Livalidza 24 - KITABU KITAKATIFU

¹ Na lwa Balaam ya lola ga yanzidza Yahova kugasidza Israeli, si ya tsia kuli tsinyinga tsindi, kwenya likvena, navutswa ya henzidza mumoni mwimwe ku luvega lwekyangalangwi.

² Na Balaam ya ginga tsimoni tsyitsye, na a lola Israeli va menyanga kuli tsihiri tsyavo; na Roho wa Nyasaye ya duka kuye.

³ Na a kupa lugano lwilwe, na a vola, Balaam mwana wa Beoru a vola, Na mundu wemoni yeye ya kunikwa;

⁴ Uyu, a vola, uyu u hulirangamakuva ga Nyasaye, Uyu u lolanga lilola lya Wanyalavyosi, Na a gwa hasi, na tsimoni tsitsye tsya kunulwa:

⁵ Amahema gogo ga veye malahi ndi, O Yakobo, Ubumenyo bubwo, O Israeli

⁶ Kuli mavona va vagalirwa, Kuli milimi himbi ku mugera, Kuli makonge ga Yahova ya simika Kuli mitaragwa himbi na amadzi.

⁷ Amadzi ga la senuka mu tsisiongo tsitsye, Na bugutsa bwibwe bu la va mu amadzi manyingi, Na mwami wewe a la nenehidzwa kuvita Agagi, Na ubwami bwibwe bu la kuminywa.

⁸ Nyasaye a mu letanga kutwula Egepeti; A veye netsingulu tsyembongo: A la lia tsihiri tsi veye avasigu veve, Nokuvunanya vigumba vyavo ve vidonye, Na a la va tumita nemibano gyigye.

⁹ Ya goneka, nokugona hasi kuli king'ang'a Kandi kuli king'ang'a kikali; ubwaha a la mu vukidza? A gasidzwe ku vosi u ku gasidzanga, Na uyu u ku laamanga a laamwe.

¹⁰ Na ubutima bwa Balaki bwaaka ku Balaam, na ya kupanya makono gege; na Balaki ya volera Balaam, Nda ku langa kulaama avasigu vange, na, henza, u va gasidzi ligali hali kavaka.

¹¹ Kunangwa, kalunu wiruke u tsie hoho: nda ganagana kukukuminya nelidzominya linene ligali; navutswa, henza, Yahova u ku gayi u vule kwidzominywa.

¹² Na Balaam ya volera Balaki, Si nda volera avatumwa vovo, ava wa tuma ku inze, ni mbola,

¹³ Kali Balaki na a va ni ya mpa ifetha na ithahabu kuduka kwizula inyumba yeye, si nyala kuvita lwako lwa likuva lya Yahova, kukola bulahi kinga buda mano ku mwoyo gwange inze mwene; ga Yahova a vola, nigo aga nda vola?

¹⁴ Na kalunu, henza, ntsitsa ku avandu vange: hamba, nku mannye aga avandu yava va la kolera avandu vovo ku madiku gekiheri.

¹⁵ Na a kupa lugano lwilwe, na vola, Balaam mwana wa Beoru a vola, Na livola lya mundu wemoni yeye ya kunikwa;

¹⁶ A vola, uyu u huliranga makuva ga Nyasaye, Na u manyanga ubugeeri bwa U Veye Igulu Ligali, U lolanga lilola lya Wanyala Vyosi, Na a gwa hasi na tsimoni tsitsye tsi kunulwa:

¹⁷ Inze mmu lolanga, navutswa si i veye kalunu; Mmu henzanga, navutswa si ha veye himbi: Ing'ereng'ani i la twula ku Yakobo, Na impimbo yobwami i la vuka mu Israeli, Na i la vukanya hagati ha Moabu, Nokutsoma hasi avana vosi ve tsimbemba.

¹⁸ Edom a la va miyandu, Kandi Seiru a la va miyandu, ava li avasigu veve; Lwa Israeli va kola nobuluviriri.

¹⁹ Mulala womu Yakobo a lameha, Nokwononya yava ava tigala ku madala.

²⁰ Na ya henza Avamaleki, na a kupa lugano lwilwe, na a vola, Amaleki ya li wokutanga wetsihiri; Navutswa kiheri kikye ki la duka mu bwoneku.

²¹ Na ya henza ku Vakeni, na a kupa lugano lwilwe, na a vola, Bumenyi bwubwo bu veye netsingulu, Na kiduku kikyo ki vikeywi mu lwanda.

²² Navutswa Keni a la dividzwa, Kuduka Asuria a la ku lanya.

²³ Na ya kupa lugano lwilwe, na a vola, Magu wange, ni bwaha a la hona inyinga Nyasaye a la kola yaga?

²⁴ Navutswa bwatu bu la twula ku luginga lwa Kitim Na bu la dambidza Asuria, na bu la dambidza Eberi; Naye kandi a la duka mu bwoneku.

²⁵ Kunangwa Balaam ya vuka, na a twula, ni yirana hango hehe; na Balaki kandi ya tsia.