Livalidza 9 - KITABU KITAKATIFU

¹ Na Yahova ya kyangalangwi kya Sinai, mu mweli gwokutanga gwomuhiga gwa kaviri inyima welitwula lyavo mu kivala kya Egepeti, na a vola,

² Kandi avana va Israeli va gumire lilia lyelipasaka ku inyinga yalyo ya lya lagwa.

³ Mu lidiku lyelikumi na gane lyomweli yigu, ku inyinga ya mgolova, mu la lomba lilia ku inyinga yalyo ya lya lagwa: kuli lilaga lyalvo lyosi li veye, na Kuli amalago gaiyo gosi mu la li gumira.

⁴ Na Musa ya volera avana va Israeli, va lombe lilia lyelipasaka.

⁵ Na va lomba lilia lyelipasaka mu mweli gwokutanga, lyelipasaka mu mweli gwokutanga, ku lidiku lyelikumi na gane, mgolova, mu kyangalangwi kya Sinai: kuli gosi ga Yahova ya laga Musa, avana va Israeli va kola ndiyo.

⁶ Na va li ho avasatsa avalala, ava kolwa avadamano kigira mukudzu gwomundu, kuduka va ta nyala kugumira lilia lyelipasaka ku lidiku yilyo lyene: navo vadza imbiri wa Musa na Haruni ku lidiku yilyo:

⁷ na avasatsa yavo va mu volera, Kwinye ku veye avadamano kigira mukudzu gwomundu: kigira ki ku gayeywi, ku ta nyala kuhaana kihaanwa ku Yahova ku inyinga yakyo ya lagwa hagati ha avana va Israeli?

⁸ Na Musa ya va volera, Mu linde, nduke kuhulira kya Yahova a la laga kumwinye.

⁹ Na Yahova ya volera Musa, na a vola,

¹⁰ U volere avana va Israeli, na u vole, Mundu ku mwinye kinga ku visukululwi vyenyu, ku vosi u veye mudamano kigira mukudzu, kinga na a veye ihale mu lugendo, navutswa a la gumira lipasaka ku Yahova.

¹¹ Mu mweli gwa kaviri, ku lidiku lyelikumi na gane lyomweli, mgolova va la li gumira; va la li lia halala nobukima bu ta li na mamera, na tsingutsa tsindulu:

¹² na va vule kuleka kindu kulyokudukamugamba, kandi va ta vunanya kigumba kyalyo: kuli lilaga lyosi lyelipasaka va la li kola.

¹³ Navutswa mundu u veye mulahi, kandi u ta veye mu lugendo, na a vula kulia lipasaka, mundu uyu a la twulidzwa mu avandu veve; kigira ya vula kuleta kyokuhaanwa ku Yahova ku inyinga yakyo ya lagwa, mundu uyu a la ginga ubwoni bwibwe.

¹⁴ Na mugeni u menya hagati henyu, na a va ni yenya kulomba lilia lyelipasaka ku Yahova; kuli lilaga lyelipasaka li veye, na kuli miima gyalyo gyi veye, a la kola ndiyo: mu la va nelilaga lilala ku mugeni, noku uyu mwene luhya.

¹⁵ Na ku lidiku lyelihema lya singeridzwa, lilesi lya kunika lihema, kali lihema lyelilolekidza: na mgolova lya li igulu helihema, na liloleka lyalyo lya li kuli muliru, kuduka mugamba.

¹⁶ Lya li ndiyo kazozo lilesi lya li kunika, na liloleka lyalyo lya li kuli muliru mu budiku.

¹⁷ Na lwa lilesi lya gingwa kutwula ku Lihema, ma inyima weligingwa avana va Israeli va samula: na ha lilesi lya singira, ha zana avana va Israeli va singeridza ho mahema gavo.

¹⁸ Ku lilaga lya Yahova avana va Israeli va samula na ku lilaga lya Yahova va singeridza mahema gavo: inyinga yosi yelilesi lya menya igulu welihema, navo va menya mu hokusosa.

¹⁹ Na lwa lilesi lya lindagira igulu welihema madiku manyingi, ma avana va Israeli va linda lilaga lya Yahova, na va vula kusamula.

²⁰ Na tsinyinga tsindi lilesi lya li ku lihema madiku makekeke; ma va menya mu hokusosa kuli lilaga lya Yahova, na kuli lilaga lya Yahova va samula.

²¹ Na tsinyinga tsindi lilesi lya li ho kutwula mgolova kuduka mugamba; ma lwa lilesi lya gingwa mugamba, va samula: kinga ni li lindagira mbusu nobudiku, lwa lilesi lya gingwa, va samula.

²² Ni ga veye madiku gaviri, kinga mweli, kinga muhiga gwelilesi lya lindagiranga igulu welihema, nokumenya igulu walyo, avana va Israeli va menya mu hokusosa, si va samula mba; navutswa lwa lya gingwa, ma va samula.

²³ Ku lilaga lya Yahova vombaka mahema, na ku lilaga lya Yahova va samula: va gumira lilaga lya Yahova, ku lilaga lya Yahova mu munwa gwa Musa.