Livalidza 25 - KITABU KITAKATIFU

¹ Na Israeli va menya mu Shitim; Na avandu va tanga kutsia mu malaya na avakana va Moabu:

² kigira va langa avandu kutsia mu vihaanwa vya viitira avanyasaye vavo; na avandu va lia vyokulia, na va sigamira avanyasaye vavo.

³ Na Israeli vehambanya na Baal-peoru: na ubutima bwa Yahova bwaaka ku Israeli.

⁴ Na Yahova ya volera Musa, U vugule avanene vosi va avandu, na u va sunge imbiri wa Yahova, imbiri weliuva, ubutima bululu bwa Yahova bwiranywe kutwulidzwa ku Israeli.

⁵ Na Musa ya volera avakalagi va Israeli, Mwiite sa mulala avasatsa veve avehambanyi na Baalpeoru.

⁶ Na, henza, mulala ku avana va Israeli yadza na a letera avamwavo veve mukali Mumidiani imbiri wetsimoni tsya Musa, na imbiri wetsimoni tsyelivugana lya avana va Israeli, lwa va li ni va liriranga ha kiliango kyelihema lyokuvuganira mu.

⁷ Na lwa Finehasi, mwana wa Eleazaru, mwana wa Haruni musalisi, ya gi lola, ya twula hagati helivugana, na a gumira litimu mu mukono gwigwe;

⁸ na ya londa mundu wa Israeli ni yingira mu lihema inyima wewe, na a va tumita vombi, mundu uyu wa Israeli, nomukali hagati heinda yeye. Na ndiyo iplegi ya gaywa mu avana va Israeli.

⁹ Na yavo ava kudza neplegi va li tsielfu makumi gaviri na tsine.

¹⁰ Na Yahova ya volera Musa, na a vola,

¹¹ Finehasi, mwana wa Eleazaru, mwana wa Haruni musalisi, u girunkanyi ubutima bwange bu twulidzwe ku avana va Israeli, kigira ya kendekidzwa nelikendeka lyange hagati havo, kuduka inze mbule kudividza avana va Israeli mu likendeka lyange.

¹² Kigira yaga u vole, Henza, mmu ha uyu lilagana lyange lyemirembe:

¹³ kandi li la va kuye, noku visukululwi vivye inyima wewe, lilagana lyobusalisi bwemihiga nemihiga; kigira ya li nelikendeka kigira Nyasaye wewe, na ya lombera avana va Israeli kyokukunika ubwoni.

¹⁴ Na lieta lyomusatsa wa Israeli wiitwa halala na mukali Mumidiani, lya li Zimri, mwana wa Salu, munene wenyumba ya vaguga weihiri ya Simeoni.

¹⁵ Na lieta lya mukali Mumidiani wiitwa lya li Kozibi, mwana wa Zuru; ya li mutwe gwa avandu venyumba ya vaguga mu Midiani.

¹⁶ Na Yahova ya volera Musa, na a vola,

¹⁷ U dambidze Avamidiani, nokuvakuya;

¹⁸ kigira va dambidza mwinye nobugadi bwavo, bwa va mu gadanga mu inkuva ya Peoru, nomu inkuva ya Kozibi, mwana womunene wa Midiani, amwavo wavo uyu wiitwa ku lidiku lyeplegi mu inkuva ya Peoru.