Luka 15 - KITABU KITAKATIFU

¹ Avasolola ubushutu navoni vosi va li ni visunda kuye va duke kumuhulira.

² Vafarisayo navang'odi vosi va monya, ni va vola, Mundu uyu a yanza avoni, kandi a lia halala navo.

³ Ya va kupa lugano yilu, na a vola,

⁴ Ibwaha ku mwinye wama gondi mia, neligondi lilala kugo ni li gota, si a leka amakumi gatanu na gane namagondi gatanu na gane mwigendanyama, a tsie kwenya li goti, a luhe a duke kulinyola?

⁵ Lwa a mali kulinyola, a li gingira ku mavega nobuyanzi.

⁶ Kandi lwa a duka hango hehe, a langa avalina veve navatende veve, na a va volera, Mu sangale halala na inze, kigira nyoye ligondi lyange lya gota.

⁷ Mmu volera, Bu la ka ve ubuyanzi ndiyo migulu, kigira mundu mulala mwoni weganira, kuvita bwa vandu avalungi amakumi gatanu na gane navandu vatanu na vane ava ta li nobudaka bwelyeganira.

⁸ Kinga ha veye nomukali ki wetsishilling likumi, neshilling indala ni i gota, si a hambidza itaya, ni yeya inyumba ni yenya budinyu a luhe a duke kuginyola?

⁹ Lwa a mala kuginyola, a vungidza avalina veve navatende veve, na a vola, Mu sangale halala ninze, kigira nyoye ishilling yange ya gota.

¹⁰ Kandi ndiyo mmu volera, Bu veye ho ubuyanzi imbiri wetsingelosi va Nyasaye kigira mwoni mulala weganira.

¹¹ Ya vola, Mundu mulala ya li navana vayai vaviri:

¹² mkeku ya volera ise, Dada, u ngavukanyire ubu tugi kuli bu ngwira. Naye ya va gavulira ubutugi bwibwe.

¹³ Inyima yamadiku ga ta li manyingi, mke ya vungidza vyosi na a tsia lugendo mu kivala kyehale, na a salannyira yo ubutugi bwibwe mu liva lidamano.

¹⁴ Lwa ya mala kutunga vyosi, inzala inene ya duka mu kivala zana; naye ya tanga kudaka vindu.

¹⁵ Ya tsia kuhanda ku mundu mulala wehivala yekyo; naye ya mu tu ma mu mulimi kwaya tsimpidzl.

¹⁶ Naye ya kayirwa kwiguta amagodo getsimpidzi tsya litsanga, navutswa si ha li nomundu wa mu ha kindu.

¹⁷ Lwa ya duka kwimanya, ya vola, Avatumiki va dada wange ivanga va veye nobukima bwokwiguta kandi bu tigala na inze inzala i nziitira hano

¹⁸ Nda twula ntsie ku dada, kandi nda mu volere, Dada, nda yona ku ligulu nembiri wowo:

¹⁹ si ndukana kulangwa kandi mwa na wowo: u nombe mbe kuli mulala ku vayinziri vovo.

²⁰ Ya twula na a tsia ku ise. Navutswa lwa ya li na a kikiri hale, ise ya mu lola na a mu vererera, na a nyagula na a mu kumberera mu ligoti, na a mu busabusa.

²¹ Kandi mwana ya mu volera, Dada, nda yona ku ligulu nembiri wowo: si ndukana kandi kulangwa mwana wowo.

²² Navutswa ise ya volera avatugwa veve, Mu tsie bwangu kuleta ingubo indahi kuvita tsyosi, mu mu vike; kandi mu mu vike imingiri ku kidete kikye, nevilatu ku virenge vivye:

²³ kandi mu lete kimoli kinetu, mwiite, ku lie, ku sangale:

²⁴ kigira mwana uyu ya li ya kudza, a veye mwoyo kandi; kandi ya li ya gota, u nyoleki. Navo va tanga kusangala.

²⁵ Mwana wewe munene ya li mu mulimi: lwa ya li ni yadza kuduka himbi nenyumba, ya hulira isango nobukino.

²⁶ Naye ya langa mulala ku vatumekiri veve na a mu teva, ni vindu ki vindu yivi?

²⁷ Naye ya mu volera, Amwavo wowo udzi; na dada wowo u mwiitiye kimoli kinetu, kigira ya mu nyola mulahi nomulamu.

²⁸ Navutswa ya vihirirwa na a sula kwingira mu: na ise ya tsia kuye kyova, na a mu goonya.

²⁹ Navutswa ya tivula, na a volera ise, Henza, imihiga yigyi minyingi inze nku tumekira, nkikiri kwona munwa gugwo; na ive si u mbedza kali kimene, nduke kusangala navalina vange:

³⁰ navutswa uyu mwana wowo wa lia halala navaheyi vindu vivyo lwa yadzi, u mwiitiye kimoli kinetu.

³¹ Naye ya mu volera, Mwana wange, ive u vedza halala na inze kazozo, navyo vyosi vi veye vyange vi veye kandi vivyo.

³² Navutswa nu bulahi ku kole isango kandi ku yanze; kigira uyu amwavo wowo ya li ya kudza, a veye mwoyo; kandi ya li ya gota, u nyoleki.