Livalidza 3 - KITABU KITAKATIFU

¹ Na yivi vi veye visukululwi vya Haruni na Musa mu lidiku lya Yahova ya volerana na Musa mu kigulu kya Sinai.

² Na yaga ga veye ameta ga avana va Haruni: Nadabu wa tanga kwivulwa, na Abihu, Eleazaru, na Ithamaru.

³ Yaga nameta ga avana va Haruni, avasalisi ava vakwa maguta, ava ya vika ku miyinzi mitakatifu, va tumekire mu busalisi.

⁴ Nadabu na Abihu va kudzira imbiri wa Yahova, lwa va haana muliru mugeni imbiri wa Yahova, mu kyangalangwi kya Sinai, navo va li bugira avana; na Eleazaru na Ithamaru va tumekira mu busalisi imbiri wa Haruni dada wavo.

⁵ Na Yahova ya volera Musa na a vola,

⁶ U lete ihiri ya Lev; himbi, na u va vike imbiri wa Haruni musalisi, va mu tumekire.

⁷ Navo va la linda bulindi bwibwe, na ubulindi bwelivugana lyosi imbiri welihema lyokuvuganira mu, kukola ubutumiki bwelihema.

⁸ Na va la linda viju vyosi vyelihema lyokuvuganira mu, nobulindi bwa avana va Israeli, kukola ubutumiki bwelihema.

⁹ Na ive u haane Avalevi ku Haruni na avana veve: va hebwa ligali kuye mu bugono bwa avana va Israeli.

¹⁰ Na u la vika Haruni na avana veve, na va la linda ubusalisi bwavo: na mugeni wesunda himbi a liitwa.

¹¹ Na Yahova ya volera Musa, na a vola,

¹² Na inze, henza, mbuguye Avalevi mu avana va Israeli mu bugono bwa vosi ava tanga kwivulwa mu avana va Israeli; na Avalevi va la va avange:

¹³ kigira vosi ava tanga kwivulwa va voye avange, ku lidiku yilyo lya nda ouya ava tanga kwivulwa mu kivala kya Egepeti, ndetovolera avokutanga kwivulwa vosi mu Israeli, ku avandu noku mitugu; va la va avange: inze mbeye Yahova.

¹⁴ Na Yahova ya volera Musa mu kyangalangwi kya Sinai, na a vola,

¹⁵ U validze avana va Levi kuli tsinyumba tsyavaguga vavo, noku bwiko bwavo: avikula vosi kutwula mweli mulala nokuvita, u la va validza.

¹⁶ Na Musa ya va validza kuli likuva lya Yahova, kuli ya lagwa.

¹⁷ Na yava va li avana va Levi kuli ameta gavo: Gerishon, na Kohathu, na Merari.

¹⁸ Na ameta ga avana va Gerishon ku bwiko bwavo: Libni na Shimei.

¹⁹ Na avana va Kohathu ku bwiko bwavo: Amram, na Iziharu Hebiron, na Uzieli.

²⁰ Na avana va Merari ku bwiko bwavo: Mahali na Mushi. Yibu ni bwiko bwa Avalevi kuli tsinyumba tsyavaguga vavo.

²¹ Ubwiko bwa Avalibini na ubwiko bwa Avashimei bwa twula ku Gerishon: yibu bu veye bwiko bwa Avagerishon.

²² Yavo ava validzwa kuvo, kuli livalidzwa lyavikula vosi, kutwula ku avomweli mulala nokuvita, kali yavo ava validzwa kuvo, va li tsielfu tsitano na tsiviri na tsimia tsitano.

²³ Ubwiko bwa Avagerishon va lombaka inyima welihema ku luvega lwemadioli.

²⁴ Na munene wenyumba yavaguga va Avagerishon, a la va Eliasafu mwana wa Laeli.

²⁵ Na ubulindi bwa avana va Gerishon mu lihema lyokuvuganira mu, bu ia va lisingiridza, na Lihema, na kyokukunika kyalyo, na ingubo yokukinga muliango gwelihema lyokuvuganira mu,

²⁶ na tsingubo tsyomugidzi, na ingubo yokusunga mu kiliango kyomugidzi, gu veye gwelihema, nogwobwali gwetsimbega tsyosi, na migoye gyalyo ku butumiki bwosi bwalyo.

²⁷ Noku Kohathu bwa li bwiko bwa Avamram na bwiko bwa Avaiziharu, na bwiko bwa Avahebironi, na bwiko bwa Avauzieli: yibu bu veye bwiko bwa Avakohathu.

²⁸ Kuli livalidzwa lyavikula vosi kutwula mweli mulala nokuvita va li tsielfu tsitano na tsivaka, na tsimia tsitano nandala, ava linda ubulindi bwa hatakatifu.

