Luka 18 - KITABU KITAKATIFU

¹ Ya va kupa lugano va duke kulola nu bulahi va saala tsinyinga tsyosi, va ta luha mba;

² ya vola, Mu lidala ha li nomuka lagi, wa vula kutia Nyasaye, kandi si ya heerera avandu.

³ Ha li nomukunzakali mu lidala zana, naye ya hongera kuudza kuye na a vola U nkalagire amakuva gomusigu wange.

⁴ Naye si ya mu kalagira madiku ga duki: navutswa inyima ya vola mu mwoyo gwigwe, kali ni nta tia Nyasaye, kandi ni nta heerera avandu;

⁵ navutswa kigira mukunzakali uyu wa ve kunsinya nda mu kalagira, gase a la nduhidza nelihongera kuudza lilye.

⁶ Mwami ya vola, Mu hulire agomukalagi muganga a vola.

⁷ Kandi Nyasaye si a la kalagira avatovole veve, ava mwanira mbasu nobudiku, navutswa a likudzira kuvo?

⁸ Mmu volera A la va kalagira bwangu. Navutswa Mwana wa Adamu lwa a li duka, a la nyola lisuuvira mu lirova?

⁹ Kandi ya kupira valala avisuuvira ku veye nobulungi ni va lega avandi, lugano yilu:

¹⁰ Avandu vaviri vanegira ni va tsia mu litempeli kusaala; mulala Muiarisayo nowundi musololi wobushutu.

¹¹ Mufarisayo ya singira na yesaala mwene, Nyasaye, nku santidza kigira inze si mbeye kuli avandu avandi, avanyagi, navaganga, navaheyi, kinga kali kuli musololi wobushutu uyu.

¹² Ku lisidza lilala mbonga lilia kaviri; kandi ntwulidza amazaka ku vyosi vya nyola.

¹³ Navutswa musololi wobushutu, ya singira ihale si ya li nomwoyo gu duka kuhenza igulu, navutswa yiduya ku kiritu kikye, na a vola, Nyasaye, u mbere rere inze mwoni.

¹⁴ Mmu volera, Mundu uyu ya sulunguta kutsia hango hehe, na a hebeywi ubulungi kuvita wundi: kigira ku vosi wenenehidza a la gehidzwa; navutswa wegehidza a la nenehidzwa.

¹⁵ Va li ni va mu letera avana vavo a va dire: navutswa avegidzwi veve lwa va lola, va va gaya.

¹⁶ Navutswa Yesu ya va langa vadze kuye, na a vola, Mu leke avana avakekeke vadze ku inze, mu ta va gaya mba: kigira ubwami bwa Nyasaye bu veye bwa va li ndi.

¹⁷ Ligali mmu volera, Ku vosi u ta vugula ubwami bwa Nyasaye kuli mwana mukekeke si a lingira mu, kali hakuzu.

¹⁸ Mundu munene mulala ya mu teva, Mwegidzi Mulahi, nkola ndi nduke kunyola miyandu gwe liva mwoyo li ta hera mba?

¹⁹ Yesu ya mu volera, Kigira ki u nanga mulahi? Si ha li nomulahi, navutswa mulala yeng'ine, Nyasaye.

²⁰ Ive u manya malago; U ta heya mba, U tiita mba, U tiba mba, U ta gina mba, Widzominye dada wowo na mama wowo.

²¹ Naye ya vola, Vindu yivi vyosi nda gumira kutwula bwana boke.

²² Yesu lwa ya hulira yaga, ya mu volera, U daki kindu kilala kalunu: gula vyosi vya u veye navyo, u he avadaka, na ive u la va nekiba migulu: hamba, u nonde.

²³ Navutswa lwa ya hulira vindu yivi, ya verera ligali; kigira ya li mutugi munene ligali.

²⁴ Yesu kva ya mu lola, ya vola, Nu budinyu avaveye nobutugi kwingira mu bwami bua Nyasaye

²⁵ Kigira ing'amia kuvita muluhu gwesindani ni bwangu kuvita mutugi kwingira mu bwami bwa Nyasaye.

²⁶ Navo ava hulira va vola, Ibwaha a nyala kuhonnywa?

²⁷ Navutswa ya vola, Vindu vi ta nyalika ku vandu, vi nyalika ku Nyasaye.

²⁸ Kandi Petro ya vola, Henza, kwinye ku leki vindu vyeh: kukulonda.

²⁹ Naye ya va volera Ligali si ha li nomundu u leki inyumba, kinga mukali, kinga avamwavo, kinga avivuli, kinga avana, kigira ubwami bwa Nyasaye,

³⁰ u li vula kuhebwa kalunu hali kanyingi kuvita, kandi mu inyinga yidzanga liva mwoyo li ta hera mba.

³¹ Kandi ya hila ava li likumi na vaviri haluvega na a va volera, Henzi, kwanegira kutsia Yerusalemi, kandi vindu vyosi vyavaprofeti va ng'odira Mwana wa Adamu vi la kolwa kuye.

³² Kigira a la zamwa mu makono ge Tsihiri, kandi a la kolerwa kihenyahenye, na a kupidzwa kivi, na a tudzirwa amate:

³³ kandi va la mu kuya na va mwiite: kandi ku lidiku li kola gavaka a la simuguka.

³⁴ Navo si va hulira vindu yivi; livola yili lya viswa, kandi si va manya vindu vya volwa.

³⁵ Lwa ya duka himbi Yeriko, mundu mulala muboku yikala ku luginga lwenzira na a saava.

³⁶ Lwa ya hulira kiduma ki vita, ya teva ni kindu ki?

³⁷ Navo va mu volera Yesu Munazareti u vita.

³⁸ Naye ya hanzuka, na a vola, Yesu, mwana wa Daudi, u mbererere.

³⁹ Navo avimira va mu gaya, a kiring'ane: navutswa ya kira ligali kuhanzuka, Ive, mwana wa Daudi, u mbererere.

⁴⁰ Yesu ya singira na a haana munwa a letwe kuye: lwa ya duka himbi, ya mu teva,

⁴¹ Wenya nku kolere ki? Naye ya vola, Mwami, nyenya nduke kunyola lilola lyange.

⁴² Kandi Yesu ya mu volera, U duke kulola: lisuuvira lilyo li ku honnyi.

⁴³ Nonoho ya nyola lilola lilye, na a mu londa, ni yidzominya Nyasaye: kandi avandu vosi, lwa va lola ndiyo, vidzominya Nyasaye.