Livalidza 4 - KITABU KITAKATIFU

¹ Na Yahova ya volera Musa na Haruni, na a vola,

² Mu twulidze livalidza lya avana va Kohathu mu avana va Levi kuli bwiko bwavo, kuli tsinyumba tsyavaguga vavo,

³ kutwula mihiga makumi gavaka nokuduka mihiga makumi gatano, vosi avingira mu butumiki kukola miyinzi gyelihema lyokuvuganira mu.

⁴ Yibu bu veye ubutumiki bwa avana va Kohathu mu lihema lyokuvuganira mu, ku viju vitakatifu ligali:

⁵ lwa va la sambula hokusosa, Haruni a lingira, na avana veve, na va likidza ingubo yokukinga, nokukunika lisanduku lyelilolekidza nayo,

⁶ na va la vika ku tsingubo tsyelitsivi, nokwaala ku ingubo yeblue, na va la vika mu misala gyokuginga.

⁷ Na ku imeza yobukima bwokumanyira va laala ingubo yeblue, nokuvika ku tsisahani, na vijiko, na tsibakuli, na vikombe vyokutsuka; na ubukima bwa kazozo bu la va kuyo:

⁸ na va laala kuvyo ingubo inzakanyu, nokukunika kuyo tsingubo tsyelitsivi, na va la vika misala gyokuginga.

⁹ Na va la vugula ingubo yeblue, nokukunika kinara kyetaya yobulavu, na tsitaya tsyakyo, na makasi gakyo, na uluju lwakyo, na viju vyakyo vyosi vyamaguta, vya va tumekiranga kukyo:

¹⁰ na va la ki vika halala na viju vyakyo vyosi mutsingubo tsyelitsivi tsyokukunika, nokukivika ku misala.

¹¹ Na va laala ingubo yeblue ku bwali bwethahabu, nokubukunika netsingubo tsyelitsivi tsyokukunika, nokubuvika ku misala gyabwo:

¹² na va la vugula viju vyosi vyobutumiki, vya va tumikiranga mu hatakatifu, na va la vi vika mu ingubo yeblue, nokuvikunika netsingubo tsyelitsivi tsyokukunika, nokuvivika ku misala.

¹³ Navo va la ng'ula ligoke mu bwali, na va laala ku ingubo yekiforosadi:

¹⁴ na va la vika kubwo viju vyosi vya va tumekiranga kubwo, vituva, na tsinzago, na vijiko, na tsibakuli, viju vyosi vyobwali; na va laala ku tsingubo tsyelitsivi kuvikunika, na va la vika mu misala gyabwo.

¹⁵ Na lwa Haruni na avana veve va mala kukunika hatakatifu, na viju vyosi vya hatakatifu, lwa hokusosa ha la samula; inyima wa yaga, avana va Kohathu va la tsia kuviginga: navutswa va vule kudira hatakatifu, gase va la kudza. Viju yivi vi veye musigo gwa avana va Kohathu mu lihema iyokuvuganira mu.

¹⁶ Na ubulindi bwa Eleazaru mwana wa Haruni musalisi, bu la va maguta getaya yobulavu, na vimuli vinolu, na kihaanwa kyobusie kya kazozo, na maguta gokuvaka, na bulindi bwelihema, nobwa vyosi vi veye mulyo, hatakatifu, na viju vyosi vyalyo.

¹⁷ Na Yahova ya volera Musa na Haruni, na a vola,

¹⁸ Mu ta twulidza ihiri yobwiko bwa Vakohathu ku Valevi;

¹⁹ navutswa mu va kolere likuva yili, va ve mwoyo, va vule kukudza, lwa visunda ku vindu vitakatifu ligali: Haruni na avana ve-e va lingira mu, nokuvika sa mulala ku butumiki bwibwe noku musigo gwigwe;

²⁰ navutswa va vule kwingira kulola hatakatifu kuduka kali idakika indala, gase va la kudza.

²¹ Na Yahova ya volera Musa, na a vola,

²² U vungidze halala livalidzwa lya avana va Gerishon, kuli tsinyumba tsyavaguga vavo, nokubwiko bwavo;

²³ kutwula ku mihiga makumi gavaka nokuduka ku mihiga makumi gatano u la va validza; vosi avingira kutumika, nokukola miyinzi mu lihema lyokuvuganira mu.

²⁴ Yibu bu veye ubutumiki bwa bwiko bwa Avagerishon, mu litumika nomu liginga misigo:

²⁵ va la ginga tsingubo tsyelihema, na lihema lyokuvuganira mu, tsyokukunika tsyalyo, na tsingubo tsyelitsivi tsyokukunika tsi veye igulu walyo, na ingubo yokukinga mu kiliango kyelihema lyokuvuganira mu,

²⁶ na tsingubo tsyomugidzi, na ingubo yokukinga mu kiribwa kyomugidzi, gu kumberidzanga lihema na ubwali tsimbega tsyosi, na migoye gyatsyo, na viju vyosi vyobutumiki bwavo, na vyosi vi kolangwa navyo: muvyo va la tumika.

