Luka 10 - KITABU KITAKATIFU

¹ Inyima ya yaga, Mwami ya tovola avandi amakumi gatanu na gaviri, na a va tuma se vaviri imbiri wewe, mu madala gosi na hosi ha yenya kutsia mwene.

² Kandi ya va volera, Ligesa li veye linene, navutswa avayinziri va gehi: kigira yaga mwinye mu saale Mwami weli gesa a lete avayinziri va tsie mu ligesa lilye.

³ Mu tsie; henza, mmu tuma kuli avana vamagondi mu visalang'ongo.

⁴ Mu ta vugula musigo, kinga imuya, kinga vilatu; kandi mu ta chelidza mundu kali mulala ku inzira.

⁵ Kandi ku tsi nyumba tsyosi ya mu lingira mu, mu tange kuvola, Mirembe gyi ve mu inyumba yiyi.

⁶ Mwana wemirembe na a va mu, mirembe gyenyu gyi la va kuye: navutswa na a ta ve mu, gyi lirana ku mwinye.

⁷ Kandi mu menye mu inyumba zana, ni mu lia ni mu nwa vya va mu ha: kigira muyinziri u dukani namadanyi gege. Mu ta voyavoya.

⁸ Ku madala gosi ga mu lingira mu, ni va mwingiridza, mu lie vyokulia vya va mmegera:

⁹ kandi mu honnye avalwaye ava veye mu, kandi mu va volere, Ubwami bwa Nyasaye bwisundi himbi ku mwinye.

¹⁰ Navutswa ku madala gosi lya mu lingira mu ni va ta mwingiridza, mu twub mu tsie ku tsinzira tsyago, mu vole,

¹¹ Kali lugukyi lwelidala lyenyu lu handi ku virenge vyetu ku mweyera: navutswa mu manye yaga, Ubwami bwa Nyasaye bwisundi himbi.

¹² Mmu volera, Bulahi bwa Sodoma ku lidiku yilyo bu la vita bwelidala yilyo.

¹³ U la lola ubudamano, ive Korazin U la, lola ubudamano, ive Betsaida kigira miyinzi gyetsingulu gya kolwa mu mwinye, gyi va gya kolwa mu Turo na Sidone nkano veganira kale, ni vivika magunia ni vikala mu ligoke.

¹⁴ Navutswa bu la va bulahi ku Turo na Sidone mu likalaga kuvita ubwenyu.

¹⁵ Nive, Kapernaume, u lidzominywa ku duka mu ligulu? U likidzwa kuduka mu kihadisi.

¹⁶ U hulira mwinye, a hulira inze; kandi u sula mwinye, a sula inze; kandi u sula inze, a sula wa ntuma.

¹⁷ Ava li amakumi gatanu na gaviri virana nobuyanzi, ni va vola, Mwami, kali amademone ga li ku kwegehidzira ku lieta lilyo.

¹⁸ Naye ya va volera, Nda lola Setani na a gwa kutwula migulu kuli uluheni.

¹⁹ Henza, mmali kumuha tsingulu kuduvaga tsinzoka neng'e, kandi ku tsingulu tsyosi tsyomusigu: kandi si ha li nekindu ki li mwononnya kali hakuzu.

²⁰ Navutswa mu ta yanza kigira roho gyegehidza ku mwinye, navutswa mu yanze kigira ameta genyu ga ng'odeywi migulu.

²¹ Inyinga zana ya yanza ligala mu Roho Mutakatifu, na a vola, Nkwidzominya ligali, Dada, Mwami weligulu nelirova, kigira wa visa ivindu yivi ku vageeri navahuliri, navutswa u vuuliye avana vadoto: yee, Dada; kigira u yanza ndiyo.

²² Dada wange ya mba vindu vyosi: kandi si ha li nomundu u manya Mwana ni bwaha, navutswa Dada; kandi Dada ni bwaha, navutswa Mwana, naye wo Mwana u yanza kumuvuulira.

²³ Kandi ya girunkana ku vegidzwi, na a vola makiriri, Tsi veye nobugasu tsimoni tsi lolanga vindu vya mu lola:

²⁴ kigira mmu volera, Avaprofeti vanyingi navami venya kulola vindu vya mu lola, si va vi lola; kandi kuhulira vindu vya mu hulira, si va vi hulira.

²⁵ Kandi henza mwegidzi weliIaga mulala ya singira na a mu geridza, na a vola, Mwegidzi, nda kola ki kunyola liva mwoyo li ta hera mba?

²⁶ Naye ya mu volera, Ga ng'odwa ndi mu lilaga? U soma ndi?

²⁷ Naye ya tivula na a vola, U yanze Mwami Nyasaye wowo nomwoyo gugwo gwosi, na roho gugwo gwosi, netsingulu tsitsyo tsyosi nobugeeri bubwo bwosi; kandi u yanze mutende wowo kuli wiyanza.

²⁸ Naye ya mu volera, U tivuye bulahi: u kole ndiyo u la va mwoyo.

²⁹ Navutswa uyu yenya kweha ubulungi ya volera Yesu, Kandi mutende wange ni bwaha?

³⁰ Yesu ya tivula na a vola, Mundu mulala ya twula Yerusalemi kusulunguta Yeriko; kandi ya gwa hagati ha vanuuli; va mu twulidza tsingubo ni va mu kindukidza, ni va tsia, ni va mu leka, ni yenya kukudza.

³¹ Musalisi mulala ya manya ya sulunguta ku inzira yeyo: lwa ya mu lola ya vitira ha luvega.

³² Kandi ndiyo Mulevi yadza, lwa ya duka ha zana, ya mu lola na a vitira ha luvega.

³³ Navutswa Musamaria mulala, mu lugendo lwilwe, ya duka ha ya li: kandi lwa ya mu lola, ya mu vera tsimbabasi.

³⁴ Yisunda himbi na a tsia kuboha ubukinduki bwibwe, na a tsuka ku maguta newaini; kandi ya mu nyinnya ku isukiri yeye, na a mu hila mu inyumba yavageni, na a mu lwalidza.

³⁵ Mugamba ya twulidza tsishilling tsiviri na a ha mwene inyumba, na a vola, U mu lwalidze; kandi tsya u meda tsi sira, inze lwa ndirana nda ka ku tunge.

³⁶ Ku yava vavaka u li ha wa u lola kuva mutende wa uyu wa gwa hagati ha vanuuli?

³⁷ Naye ya vola, Uyu wa mu vera tsimbabasi. Yesu ya mu volera, Ive u tsie kukola ndiyo.

³⁸ Lwa va genda ku inzira yavo, yingira mu kadala kalala: kandi mukali mulala wa langwa Marita ya mwingiridza mu inyumba yeye.

³⁹ Kandi ya li namwavo wa langwa Maria ya li ni yikaye ha virenge vyo Mwami, na a hulira likuva lilye.

⁴⁰ Navutswa Marita ya nyankana mu butumiki bwibwe bunene; kandi yadza kuye na a vola, Mwami, si u verera kigira amwavo wange u ndeki kutumika tsyeng'ine? U mu volere a nkonye.

⁴¹ Navutswa Mwami ya tivula na a mu volera, Marita, Marita, u nyankana nokudidikana ku vindu vinyingi:

⁴² navutswa kindu kilala kyeng'ine ki duki: kigira Maria u mali kutovola kindu kilahi, kya a li vula kunyagwa.