Livalidza 23 - KITABU KITAKATIFU

¹ Na Balaam ya volera Balaki, U nyombakire ubwali butano na buviri, na u nombere hano tsigiriki tsitano na tsiviri, na magondi makole gatano na gaviri.

² Na Balaki ya kola kuli Balaam ya vola; na Balaki na Balaam va haana kihaanwa kyegiriki na kyeligondi likole ku bwali sa bulala.

³ Na Balaam ya volera Balaki, U singire hano himbi nekihaanwa kikyo kyokusambwa, na inze nda tsia: namuiia Yahova a ladza ku inze ku lolane; na gosi aga a mannya inze nda ku volera. Naye yanegira ku kigulu.

⁴ Na Nyasaye ya vugana na Balaam: naye ya mu volera, Nombi ubwali butano na buviri, na mbaani kihaanwa kyegiriki na kyeligondi likole ku bwali sa bulala.

⁵ Na Yahova ya vika likuva mu munwa gwa Balaam, na vola, Wirane ku Balaki, na u vole makuva yaga na yaga.

⁶ Naye yirana kuye, na, henza, u singiye himbi ku kihaanwa kikye kyokusambwa, uyu, na avanene vosi va Moabu.

⁷ Naye ya kupa lugano lwilwe, na a vola, Balaki ya ndeta kutwula Aram, Mwami wa Moabu ya ndeta kutwula mu vigulu vya Ivugwe: Hamba, u naamire Yakobo Na hamba u vihirirwe Israeli.

⁸ Nyala ndi kulaama uyu wa Nyasaye u vuli kulaama? Kandi nyala ndi kuvihirirwa uyu wa Yahova u vuli kuvihirirwa?

⁹ Kigira mmu lolera ha mbeye hano ku intongi yolwanda Na ha mbeye hano mu vigulu mmu lola: Henza, va veye avandu ava menyanga veng'ine, Na si va la validzirwa mu tsihiri.

¹⁰ Ni bwaha u nyala kuvalidza ulugukyi lwa Yakobo? Kinga ni bwaha u nyala kuvalidza kidieli kya kane kya Israeli? Inze, mwoyo gwange nkudze likudza lyomulungi, Na kiheri kyange ki ve kuli kiheri kikye.

¹¹ Na Balaki ya volera Balaam, nkoleye ki, ive? Inze nda ku leta u laame avasigu vange, na, henza, u va gasidzi ligali.

¹² Ya tivula, na a vola, Si ga ndukira kuhenza ligali kuvola lya Yahova a mbikira mu munwa gwange?

¹³ Na Balaki ya mu volera Mwadza, hamba ku tsie ahandi, ha u nyala kulolera avandu yava; u la lola ku luvega lwekiheri kyavo kyeng'ine, na si u la lola vosi: na u naamire avandu yava ha zana.

¹⁴ Na ya mu hila kuduka mu mulimi gwa Zofim, kuduka ku intongi ya Pisga, na yombaka bwali butano na buviri nokuhaana igiriki na ligondi likole ku bwali sa bulala.

¹⁵ Na Balaam ya volera Balaki, U singire hano himbi ku kihaanwa kikyo kyokusambwa, na inze ntsie kulolana na Yahova hala.

¹⁶ Na Yahova ya vugana na Balnam, na ya mu vikira likuva mu munwa gwigwe, na a vola, Wirane ku Balaki, na u la vola yaga na yaga.

¹⁷ Naye ya duka kuye, na, henza, U singiye himbi ku kihaanwa kikye kyokusambwa, na avanene va Moabu halala naye. Na Balaki ya mu teva, Yahova u voli ki?

¹⁸ Naye ya kupa lugano lwilwe, na a vola, Vuka, Balaki, u hulire; Ive mwana wa Ziporu, u hurile; inze:

¹⁹ Nyasaye si a veye mundu, a vole ububehi, Kandi si a veye mwana womundu, yeganire: A vole, ma a vule kukola? Kinga u tivuye likuva, na a la vula kulidukidza?

²⁰ Henza, mbebeywi lilaga ngasidze: Na uyu u gasidzi, na inze si nyala kwiranya.

²¹ Si a loli ubudamano mu Yakobo; Kandi si a loli ubukyamu mu Israeli: Yahova Nyasaye wewe a veye halala naye, Na lihanzuka lyomwami li veye hagati havo.

²² Nyasaye a va letanga kutwula Egepeti; A veye netsingulu tsyembongo.

²³ Ligali si ha li nekikyeno ku Yakobo; Kinga ubusegetiri ku Israeli: Kalunu ga la volwa ku Yakobo noku Israeli, Ni kindu ki kya Nyasaye a koli

²⁴ Henza, avandu va vuka kuli king'ang'a kikali, Na kuli king'ang'a yeginganga mwene: Si a li gona hasi a luhe a duke kulia kilanye, Nokunwa masahi ga yavo aviitwa.

²⁵ Na Balaki ya volera Balaam, U ta va laama, kandi u ta va gasidza mba.

²⁶ Navutswa Balaam ya tivula na a volera Balaki, Si nda ku volera, Gosi ga Yahova a vola, yaga ga ndukira kukola?

²⁷ Na Balaki ya volera Balaam, Hamba, kalunu nda ku hiia ahandi; namusia Nyasaye a la yanza u naamire avandu yava ha zana.

²⁸ Na Balaki ya hila Balaam na a tsia naye kuduka ku kigulu kya Peoru, ku luvega lu henza ku kyangalangwi.

²⁹ Na Balaam ya volera Balaki, U nyombakire hano bwali butano na buviri, na u nombere tsigiriki tsitano na tsiviri, na magondi makole gatano na gaviri.

³⁰ Na Balaki ya kola kuli Balaam ya vola, na a haana igiriki na ligondi likole ku bwali sa bulala.