Luka 16 - KITABU KITAKATIFU

¹ Naye ya volera avegidzwi veve kandi, Ya li ho mutugi mulala wa li nomulindi wewe; va mu ninira kidagi kuye, a salannya vindu vivye.

² Ya mu langa na a mu volera, Amakuva ki ga mbulira ku ive? Tivula hesabu yobulindi bubwo; kigira ive si u nyala kandi kuva mulindi.

³ Mulindi ya vola mu mwoyo gwigwe, Nda kola ndi, kigira mwami wange a ntwulidza mu bulindi? Si mbeye netsingulu kulima; kusaava ivindu mbeye isoni.

⁴ Mmanya ga ndi kola, lwa ntwulidzwa mu bulindi, va duke kunyingiridza mu tsinyumba tsyavo.

⁵ Ya langa avamagovi vomwami wewe vosi, na a volera wambiri, U veye neligovi ki lyomwami wange?

⁶ Naye ya vola, Vigero mia vyamaguta. Naye ya mu volera. Vugula ibaruwa yoyo wikale bwangu u ng'ode amakumi gatanu.

⁷ Kandi ya volera wundi, Ive u veye neligovi ki? Naye ya vola, Imigero mia gyengano. Ya mu volera, Vugula ibaruwa yoyo u ng'ode amakumi gatanu na gavaka.

⁸ Mwami wewe yidzominya mulindi muganga, kigira ya kola nobugeeri: kigira avana avomulirova ku likula lyavo va veye nobugeeri kuvita avana avobulavu.

⁹ Na inze mmu volera, Mwekolere avalina ku butugi bu ganga; lwa bu li yoneka, va la ka mwingiridze mu bugono bu ta hera mba.

¹⁰ U veye nelisuuvirwa ku vikekeke ligali, kandi a veye nelisuuvirwa ku vinene: kandi u veye muganga ku vikekeke a veye muganga ku vinene.

¹¹ Kunangwa mwinye ni mu ta li nelisuuvirwa ku butugi bu ganga, ibwaha u li mu ha ubutugi bweligali?

¹² Kandi ni mu ta li nelisuuvirwa ku vindu vyavene, ibwaha u li mu ha vyenyu?

¹³ Si ha li nomutugwa womu inyumba u nyala kutumekira avami vaviri: kigira a la dunyira mulala, nowundi a la mu yanza; kinga a la hambana nomulala, nowundi a la mu lega. Si mu nyala kutumekira Nyasaye nobutugi.

¹⁴ Kandi Avafarisayo ava veye avayanza ubutugi, va hulira vindu yivi vyosi; ni va mu kolera kihenyahenye.

¹⁵ Naye ya va volera, Mwinye mu veye avehedza ubulungi imbiri wavandu; navutswa Nyasaye a manya myoyo gyenyu: kigira kya vandu vidzominya ki veye kidamano ligali imbiri wa Nyasaye.

¹⁶ Lilaga navaprofeti va li ho kuduka inyinga ya Yohana: kutwula inyinga yeyo ivangeli yobwami bwa Nyasaye yilwadzwa, navandu vosi vingira mu netsingulu.

¹⁷ Livita lyeligulu nelyelirova ni lyangu, kuvita livita lyenduguta indala ye lilaga.

¹⁸ Kuvo vosi u kunga mukali wewe na a leta wundi a kola ubuheyi: naye u leta uyu wa kungwa ku musatsa a kola ubuheyi.

¹⁹ Ha li nomutugi mulala, kandi yivika ingubo yekiforosadi na ya katani indahi, na a menya mu lisangala kazozo.

²⁰ Kandi mudaka mulala wa langwa Lazaro wa vikwa ha kiribwa kikye, wa li netsinkwagu tsinyingi,

²¹ ni yenya kwiguta vi donye vya twula ku imeza yomutugi; yee, kandi kali tsimbwa tsyadza ni tsi mena ku tsinkwagu tsitsye.

²² Mudaka ya kudza, ne tsingelosi va mu ginga ni va mu hila mu kiritu kya Abrahamu. Kandi mutugi ya kudza na a tebwa.

²³ Kandi mu kihadisi ya li mu lisaliridza ya kunula tsimoni tsitsye na a lola Abrahamu ihale, na Lazaro mu kiritu kikye.

²⁴ Ya hanzuka na a vola, Dada Abrahamu, u mbererere, u tume Lazaro, a duke kudira isonga yekidete kikye mu madzi a kindidze lulimi lwange; kigira nsalira mu lumemo yilu.

²⁵ Navutswa Abrahamu ya vola, Mwana wange, widzulitsa ive wa nyola vilahi lwa wa li mwoyo mu lirova, na Lazaro ya nyola vidamano: navutswa kalunu uyu u sosidzeywi hano, na ive u salira ligali.

²⁶ Kandi kuvita yaga, hagati hetu ni mwinye luhongo lunene lu vikeywi ho, avenya kutwula hano kutsia wenyu si va nyala, navo venya kutwula wenyu si va nyala kwambuka hano.

²⁷ Kandi ya vola, Kigira yaga, nku saala, dada, u mu tume hango ha dada wange;

²⁸ kigira mbeye navamitu vatanu; a duke kuvavolera, gase va la duka hokusa lira hano.

²⁹ Navutswa Abrahamu ya vola, Va veye na Musa navapro feti; va va hulire.

³⁰ Naye ya vola, Auwa, dada Abrahamu: navutswa mundu na a twula mu vakudzi na a tsia kuvo va leganira.

³¹ Naye ya mu volera, Ni va ta hulira Musa navaprofeti, kandi si va nyala kuhulira amakuva gomundu u twula mu vakudzi.