²⁹ Bwiko bwa avana bwa Kohathu va lombaka hukusosa ku luvega lwa kusini lwelihema.

³⁰ Na munene wenyumba yavaguga va bwiko bwa Vakohathu a la va Elizafan mwana wa Uzieli.

³¹ Na vya va la linda, vi la va lisanduku, na imeza, na kinara kyetaya, na mabwali, na viju vya hatakatifu vya va tumikiranga, na ingubo yokukinga, na vyosi vyobutumiki bwayo.

³² Na Eleazaru mwana wa Haruni musalisi a la va munene wavanene va Avalevi, na a la va muhenzi ku yava ava lindanga vyokulindwa vya hatakatifu.

³³ Ku Merari bwa li bwiko bwa Avamahali, na bwiko bwa Avamushi: yibu bu veye bwiko bwa Merari.

³⁴ Na yavo ava validzwa kuvo, kuli livalidzwa lyavikula vosi, kutwula mweli mulala nokuvita, va li tsielfu tsitano na indala na tsimia tsiviri.

³⁵ Na munene wenyumba yavaguga va bwiko bwa Merari a li Zurieli mwana wa Abihaili: na yavo va lombaka hokusosa havo ku luvega lwa kasikasini lwelihema.

³⁶ Na ubusingeriri bwa avana va Merari bwa va lagwa, bu la va kulinda tsimbao tsyelihema, na tsimbohero tsyalyo, na tsitiru tsyalyo, na vyokusingiridza ku vyalyo, na viju vyalyo vyosi, na vyosi vyobutumiki bwalyo;

³⁷ na tsitiru tsyokukumbiridza mugidzi tsimbega tsyosi, na vyokusingiridza ku vyalyo, na vivambo vyavyo, na migoye gyavyo.

³⁸ Na yavo avombaka hokusosa imbiri welihema ku iuvega lwevugwe, imbiri welihema lyokuvuganira mu ku luvega lwobutwuliru bweliuva, va la va Musa, na Haruni na avana veve, avokulinda vyokulindwa vya hatakatifu mu bulindi bwa avana va Israeli; na mugeni wesunda himbi a liitwa.

³⁹ Na vosi ava validzwa ku Avalevi, ava Musa na Haruni va validza ku lilaga lya Yahova, kuli bwiko bwavo, avikula vosi kutwula mweli mulala nokuvita, va li tsielfu makumi gaviri na tsiviri.

⁴⁰ Na Yahova ya volera Musa, U validze avikula vosi ava tanga kwivulwa va avana va Israeli, kutwula mweli mulala nokuvita, na u nyole livalidza lyameta gavo.

⁴¹ Na u mbugulira Avalevi (inze mbeye Yahova) mu bugono bwa yava vosi ava tanga kwivulwa hagati ha avana va Israeli; na mitugu gya Avalevi mu bugono bwa gya tanga kwivulwa ku mitugu gya avana va Israeli.

⁴² Na Musa ya validza vosi ava tanga kwivulwa va avana va Israeli, kuli Yahova ya mu laga.

⁴³ Na avikula vosi ava tanga kwivulwa kutwula mweli mulala nokuvita, ku yavo ava validzwa kuvo, va li tsielfu makumi gaviri na tsiviri, na tsimia tsiviri, na avandu makumi gatano na gaviri, na vavaka.

⁴⁴ Na Yahova ya volera Musa, na a vola,

⁴⁵ U vugule Avalevi mu bugono bwa vosi ava tanga kwivulwa ku avana va Israeli, na mitugu gya Valevi mu bugono bwemitugu gyavo; na Avalevi va la va avange: inze mbeve Yahova.

⁴⁶ Noku litungirwa lya yavo tsimia tsiviri, na makumi gatano na gaviri na vavaka ava tanga kwivulwa ku avana va Israeli, ava vita livalidzwa lya Avalevi,

⁴⁷ u la vugula tsishekeli tsitano ku mundu sa mulala; kuli tsishekeli tsya hatakatifu u la vugula kuvo (ishekeli iveye ligera makumi gaviri):

⁴⁸ na ifetha i tungirwa y avo ava tigala, u la ha Haruni na avana veve.

⁴⁹ Na Musa ya vugula ifetha yemitungu ya yavo ava vita livalidzwa lya Avalevi;

⁵⁰ ya vugula ifetha ku yavo ava tanga kwivulwa, va avana va Israeli elfu indala, na tsimia tsivaka, na makumi gatano na lilala na tsishekeli tsitano, kuli tsishekeli tsya hatakatifu:

⁵¹ na Musa ya ha Haruni na avana veve ifetha yemitungu, kuli likuva lya Yahova, kuli Yahova ya laga Musa.