Livalidza 18 - KITABU KITAKATIFU

¹ Na Yahova ya volera Haruni, Ive na avana vovo na inyumba ya vaguga vovo halala na ive, mu la ginga ubudamano bwa hatakatifu; na ive na avana vovo halala na ive mu la ginga ubudamano bwobusalisi bwenvu.

² Kandi avamwavo vovo avehiri ya Levi, ihiri ya dada wowo u va lete himbi halala na ive, va hambanywe ku ive, nokukutumekira: navutswa ive na avana vovo halala na ive mu la va imhiri welihema lyelilolekidza.

³ Navo va la linda ubulindi bwubwo, na ubulindi bwa Lihema lyosi: navutswa va tesunda ku viju vya hatakatifu, kinga ku bwali, va vule kukudza, yavo, kinga mwinye.

⁴ Navo va la hambanywa ku ive, nokulinda lilaga lye lihema lyokuvuganira mu, mu butumiki bwa Lihema: na mugeni a vule kwisunda ku mwinye.

⁵ Mu la linda lilaga lya hatakatifu, na lilaga lyobwali; ubutima bu vule kuva ku avana va Israeli kandi.

⁶ Na inze, henza, mbuguye avamwavn venyu Avalevi kuvatwulidza mu avana va Israeli: va veye ku mwinye kihaanwa kya Yahova ya hebwa, kukola ubutumiki bwelihema lyokuvuganira mu.

⁷ Na ive na avana vovo halala na ive mu la linda ubusalisi bwenyu ku Vindu vyobwali sa kilala, kandi ku yikyo ki veye musi mwengubo yokukinga; na mu la tumika: inze mmali kumuha ubusalisi kuva ubutumiki bwekihaanwa: na mugeni wesunda himbi a liitwa.

⁸ Na Yahova ya volera Haruni, Na inze, henza, inze mmali kukuha ubulindi bwevihaanwa vyange vyokudigululwa, kali vitakatifu vyosi vya avana va Israeli; mmali kuha ive, na avana vovo, kigira livakwa maguta lyenyu, kuva lilaga lyemihiga ne mihiga.

⁹ Yivi vi la va vivyo ku vindu vitakatifu ligali, vi vule kuvikwa mu muliru: kihaanwa kyavo sa kilala, kali kihaanwa kyobusie sa kilala na kihaanwa kyavo kyobwori sa kilaia, na kihaanwa kyelihyolo kyavo sa kilala, kya va la ndetera, ki la va kitakatifu ku ive noku avana vovo.

¹⁰ Kuli vitakatifu ligali, u la lia ku; musatsa sa mulala a la lia ku: ki la va kitakatifu ku ive.

¹¹ Na yiki ki veye kikyo: kihaanwa kyokudigululwa kyekihaanwa kyavo, halala na vihaanwa vyokuhungudzwa vya avana va Israeli; mmali kuha ive, na avana avayai na avakana vovo halala na ive, li veye lilaga lyemihiga nemihiga; sa mulala mu inyumba yoyo museredze a la lia kuvyo.

¹² Ubunolu bwosi bwa maguta, na ubunolu bweligesa lyomuzabibu, na bweligesa lyobuswage, na ubuhya bwavyo bwa va ha Yahova, inze mrnali kuha ive.

¹³ Amakuyu amengu gokutanga gevyosi vi veye mu kivala kyavo, aga va leta ku Yahova, ga la va agogo; ku vosi u veye museredze mu inyumba yoyo a la lia kuvyo.

¹⁴ Ku vyosi kya vikwa kuva kitakatifu mu Israeli ki la va kikyo.

¹⁵ Ku vyosi kigulanga inda, kya vyomubiri vyosi vya va haana ku Yahova, mu avandu, nomu tsinyama, ki la va kikyo: navutswa uyu wa tanga kwivulwa na avandu, ligali u la mu tungira, na yiki kya tanga kwivulwa na tsinyama tsi ta li tsiseredze u la tsi tungira.

