Luka 17 - KITABU KITAKATIFU

¹ Ma ya volera avegidzwi veve, Ubwiyangu bwelikigitala si bu nyala kuvula kuudza, navutswa ubudamano bu veye ku uyu wa bu leta

² Nu bulahi ku uyu na a vikwa lugina mu ligoti lilye, na a tebwa mu inyanza, kuvita ni yikigitalidza mulala ku yava avakekeke.

³ Mwelinde mwinye avene: amwavo wowo ni yona ku ive, u mu gaye; naye ni yeganira, u mu samehe.

⁴ Kandi na a kwona hali katanu na kaviri ku lidiku lilala, kandi ni yirana hali katanu nakaviri, na a vola, Nzeganiye; u mu samehe.

⁵ Avatumwa va volera Mwami, U ku mede lisuuvira lyetu.

⁶ Mwami ya va volera, Ni mu veye nelisuuvira li leng'ana nolugutsa lwelisatsi, nkano mu volera mukuyu yigu, Kunyuka hano u simikwe mu inyanza; nagwo nkano gwa ka mu hulira.

⁷ Navutswa u li ha ku mwinye, u veye nomutugwa u lima neligembe lyetsing'ombe, kinga waya magondi, a la nyala kumuvolera lwa yinuka, Ha mba, nonoho wikale u lie?

⁸ Navutswa a la mu volera, U nombere vyokulia, ndie, kandi webohe u mbereridze, nduke kulia nokunwa; lwanyima ive kandi u la lia kandi u la nwa?

⁹ A volera mutugwa uyo, yee ndiyo, kigira ya kola kuli ya volerwa?

¹⁰ Kandi mwinye ndiyo, lwa mu li mala kukola vindu vyosi vya mu volerwa, mu vole, Kwinye ku veye avatugwa ava ta kola vyambeti; kigira ku koli vutswa vya ku dukira kukola.

¹¹ Lwa va li ku inzira yokutsia Yerusalemi, ya vitira hagati ha Samaria ne Galilaya.

¹² Lwa yenya kwingira mu kadala kalala, ya vugana na vandu likumi avagere, va singira ihale:

¹³ ni va hanzuka, ni va vola, Yesu, Mwami, u ku vererere.

¹⁴ Lwa ya va lola ya va volera, Mu tsie kwemannya ku vasalisi. Kuna ngwa lwa va li ku inzira va takaswa.

¹⁵ Mulala kuvo, lwa ya lola na a takaseywi, yirana, ni yidzominya Nyasaye nomwoyo munene;

¹⁶ yadza na a gwa mammama ha virenge vivye, na a mu santidza: kandi ya li Musamaria.

¹⁷ Yesu ya tivula na a vola, Si va takaseywi vosi likumi? Navutswa avatanu na vane va veye ha li ki?

¹⁸ Si ha veye navandi virana kuha Nyasaye ubukumi, navutswa mugeni uyu?

¹⁹ Kandi ya mu volera, Vuka, u tsie: lisuuvira lilyo li ku honnyi.

²⁰ Vafarisayo, lwa va mu teva inyinga yobwami bwa Nyasaye bu la duka, ya va tivulira na a vola, Ubwami bwa Nyasaye si budza nobuloleki:

²¹ kandi si va li vola, Henza hano kinga, Ira kigira ubwami bwa Nyasaye bu veye hagati henyu.

²² Kandi ya volera avegidzwi veve, Amadiku ga ladza lwa mu lenya kulola lidiku lilala ku madiku go Mwana wa Adamu, si mu li li lola.

²³ Kandi va la mu volera, Henza, ira Henza, hano mu ta twula ha mu veye, kandi mu ta londa:

²⁴ kigira kuli luheni lu hema ha luvega lulala hasi heligulu, ma lu tsia kuduka ha luvega lundi hasi heligulu; ni ndiyo Mwanz wa Adamu a li va ku lidiku lilye lyokuudza.

²⁵ Navutswa agembiri ga mu dukira kugwi rwa vindu vinyingi, nokwambakanwa nelikula yili.

²⁶ Kuli mu madiku ga Nuhu, kandi ga la va ndiyo mu madiku go Mwana wa Adamu.

²⁷ Va lia, ni va nwa, ni va kwa ni va sererwa, kuduka ku lidiku lya Nuhu yingira mu bwato, namadzi manene gadza ni ga va hila vosi.

²⁸ Kandi kuli mu madiku ga Loti; va lia, ni va nwa, ni va gula, ni va gamannya, ni va taga, ni vombaka;

²⁹ navutswa ku lidiku lya Loti ya twula mu Sodoma ya kupa imbula yo muliru neyekibiridi ya twula migulu, na ya mala vosi.

³⁰ Kandi ga la va ndiyo mu madiku go Mwana wa Adamu lwa a li lolekidzwa.

³¹ Ku lidiku yilyo, u li va ku inyumba igulu nevindu vivye vi veye mu inyumba, a tika mba kuvivugula: kanoi uyu u li va mu mulimi a tirana.

³² Mwidzulitse mka Loti.

³³ Kuvo vosi wenya kuhonnya liva mwoyo lilye a la li gotidza: navutswa u li li gotidza a la li honnya.

³⁴ Inze mmu volera, Ku budiku yibwo vaviri va la va ku kitali kilala; mulala a la vugulwa, nowundi a la lekwa.

³⁵ Vaviri va la sia halala; mulala a la vugulwa, nowundi a la lekwa.

³⁶ Vaviri va la va mmulimi, mulala a la vugulwa, na wundi a la lekwa.

³⁷ Navo va tivula ni va mu volera, Ha li ha, Mwami? Kandi ya va volera, homubiri gu veye tsisote tsi la vuganira ho.