²⁷ Ubutumiki bwa avana va Avagerishon, mu musigo gwavo gwosi nomu butumiki bwavo, bu la va ku lilaga lya Haruni na avana veve; na mu la va laga musigo gwavo kugulinda.

²⁸ Yibu bu veye ubutumiki bwa bwiko bwa avana va Avagerishon mu lihema lyokuvuganira mu: na ubulindi bwavo bu la va ku mukono gwa Ithamaru mwana wa Haruni musalisi.

²⁹ Ku liva lya avana va Merari, u la va validza kuli bwiko bwavo, noku tsinyumba tsyavaguga vavo;

³⁰ kutwula mihiga makumi gavaka nokuduka mihiga makumi gatano, la va validza, sa mulala wingira ku butumiki, kukola miyinzi gyelihema lyokuvuganira mu.

³¹ Na yili ni lilaga lyomusigo gwavo, kuli ubutumiki bwavo bwosi mu lihema lyokuvuganira mu: tsimbao tsyelihema, na tsimbohero tsyalyo, na tsitiru tsyalyo, na vyokusingira ku vyatsyo,

³² na tsitiru tsyomugidzi tsyokukumberidza, na vyokusingiridza ku vyatsyo, na vivambo vyatsyo, na migoye gyatsyo, halala neviju vyatsyo vyosi, na halala nobutumiki bwavyo: kandi na ameta mu la va laga sa mulala viju vyomusigo gwobulindi bwavo.

³³ Yibu bu veye ubutumiki bwa bwiko bwa avana va Merari, kuli ubutumiki bwavo bwosi, mu lihema lyokuvuganira mu, ku mukono gwa Ithamaru mwana wa Haruni musalisi.

³⁴ Na Musa na Haruni na avanene velivugana v a validza avana va Avakohathu kuli bwiko bwavo, nokutsinyumba tsyavaguga vavo,

³⁵ kutwula ku avemihiga makumi gavaka kuduka ku avemihiga makumi gatano, sa mulala wingira mu butumiki, kukola miyinzi mu lihema lyokuvuganira mu:

³⁶ na yavo ava validzwa kuvo kuli bwiko bwavo, va li tsielfu tsiviri na tsimia tsitano na tsiviri na avandu makumi gatano.

³⁷ Yava niva ava valilzwa mu bwiko bwa Avakohathu, vosi ava kola miyinzi mu lihema lyokuvuganira mu, ava Musa na Haruni va validza kuli lilaga lya Yahova ku Musa.

³⁸ Na kuvo ava validzwa ku avana va Gerishon, kuli bwiko bwavo, noku tsinyumba tsyavaguga vavo.

³⁹ Kutwula ku avemihiga makumi gavaka kuduka ku avemihiga makumi gatano, sa mulala wingira mu butumiki bwemiyinzi gyelihema lyokuvuganira mu,

⁴⁰ kali yavo ava validzwa kuvo, kuli bwiko bwavo, noku tsinyumba tsyavaguga vavo, va li tsielfu tsiviri na tsimia tsitano na indala na avandu makumi gavaka.

⁴¹ Yava nivo ava validzwa mu bwiko bwa avana va Gerhihon, vosi ava kola miyinzi mu lihema lyokuvuganira mu, ava Musa na Haruni va validza kuli lilaga lya Yahova.

⁴² Na yavo ava validzwa mu bwiko bwa avana va Merari, kuli bwiko bwavo, noku tsinyumba tsyavaguga vavo,

⁴³ kutwula ku avemihiga makumi gavaka kuduka ku avemihiga makumi gatano, sa mulala ku vosi wingira mu butumiki bwemiyinzi mu lihema lyokuvuganira mu,

⁴⁴ kali yavo ava validzwa kuvo kuli bwiko bwavo, va li tsielfu tsivaka, na tsimia tsiviri.

⁴⁵ Yava nivo ava validzwa mu bwiko bwa avana va Merari, ava Musa na Haruni va validza kuli lilaga lya Yahova ku Musa.

⁴⁶ Yavo vosi ava validzwa mu Avalevi, ava Musa na Haruni na avanene va Israeli va validza, kuli bwiko bwavo, noku tsinyumba tsyavaguga vavo,

⁴⁷ kutwula ku avemihiga makumi gavaka kuduka ku avemihiga makumi gatano, sa mulala ku vosi wingira kukola miyinzi gyobutumiki, na miyinzi gyokuginga misigo mu lihema lyokuvuganira mu,

⁴⁸ kali yavo ava validzwa kuvo, va li tsielfu tsitano na tsivaka, na tsimia tsitano na avandu makumi gatano na gavaka.

⁴⁹ Kuli lilaga lya Yahova va validzwa na Musa, sa mulala kuli ubutumiki bwibwe, na kuli musigo gwigwe: na ndiyo va validzwa naye kuli Yahova ya laga Musa.