Livalidza 34 - KITABU KITAKATIFU

¹ Na Yahova ya volera Musa, na a vola,

² U lage avana va Israeli, na u va volere Lwa mwingira mu kivala kya Kanani, (yiki ni kivala kya mu gwira kuva miyandu gyenyu, kali kivala kya Kanani kuli tsinzako tsyakyo),

³ na luvega lwenyu lwa kusini lu la va kutwula ku kyangalangwi kya Zin kuvita luvega lwa Edom, na lwako lwenyu lwa kusini lu la va kutwula ku kiheri kya Inyanza yo Munyl: kuhenza ivugwe;

⁴ na lwako lwenyu lu la kumbuka kutsia ku luvega lwa kusini lwekyanegiru kya Akirabim, nokutsia imbiri kuduka Zin; na litwula lyalwo li la vita ku luvega lwa kusini ha Kadeshbarnea; na lu la tsia kuduka Hazaruadaru, nokuvita kuduka Azimon;

⁵ na lwako lu la kumbuka kutwula Azimon kuduka ku mugera gwa Egepeti, na litwulira lyalwo lu la va ku inyanza.

⁶ Na lwako lwenyu lwoluvega lwemadioli, lu la va ku inyanza inene na lwako lwayo: yilu lu la va lwako lwenyu lwemadioli.

⁷ Na yilu lu la va lwako lwenyu lwoluvega lwa kasikasini: kutwula ku inyanza inene mu latanya lwako lwenyu kuduka ku kigulu kya Horu;

⁸ na kutwula ku kigulu kya Horu mu latanya lwako lwenyu kuduka ku liingira lya Hamathu; na litwulira lyolwako li la va ha Zedadi;

⁹ na lwako lu la vita kuduka Zifiron, na litwulira lyalwo li la va ha Hazarenan: yilu lu veye lwako lwenyu ku luvega lwa kasikasini.

¹⁰ Na mu latanya lwako lwenyu lwevugwe kutwula Hazar-enan kuduka Shefam;

¹¹ na lwako lu la sulunguta kutwula Shefam kuduka Ribila, ku luvega lwevugwe lwa Ain; na lwako lu la sulunguta, nokuduka ku luvega lwa Kinerethu ku luvega lwevugwe;

¹² na lwako lu la sulunguta ku Yordani, na litwulira lyalwo li la va ku Inyanza ya Munyu. Yiki nikyo kivala kyenyu kuli tsinzako tsyakyo tsyetsimbega tsyosi.

¹³ Na Musa ya laga avana va Israeli, na a vola, Yiki ni kivala kya mu la nyola ku ikura, kya Yahova ya laga ki hebwe tsihiri tsitano na tsine, na inusu yehiri:

¹⁴ kigira ihiri ya avana va Rubeni kuli tsinyumba tsya vaguga vavo, na ihiri ya avana va Gadi kuli tsinyumba tsya vaguga vavo va nyoye, na inusu yehiri ya Manase va nyoye miyandu gyavo:

¹⁵ tsihiri tsiviri na inusu yehiri va nyoye miyandu gyavo engereka wa Yordani, ha Yeriko, ivugwe, ku luvega lwelitwula lyeliuva.

¹⁶ Na Yahova ya volera Musa, na a vola,

¹⁷ Yaga ga veye ameta ga avandu ava li gavulira mwinye kivala kuva miyandu: Eieazaru musalisi, na Joshua mwana wa Nuni.

¹⁸ Na mu la vugula mundu munene wehiri sa indala kugavula kivala kuva miyandu.

¹⁹ Na ameta ga avandu yavo ni yaga: wehiri ya Yuda, Kalebu mwana wa Jefune.

²⁰ Na wehiri ya avana va Simeoni, Shemueli mwana wa Amihudu.

²¹ Na wehiri ya Benjamini, Elidadi mwana wa Kislon.

²² Na wehiri ya avana va Dan, munene Buki mwana wa Jogili.

²³ Wa avana va Yosefa: wehiri ya avana va Manase, munene Hanieli mwana wa Efodi.

²⁴ Na wehiri ya avana va Efiraim, munene Kemueli mwana wa Shifitan.

²⁵ Na wehiri ya avana va Zebuioni, munene Elizafan mwana wa Paranaki.

²⁶ Na wehiri ya avana va Isakari, munene Palitieli mwana wa Azan.

²⁷ Na wehiri ya avana va Asheri, munene Ahihudu mwana wa Shelomi.

²⁸ Na wehiri ya avana va Nafitali, munene Pedaheli mwana wa Amihudu.

²⁹ Yava nivo ava Yahova ya laga kugavanya miyandu ku avana va Israeli mu kivala kya Kanani.