Livalidza 21 - KITABU KITAKATIFU

¹ Na Mukanani, mwami wa Aradi, wa menya ku luvega lwa Kusini, ya hulira Israeli yadza ku inzira Atharim; naye ya lwana na Israeli, na a lanya avalala kuvo.

² Na Israeli ya lagana na Yahova, nokuvola, Nu u va nu u vika avandu yava mu makono gange, hene yaho ndononya madala gavo ligali.

³ Na Yahova ya hulira mwoyo gwa Israeli, na ya vika Avakanani mu makono gavo; na va vononya halala na madala gavo ligali: na ha zana ha gulikwa Horma.

⁴ Na va samula kutwula mu kigulu kya Horu ku inzira ya Inyanza Inza kanyu, kukumberidza kivala kya Edom: na avandu avene va kudza mwoyo ligali kigira inzira zana.

⁵ Na avandu va hing'ana na Nyasaye, na Musa, nokuvola, Kigira ki mwa kwanegiridza kutwula mu Egepeti, ku kudzere mu kyangalangwi hano? Kigira si ha veye nobukima, na si ha veye namadzi; na myoyo gyetu gyi tamani nobukima yibu ubuhuhu.

⁶ Na Yahova ya tuma tsinzoka tsyomuliru hagati ha avandu, na tsya luma avmdu; na avandu vanyingi va Israeli va kudza.

⁷ Na avandu va tsia ku Musa, nokuvola, Ku koli ubwoni, kigira ku hing'ani na Yahova, na ive; u saale Yahova a twulidze tsinzoka ku kwinye. Na Musa ya saalira avandu.

⁸ Na Yahova ya volera Musa, Welombere inzoka yomuliru, u gi vike ku musala: na ga la va, sa mulala wa lumwa, lwa a gi lola, a la va mwoyo.

⁹ Na Musa ya lomba inzoka yomugasa, na a gi vika ku musala: na ga duka, inzoka ni i va ni i luma mundu ku vosi, lwa henza ku inzoka yomugasa zana, ma a va mwoyo.

¹⁰ Na avana va Israeli va samula ni va singeridza mahema ha Obothu.

¹¹ Kandi va samula kutwula Obothu, ni va singeridza mahema gavo ha lye-abarim mu kyangalangwi kyoluvega lwa Moabu, ku luvega lwevugwe.

¹² Na kutwula yaho va samula, ni va singeridza mahema gavo mu livona lya Zeredi.

¹³ Kutwula yaho va samula, na va singeridza mahema gavo ku luvega lundi lwa Arinon, gu veye mu kyangalangwi, ki twulanga mu lwako lwa Avaamori: kigira Arinon gu veye lwako lwa Moabu, hagati ha Moabu na Avaamori.

¹⁴ Kigira yaga ga veye kuvolwa mu kitabu kya amahe ga Yahova, Vahebu mu Suia, Na mavona ga Arinon.

¹⁵ Na kisulungutu kye vivanda Vi henza ku bumenyi bwa Ari, Nokuyeka ku lwako lwa Moabu.

¹⁶ Na kutwula ha zana va samula kutsia ha Beer: ki veye kidaho kya Yahova ya volera Musa, U vungudze avandu halala, na nda va ha amadzi.

¹⁷ Hene yaho Israeli vimba lwimbu yilu: U senuke, O kidaho; mu kimbire:

¹⁸ Kidaho kya vanene va yava, Kya vakulundu va vandu va hudula, Na impimbo yobwami, na tsimpimbo tsyavo. Na kutwula mu kyangalangwi va tsia Matana;

¹⁹ na kutwula Matana va tsia Nahalieli; na kutwula Nahalieli va tsia Bamothu;

²⁰ na kutwula Bamothu va tsia mu livona li veye mu mulimi gwa Moabu, kuduka ku intongi ya Pisga, ki henza ku luvega lwekyangalangwi.

²¹ Na Israeli va tuma avatumwa kutsia ku Sihon mwami wa Avaamori, nokuvola,

²² U mbe munwa mbite mu kivala kikyo: si ku la girunkana ha luvega kutsia mu mulimi, kinga mu kizabibu; si ku la nwa amadzi gevidaho: ku la tsia ku inzira yomwami, kuduka lwa ku vita lwako lulwo.

²³ Na Sihon si ya bugirira kuleka Israeli kuvita mu lwako lwilwe: navutswa Sihon ya vungidza avandu veve vosi halala, na a twulira Israeli mu kyangalangwi, na ya duka ha Jahazu; na ya lwana na Israeli.

²⁴ Na Israeli va mu temaga nobwogi bwekivavi, nokuvugula kivala kikye kutwula Arinon nokuduka Jaboku, kali kuduka ku avana va Amonkigira lwako lwa avana va Amon lwa li netsingulu.

²⁵ Na Israeli va vugula madala yaga gosi: na Israeli va menya mu madala gosi ga Avaamori, mu Heshibon, na mu tudala twalyo.

²⁶ Kigira Heshibon lya li lidala lya Sihon mwami wa Avaamori, wa lwana nomwami wa Moabu wa matsyambiri na ya twulidza kivala kikye kyosi mu makono gege, kali kuduka Arinon.

²⁷ Kigira yaga ava volanga mu tsing'ano va vola, Hambi Heshibon; Lidala lya Sihon lyombakwe nokudinyeridzwa:

²⁸ Kigira muliru gu twula Heshibon Lumemo lwomuliru lu twula mu lidala lya Sihon: Lu liye Ari lya Moabu, Avanene avomu vitumi vya Arinon.

²⁹ Bayaye ku ive, Moabu U divi, O avandu va Kemoshu: U haani avana avayai veve kuli aviruki, Na avana avakana veve kutsia mu butugwa, Kutsia ku Sihon mwami wa Avaamori.

³⁰ Kwinye ku va lasi; Heshibon li divi kuduka Dibon, Na kwinye kwononyi kuduka Nofa, Li duka kali ku Medeba.

³¹ Kunangwa Israeli va menya mu kivala kya Avaamori.

³² Na Musa ya tuma avandu kuluta Jazeri; na va vugula madala galyo, na va kunga Avaamori ava menya yo.

³³ Na va girunkana ni vanegira ku inzira va Bashan: na Ogu mwami wa Bashan ya va twulira, uyu na avandu veve vosi, kulwana ha Edrei.

³⁴ Na Yahova ya volera Musa, U ta mu tia: kigira mmali kumuvika mu mukono gugwo, na avandu veve vosi na kivala kikye; na u la mu kolera kuli wa kolera Sihon mwami wa Avaamori, wa menya ha Heshibon.

³⁵ Kunangwa va mu duya, na avana veve avayai, na avandu veve vosi, kuduka si ya tigala mundu kali mulala: na va vugula kivala kikye.