Luka 1 - KITABU KITAKATIFU

¹ Kigira vanyingi va gumira miyinzi gyokung'oda amakuva gevindu vya kolwa mu kwinye,

² kuli va ku volera yavo ava li avaloli navatumekiri velikuva kutwula litanga,

³ kandi inze, kigira mmali kwelolera vyosi ligali kutwula ha litanga lyavyo, fwana nu bulahi nku ng'odera vindu vyosi kuli vi veye, Ive Theofilo mulahi;

⁴ ive u duke kumanya ubulungi bwevindu vya wegidzwa.

⁵ Mu madiku ga Herodi, mwami wa Buyuda, ha li nomusalisi mulala wa langwa Zekaria ku vatovoka va Abija: ya li nomukali ku vakana va Haruni, lieta lilye lya langwa Elisabeti.

⁶ Navo vombi va li ava lungi imbiri wa Nyasaye, ni va gendera mu makuva gosi nomu malago go Mwami bugira kindu kuvo.

⁷ Si va li nomwana, kigira Elisabeti ya li mugumba, navo vombi va duka mihiga minyingi.

⁸ Lwa ya li na a kola miyinzi gyobusalisi imbiri wa Nyasaye mu bulohidzi bwelitovoka lilye,

⁹ kuli miima gyobusalisi, ikura ya mu gwira yokwingira mu litempeli lyo Mwami a sambe kimuli.

¹⁰ Kya li ho kiduma kyosi kyavandu va saala kyova inyinga yokusamba kimuli.

¹¹ Ingelosi wo Mwami ya loleka kuye u singiye ku luvega lwomukono mulungi gwo bwali bwe kimuli.

¹² Zekaria lwa ya mu lola, ya genya na a tia.

¹³ Navutswa ingelosi ya mu volera, U ta tia, Zekaria: kigira lisaala lilyo li huleywi, kandi mukali wowo Elisabeti a la kwivulira mwana muyai, lieta lilye, u la mu gulika Yohana.

¹⁴ U la ka ve nobuyanzi nobusangali, kandi vanyingi va la sangala ku livulwa lilye.

¹⁵ Kigira a la va munene imbiri wo Mwami, si a li nwa iwaini namalwa mba; a lizula Roho Mtaka tifu, kutwula munda mwa mama wewe.

¹⁶ Avanyingi ku vana va Israeli a la va girunkannya a va yekidze ku Mwami Nyasaye wowo.

¹⁷ A limira imbiri wewe mu mwoyo nomu tsingulu tsya Elija, a giru nkannye myoyo gyavadada ku vana, kandi a vike avatingu mu bugeeri bwavalungi; kutegekera Mwami ava ndu avalombwa.

¹⁸ Zekaria ya volera ingelosi, Inze nda manyira ndi yaga? Kigira inze mbeye musakulu, nomukali wange wa gwa mukeere.

¹⁹ Ingelosi ya tivula na a mu volera, Inze mbeye Gabirieli u singiranga imbiri wa Nyasaye; ntumeywi kuvolerana nive nokukuletera amakuva malahi yaga.

²⁰ Henza, ive u la va idimbidi, si u li nyala kuvola, kuduka ku lidiku lya yaga ga li kolwa, kigira si wa suuvira amakuva gange, aga li kolwa inyinga yago.

²¹ Na vandu va lindirira Zekaria ni va genya lilindagira lilye mu litempeli.

²² Naye lwa ya twula si a nyala kuvolerana navo; ni va manya u loli lilola mu litempeli: naye ya va simasima na a menya idimbidi.

²³ Lwa, ya mala madiku gege gobutumiki bwibwe, ya tsia yengo wewe.

²⁴ Inyima wa madiku yago, Elisabeti mukali wewe ya vereka; ni yivisa imyeli gyitanu, na a vola,

²⁵ Mwami a nkoleye ndiyo mu madiku ga ya mbenzera kuntwulidzira tsisoni tsyange imbiri wavandu.