¹⁶ Na ku vyosi vya ga dukiranga vi tungirwe kutwula ku vyomweli mulala u la vi tungira, kuli livalidza lilyo, ku ifetha yetsishekeli tsitano, kuli ishekeli ya hatakatifu (ya zana i veye tsigera makumi gaviri).

¹⁷ Navutswa kya tanga kwivulwa kyeng'ombe, kinga kya tanga kwivulwa kyeligondi, kinga kya tanga kwivulwa kyembuli, si u li tungira yivi mba; vi veye vitakatifu: u luuha masahi gavyo ku bwali, nokusamba maguta gavyo kuva kihaanwa kya lombwa nomuliru, kuva mwayu mulahi ku Yahova.

¹⁸ Na inyama yavyo i la va yoyo, kuli indasi yokuhungudzwa na kuli kinama kyomukono mulungi, i la va yoyo.

¹⁹ Vihaanwa vyosi vyokudigululwa vyevitakatifu, vya avana va Israeli va haananga ku Yahova, mmali kuha ive, na avana vovo avayai na avakana halala na ive, li veye lilaga lyemihiga nemihiga: li veye lilagana lyomunyu lyemihiga nemihiga imbiri wa Yahova, ku ive noku kisukululwi kikyo halala na ive.

²⁰ Na Yahova ya volera Haruni, Ive u la vula kuva nemiyandu mu kivala kyavo, kandi u la vula kuva nekidieli kali kilala muvo: inze mbeye kidieli kikyo na miyandu gyigyo mu avana va Israeli.

²¹ Na henza, mmali kuha avana va Levi, izaka yosi ya Israeli kuva miyandu gyavo kigira litumika lyavo lya va tumika, li veye ubutumiki bwelihema lyokuvuganira mu.

²² Na kutwula kalunu avana va Israeli va tisunda ku lihema lyokuvuganira mu, gase va la ginga ubwoni, nokukudza.

²³ Navutswa Avalevi va la tumika ubutumiki bwelihema lyokuvuganira mu, navo va la ginga ubudamano bwavo: yili li la va lilaga lyemihiga nemihiga mu visukululwi vyenyu vyosi; navo si va la va nemiyandu mu avana va Israeli.

²⁴ Kigira izaka ya avana va Israeli, ya va haananga kudigululwa ku Yahova, inze mmali kuha Avalevi kuva miyandu gyavo: kigira yaga mmali kuvavolera, Si va la va nemiyandu mu avana va Israeli.

²⁵ Na Yahova ya volera Musa, na a vola,

²⁶ Kandi u la volera Avalevi, nokuvavolera, Lwa mu vugula izaka ku makono ga avana va Israeli ya mmali kuha mwinye kuva miyandu gyenyu, hene yaho mu la haana kihaanwa kyokudigululwa ku Yahova, ki ve izaka yezaka.

²⁷ Na kihaanwa kyokudigululwa kvenyu ki la validzwa ku mwinye, kuli ki veye ubuswage bwolodze, na kuli lizuia lyekyokumina mazabibu.

²⁸ Na ndiyo mu la haana kihaanwa kyokudigululwa ku Yahova ku tsizaka tsyosi, tsya mu vugula ku makono ga avana va Israeli; na kutsyo mu la ha Haruni musalisi, kihaanwa kyokudigululwa kya Yahova.

²⁹ Kutwula ku vihaanwa vyenyu vyosi mu la haana vihaanwa vyosi vyokudigululwa ku Yahova, ku vyobulahi bwavyo, kali vidieli vya takaswa.

³⁰ Kigirayaga u la va volera, Lwa mu digulula ubulahi bwavyo bu twula kuvyo, hene yaho vi la validzwa ku Avalevi kuli imeda lyolodze, na kuli limeda lyekyokumia mazabibu.

³¹ Na mu la vi lia hosi, mwinye na avandu vetsinyumba tsyenyu: kigira ki veye madanyi genyu gelitumika lyenyu mu lihema lyokuvuganira mu.

³² Na mu la vula kuginga ubwoni kigira yivi, lwa mu mali kudigulula kuvyo ubulahi bwavyo: mu tononya vindu vitakatifu vya avana va Israeli, mu vule kukudza.