Livalidza 12 - KITABU KITAKATIFU

¹ Na Miriamu na Haruni va monya Musa kigira mukali Mukushi wa ya kwa; kigira ya hila mukali Mukushi.

² Na va vola, Ligali Yahova u volerani na Musa yeng'ine? Si a volerani nekwinye kandi? Na Yahova ya ga hulira.

³ Mundu uyu Musa ya li muhokya ligali, kuvita avandu vosi ava li ku lirova.

⁴ Nonoho Yahova ya volera Musa, na Haruni, na Miriamu, Mu twule mwinye vavaka, mu tsie mu lihema lyokuvuganira mu. Navo vavaka va tsia.

⁵ Na Yahova yika munara gwelilesi, na a singira ha kiliango kya Lihema, na a langa Haruni na Miriamu; navo vombi va twula.

⁶ Na ya va volera, Mu hulire kalunu makuva gange: na a va na a veye ho muprofeti hagati henyu, inze Yahova ndelolekidza kuye mu malola, na nda volerana naye mu maloto.

⁷ Mutumekiri wange Musa si a veye ndiyo; a veye musuuvirifu mu inyumba yange yosi:

⁸ na inze nda volerana naye munwa na munwa, kali havulavu, si ga veye ku livola lya hamwamu; naye a la lola lifwana lya Yahova: kunangwa kigira ki si mwa tia kuvola limonya ku mutumekiri wange, Musa?

⁹ Na ubutima bwa Yahova bwaaka kuvo; naye ya tsia.

¹⁰ Na lilesi lya twula ku Lihema; na henza, Miriamu ya li nobugere, kuli likonza: na Haruni ya henza Miriamu, na henza ya li nobugere.

¹¹ Na Haruni ya volera Musa, O, mwami wange, mwadza, u ta vika ubwoni yibu ku kwinye, kigira ku koli agobusiru, kigira ku koli ubwoni.

¹² Mwadza, u ta mu leka a ve kuli mukudzu wenyama yomhiri gwigwe i libwa kidonye inyinga ya twula mmunda mwa mama wewe.

¹³ Na Musa ya lira ku Yahova, na a vola, O Nyasaye, u mu honye, mwadza.

¹⁴ Na Yahova ya volera Musa, Dada uewe na a va na a tudza amate mumoni mwimwe, si a la va netsisoni madiku gatano na gaviri? Leka a bofwe kyova wa hokusosa madiku gatano na gaviri, na inyima wa yaga a la letwa mu kandi.

¹⁵ Na Miriamu ya bofwa kyova wa hokusosa madiku gatano na gaviri: na avandu si va samula kuduka inyinga ya Miriamu ya letwa mu kandi.

¹⁶ Na inyima avandu va samula kutwula Hezarothu, ni vombaka mahema gavo mu kyangalangwi kya Parani.