²⁶ Mu mweli gwa kola gyitanu na mulala ingelosi Gabirieli ya tumwa kutwula wa Nyasaye kutsia mu lidala lye Galilaya, lya iangwa Nazareti,

²⁷ ku mkana mugima wa kwebwa nomusatsa wa langwa Yosefa, mundu wenyumba ya Daudi; lieta lyomukana mugima lya langwa Maria

²⁸ Yingira na a tsia kuye na a vola Mirembe, ive u vereywi tsimbabas ligali, Mwami a veye halala nive

²⁹ Navutswa ya tia munonono ku livola lilye, na a ganagana mu mwoyo lichelidza yili li veye ndi.

³⁰ Kandi ingelosi ya mu volera, U ta tia, Maria kigira Nyasaye u ku vereye tsimba basi.

³¹ Henza, ive u la vereka, u livula mwana muyai, u li mu gulika lieta lilye YESU.

³² A la ka ve munene, kandi a la ka langwe Mwana wa Uveye Igulu Ligali: kandi Mwami Nyasaye a la ka mu he kisako kya guga wewe Daudi:

³³ a lameha ku avenyumba ya Yakobo imihiga nemi higa; ubwami bwibwe si bu li va nekiheri mba.

³⁴ Maria ya volera ingelosi, Ga la va ndi yaga, ninze si mmanya musatsa?

³⁵ Ingelosi ya tivula, na a mu volera, Roho Muta katifu a ladza ku ive, netsingulu tsya Uveye Igulu Ligali tsi la ku kinga kigira yaga Kitakatifu yikyo ki livulwa ku ive ki la langwa Mwana wa Nyasaye.

³⁶ Kandi henza, Elisa beti mwiko wowo u mali kuvereka mwana muyai mu bukeere bwibwe yigu nu mweli gwigwe gu kola gyitanu na mulala gwa uyu u langwa mugu mba.

³⁷ Kigira ku Nyasaye si ki li ho kindu ki ta nyalika.

³⁸ Maria ya vola, Henza, inze mbeye mwana mkana mutugwa wo Mwami; ga ve ku inze kuli aga u vola. Ingelosi ya twula kuye.

³⁹ Mu madiku yago Maria ya singira na a tsia bwangu mu kivala kyevigulu, mu lidala lye Buyuda;

⁴⁰ ni yingira mu inyumba ya Zekaria na a chelidza Elisabeti;

⁴¹ Elisabeti lwa ya hulira lichelidza lya Maria, mwana ya kina munda mwimwe Elisabeti yizula Roho Mutakatifu,

⁴² na a hanzuka nomwoyo munene, na a vola, U veye nobugasu ku vakali, kandi a veye nobugasu wa ive u livula.

⁴³ Inze nda nyola ha li ha likuva yili, mama wo Mwami wange yadza ku inze?

⁴⁴ Kigira henza, mwoyo gwelichelidza lilyo lwa gu duka mu matu gange, mwana ya kina mu munda mwange kigira ubuyanzi.

⁴⁵ Kandi a veye nobugasu wa suuvira; kigira yaga ga ya volerwa ga twula ku Mwami ga la dukidzwa.

⁴⁶ Kandi Maria ya vola, Mwoyo gwange gwidzominya Mwami,

⁴⁷ Roho gwange gu yanza ku Nyasaye Muhonnyi wange.

⁴⁸ Kigira u henzi ubukekeke bwomukana mutugwa wewe: Kigira henza, kutwula lero makula gosi ga la nanga mugasu.

⁴⁹ Kigira wetsingulu u nkoleye vindu vinene; Lieta lilye li veye litakatifu.

⁵⁰ Kandi tsimbabasi tsyitsye tsi vedzanga ku makula namakula Kuvo ava mu tia

⁵¹ U lolekidzi tsingulu nomukono gwigwe U salanyi avigingiri mu tsiganigani tsyemyoyo gyavo.

