni virana Yerusalemi nobuyanzi ubunene:

⁵³ kandi va li mu litempeli kazozo ni vidzominya Nyasaye.