Luka 13 - KITABU KITAKATIFU

¹ Inyinga zana va li ho avalala ava mu volera amakuva ga Vagalilaya ava Pilatu ya tsukannya amasahi gavo netsisadaka tsyavo.

² Naye ya tivula na a va volera, Mu ganagana Vagalilaya yava va li avoni kuvita Avagalilaya avandi, kigira va kupidzwa kivi yiki?

³ Inze mmu volera, Si ga li ndiyo: navutswa ni mu teganira, mwinye vosi mu la kudza ndiyo.

⁴ Naho yavo likumi na vatanu na vavaka avomnara gwa gwira mu Siloam ni gu viita, mu ganagana va li avekivihiri kuvita avandi vosi ava menya Yerusalemi?

⁵ Inze mmu volera, Si ga li ndiyo: navutswa ni mu teganira, mwinye vosi mu la kudza ndiyo.

⁶ Kandi ya kupa lugano yilu. Mundu mulala ya li nomusala mukuyu gwa simikwa mu mulimi gwigwe; yadza ni yenya makuyu kugwo, si ya nyola.

⁷ Naye ya volera mulindi wemizabibu, Henza imihiga yigyi gyivaka ntsitsa kwenya makuyu ku mukuyu yigu, si nyola kindu: u gu teme; kigira ki gwono nnya marova?

⁸ Naye ya tivula na a mu volera, Mwami, leka gu ve muhiga guno kandi, nduke kugusemberera nokuvika ku amavululi.

⁹ Ni gwama makuyu kutwula inyinga yeyo, nu bulahi; navutswa ni gu tama, u la gu tema.

¹⁰ Ya li ni yegidza mu lisomero lilala lyavo ku lidiku lyelisabato.

¹¹ Henza, mukali mulala ya li ho wa li na roho gwelidekerana imihiga likumi na gyitanu na gyivaka; naye yilinga, si ya nyala kudiguluka kali hakuzu.

¹² Yesu lwa ya mu lola, ya mu langa, na a mu volera, Mukali, u bohololwi kutwula mu budekeranu bubwo.

¹³ Kandi ya vika makono gege kuye, na nonoho ya digululwa, ni yidzominya Nyasaye.

¹⁴ Na munene welivugana ya vihirirwa kigira Yesu ya honnya ku lisabato, na a tivula na a volera kiduma, Ga veye amadiku gatanu na lilala agavandu va nyala kukola mu miyinzi: mudze kuhonnywa mu yago, mu tadza ku lidiku lyelisabato.

¹⁵ Navutswa Mwami ya mu tivulira na a vola, Mwinye avagadi, Ku mwinye sa mulala si mu boholola ing'ombe yenyu kinga isukiri yenyu kutwula mu kego, mu tsia kuginwehidza ku lidiku lyelisabato?

¹⁶ Si bu li bulahi mukali uyu, mukana wa Abrahamu, wa Setani ya boha imihiga likumi na gyitanu na gyivaka yigyi, a bohololwe libofwa yili ku lidiku lyelisabato?

¹⁷ Lwa ya vola vindu yivi tsisoni tsya gumira avahangalidzi veve vosi: kandi kiduma kyosi kya sangala ku vindu vyobukumi vya ya kola.

¹⁸ Kunangwa ya vola, Ubwami bwa Nyasaye bu fwanana naki? Kandi nda bu fwanannya naki?

¹⁹ Bu fwanana nolugutsa lwelisatsi lwomundu ya vugula na a taga mu mulimi gwigwe; lwa viruka ni lu gwa musala; kandi amanyonyi gegulu ga menya ku tsisya tsyago.

²⁰ Kandi ya vola, Nda fwanannya naki ubwami bwa Nyasaye?

²¹ Bu fwanana na mamera agomukali ya vugula na a visa mu migero gyivaka gyobusie, bwa luha bwa duka kuva mamera bwosi.

²² Ya tsia na a vita mu madala nomu tudala, ni yegidza na a tsia Yerusalemi.

²³ Mundu mulala ya mu teva, Mwami, va gehi ava honnywa? Naye ya va volera,

²⁴ Mu dinye kwingira mu kiliango kinye rere: kigira inze mmu volera, Vanyingi va lenya kwingira navutswa si va li nyala mba.

²⁵ Mwene inyumba lwa a singira kuhana kiliango, mwi nye mu tanga kusingira kyova nokwigulihidza, nokuvola, Mwami u kwigulire. Naye a la tivula na a mu volera, Si mmu manya wa mu twula.

²⁶ Hene yaho mu la tanga kuvola, Kwinye kwa lia ni ku nwa imbiri wowo, kandi ive wegidza ku tsinzira tsyetu.

²⁷ Naye a la vola, Mmu volera, si mmu manya wa mu twula; mu twule hano, mwinye, ava kola ubudamano.

²⁸ Li la va lilira nokudyedyeidza amino, lwa mu li lola Abrahamu, na Isaka, na Yakobo, navaprofeti vosi mu bwami bwa Nyasaye, na mwinye avene mu tebeywi kyova.

²⁹ Va la twula ivugwe nemadioli, na kasikasini na kusini, va ladza kwikala mu bwami bwa Nyasaye.

³⁰ Kandi henza, va ve yo avandu venyima va la ka ve vembiri, kandi avembiri va la va venyima.

³¹ Inyinga zana yeyo Vafarisayo valala va tsia kuye, ni va mu volera, Twula hano, u tsie ahandi, kigira Herodi yenya kukwiita.

³² Ya va volera, Mu tsie kuvolera kinywere yikyo, Henza, ntwulidza amademone nokukola ubuhonnyi lero na mugamba, nogundi mugamba nda malilidzwa.

³³ Navutswa lero no mugamba nogundi mugamba ga ndu kira kugenda: kigira si ga nyalika muprofeti a kudze na a ta li mu Yerusalemi.

³⁴ O Yerusalemi, Yerusalemi, ive wiitanga avaprofeti nokulasa magina ava tumwa ku ive tsinyinga tsyanga ndenya kuvungidza avana venyu kuli inyavuli i vungidza viminyo vyayo mu tsimbaha tsya yo, navutswa mwinye si mwenya

³⁵ Henza, inyumba yenyu i lekeywi ku mwinye, yoneki: kandi inze mmu volera, Si mu li ndola kandi, mu luhe mu duke kuvola, A veye nobugasu yadza ku lieta lyo Mwami.