Livalidza 17 - KITABU KITAKATIFU

¹ Na Yahova ya volera Musa, nokuvola,

² U volere avana va Israeli, na u vugule kuvo tsimpimbo, indala yenyumba yavaguga vavo sa mulala, ku vanene vavo vetsinyumba tsya avaguga vavo, tsimpimbo likumi na tsiviri: na u la ng'oda lieta lya vanene sa mulala ku impimbo yeye.

³ Na ku impimbo ya Levi, u la ng'oda lieta lya Haruni; kigira i la va impimbo indala ku mutwe sa mulala gwenyumba yavaguga vavo.

⁴ Na u la tsi vika mu lihema lyokuvuganira mu imbiri welilolekidza, ha mbugana na mwinye.

⁵ Na ga la duka, impimbo yomundu uyu wa nda tovola i la sebuka: na nda heridza imbiri wange, limonya lya avana va Israeli, lya va monyanga mwinye.

⁶ Na Musa ya volera avana va Israeli; na avanene vavo vosi va mu ha tsimpimbo, impimbo indala ku munene sa mulala, kuli tsinyumba tsyavaguga vavo tsi veye, tsya li likumi na tsiviri: na impimbo ya Haruni ya li mu tsimpimbo tsyavo.

⁷ Na Musa ya vika tsimpimbo imbiri wa Yahova mu lihema lyelilolekidza.

⁸ Kunangwa mugamba, Musa yingira mu lihema lyelilolekidza; na, henza, impimbo ya Haruni ya li ku inyumba ya Levi ya sebuka, na i kola visibu, nokulavidza vimuli, nokwama ububia bwetsinzoli.

⁹ Na Musa ya leta kyova tsimpimbo tsyosi kutwula imbiri wa Yahova na a tsi vika imbiri wa avana va Israeli vosi: navo va henza, na sa mulala ya vugula impimbo yeye.

¹⁰ Na Yahova ya volera Musa Vika kandi impimbo ya Haruni imbiri welilolekidza, i lindwe kuva kilolekidzu ku avana vobwebaali; u duke kuheridza limonya lyavo ku inze, va vule kukudza.

¹¹ Kunangwa Musa ya kola ndiyo: kuli Yahova ya mu laga, ya kola ndiyo.

¹² Na avana va Israeli va volera Musa, nokuvola, Henza, kwinye ku kudzanga, ku divanga, ku divanga kwosi.

¹³ Sa mulala wesunda ku lihema lya Yahova, a kudzanga: ku la kudza kwosi?