⁵² Waguluye avagali ku tsintebe tsyavo, Kandi u nenehidzi avakekeke.

⁵³ Wigutidzi avenzala nivindu vilahi; Avatugi u va kungi bugira kindu.

⁵⁴ Ya konya Israeli mutumekiri wewe A duke kwidzulitsa tsimbabasi tsitsye,

⁵⁵ (Kuli ya volera vaguga vetu) Ku Abrahamu noku visukululwi vivye mihiga nemihiga.

⁵⁶ Maria ya menya naye kuduka myeli gyivaka, ma yirana yengo wewe.

⁵⁷ Inyinga ya Elisabeti yokwivula ya duka ligali; ni yivula mwana muyai.

⁵⁸ Avatende veve navandu veve va hulira Mwami u nenehidzi tsimbabasi tsitsye kuye; navo va sangala naye.

⁵⁹ Ku lidiku li kola gatanu na gavaka, vadza kukeva mwana; ni venya kumugulika Zekaria ku lieta lya ise wewe.

⁶⁰ Ma ma wewe ya tivula na a vola, Auwa; navutswa a la gulikwa Yohana.

⁶¹ Kandi va mu volera, Ku vandu vovo si ha li nomulala u langwa lieta yili.

⁶² Va sima ise wewe, va mu teva, wenya kumugulika ki?

⁶³ Yenya kibao na a ng'oda, na a vola, Lieta lilye ni Yohana. Va genya vosi.

⁶⁴ Hene yaho munwa gwigwe gwigulika, nolulimi lwilwe lwa boholoka, na a vola, ni yidzominya Nyasaye.

⁶⁵ Ubutii bwa duka ku vosi ava menya halala navo: amakuva yaga gosi ga landidzwa mu kivala kyosi kyevigulu vye Buyuda.

⁶⁶ Navo vosi ava ga hulira va ga vika mu myoyo gyavo, ni va vola, Mwana uyu a li va mwana ki? Kigira mukono gwo Mwami gwa li halala naye.

⁶⁷ Zekaria ise wewe, yizula Roho Mutakatifu, na a profeta, na a vola,

⁶⁸ A gasidzwe Mwami Nyasaye wa Israeli; Kigira u henzi avandu veve, u va tungiye,

⁶⁹ Kandi u ku gingiye lwiga lwobuhonnyi Mu inyumba ya Daudi mutumekiri wewe

⁷⁰ (Kuli ya vola neminwa gyavaprofeti veve vatakatifu va kale),

⁷¹ Kukuha ubuhonnyi imbiri wava sigu vetu, kandi mu makono ga vosi va ku dunyira;

⁷² Nokuvera vaguga vetu tsimbabasi, Nokwidzulitsa lilago lilye litakatifu;

⁷³ Lisuha lya yisuhira Abrahamu guga wetu

⁷⁴ Nokukuha ku honnywe ku twule mu makono gavasigu vetu, Ku nyale kumutumekira bugira ubutii,

⁷⁵ Mu butakatifu nobulungi imbiri wewe madiku getu gosi.

⁷⁶ Yee, kandi ive mwana u la langwa muprofeti wa Uveye Igulu Ligali: Kigira u la tsia imbiri wo Mwami kulomba tsinzira tsitsye;

⁷⁷ Kuha avandu veve limanya ubuhonnyi Ku lisameha lyobwoni bwavo,

⁷⁸ Kigira tsimbabasi tsinene tsya Nyasaye wetu, Kutsyo ubulavu bu twula igulu bu la ku dukira,

⁷⁹ Bu ng'ereng'ane kuvo ava menya mu kisundi nomu kiriri kyelikudza. Kwimirira virenge vyetu ku inzira yemirembe.

⁸⁰ Mwana ya viruka na a dasa tsingulu mu mwoyo gwigwe, na a menya mwigendanyama kuduka inyinga yeye yokuloleka ku Israeli.