Litanga 49 - KITABU KITAKATIFU

¹ Kandi Yakobo ya langa avana veve, na a vola: Mu vugane halala nduke kumuvolera aga li mu gwira mu madiku gadzanga.

² Mvevungidze avene, mu hulire mwinye avana va Yakobo; Mu hulire Israeli dada wenyu.

³ Rubeni, ive u veye wokutanga kwivulwa wange, tsingulu tsyange, na wokutanga wobunyali bwange Ubunene bwelikuminnywa, na ubunene bwelinyala.

⁴ Usenukanga kuli amadzi, si u nyala kuva nobunene; Kigira wanegira kutsia ku kitali kya dada wowo; Hene yaho wa kyononnya: ya nina ku bugono bwange.

⁵ Simeoni na Levi va veye amwavo namwavo: Vivavi vyavo vi veye vyuma vyekirage.

⁶ O mwoyo gwange, u tingira mu makuva gavo; Ubukumi bwange, u ta sanga mu livugana lyavo; Kigira mu butima bwavo viita mundu, Kandi mu budinyu bwemyoyo gyavo va tegula lugaga.

⁷ Ubutima bwavo bu laamwe, kigira bwa li bululu; Na livihirirwa lyavo, kigira lya ii lyekirage: Nda va gavulira mu Yakobo, Nokuvasalannya mu Israeli.

⁸ Yuda, ive, avamwavo vovo va la kwidzominya: Mukono gwugwo gu la va ku magoti gavasigu vovo; Avana va dada wowo va la kwinamira.

⁹ Yuda a veye mwana weking'ang'a; Mwana wange u diguluki kutwula ku kilanye: Ya kukuna, ya seta kuli king'ang'a, Kandi kuli king'ang'a kikali; ibwaha u li mu vukidza?

¹⁰ Impimbo yobwami si i la twula ku Yuda, Kandi impimbo yokwameha si i la twula hagati hevirenge vivye, Kuduka inyinga Shilo yadza; Na lihulira lyavandu li la va kuye.

¹¹ A bohanga kimoli kyesukiri kikye ku muzabibu, Na kimoli kyesukiri kikye ku muzabiibu mutovole; Yogidzi tsingubo tsitsye newaini, Kandi tsingubo tsitsye mu masahi gamezabibu:

¹² Tsimoni tsi kupa tsimbeve ne lwaini, Na amino gege ga la va malavu na amaveere.

¹³ Zebuloni a la menya himbi nenyabuka yenyanza; Kandi a la va inyabuku ya amatu; Tsinzako tsitsye tsi la va himbi Sidone.

¹⁴ Isakaru a veye isukiri yetsingulu, Yinamanga hagati hetsingaga tsyamagondi:

¹⁵ Naye ya loln hokwelemeridza ha veye hnlahi, Na ya lola kivala ki veye kyayanzidza; Na yinaminya livega lilye kuginga, Na a gwa mutumekiri mu miyinzi gya gerwa.

¹⁶ Dan a la kalagira avandu veve, Kuli mulala ku tsihiri tsya Israeli.

¹⁷ Dan a la va inzoka ku inzira, Kandi kihirigoma ku muhanda, Ki lumanga virenge vyeparasi, Kuduka u ninanga a gwe hasi inyima.

¹⁸ Inze nindiriye ubuhonyi bwubwo, O Yahova.

¹⁹ Gad, lihe li la mu mina: Navutsu a la mina liki lyavo.

²⁰ Asheri, vyokulia vivye vi la va vinolu, Na a la haana vyokulia vilahi vyobwami.

²¹ Nafitali a veye imbongo i bohololwa: A letanga makuva malahi.

²² Yosefa a veye lusya lwelyama, Lusya lwelyama lu veye himbi nekisenukiru; Tsisya tsitsye tsi landa ku lidigi.

²³ Ava lasa mibano va mu saliridzi ligali, Nokulasa mibano kuye, nokumudambidza:

²⁴ Navutswa buta bwibwe bwa menya netsingulu, Na tsimbamba tsyamakono gege tsya vikwa tsingulu, Namakono ga Wetsingulu wa Yakobo, (Mwayi ya twula yo, u veye a Lwanda lwa Israeli,)

²⁵ Kali Nyasaye wa dada wowo, u li ku konya, Noku Wanyala Vyosi u li ku gasidza, Nobugasu bwomigulu igulu, Nobugasu bwenyanza ya hasi, Nobugasu bwetsimbeere nobwa inda.

²⁶ Ubugasu bwa dada wowo Bu veye netsingulu kuvita bwa vaguga vange Kuduka ku tsinzaka tsyekiheri kyevigulu vi ta hera mba: Ubugasu yibu bu la va ku mutwe gwa Yosefa, Noku itaji yomutwe gwa uyu wa hulanywa ku avamwavo veve.

²⁷ Benjamini a veye kisalang'ongo ki tandulanga: Mugamba a la lia vyoluhidzi Na mgolova a la gavula vilanye.

²⁸ Yava vosi va veye tsihiri likumi na tsiviri tsya Israeli: na makuva yaga nigo ga dada wavo ya va volera, nokuvagasidza; sa mulala kuli ubugasu bwibwe, ya va gasidza.

²⁹ Naye ya va laga, na a va volera, Inze, ga ndukira kuvungidzwa nduke halala na avandu vange: mu nte halala navaguga vange mu luhangaywa lu veye mu mulimi gwa Efroni Muhiti,

³⁰ mu luhangaywa lu veye mu mulimi gwa Makipela, gu veye imbiri wa Mamre, mu kivala kya Kanani, lwa Abrahamu ya gula halala na mulimi gwa Efroni kuva miyandu gyekilindwa:

³¹ ha zana va ta ho Abrahamu na mukali wewe Sara; va ta ho Isaka na Rabeka mukali wewe; na inze nda ta ho Leah:

³² mulimi na luhangaywa, lu veye mugwo, gwa gulwa ku avana va Hethu.

³³ Na lwa Yakobo ya mala kulaga avana veve, ya ginga virenge vivye na a vi vika mu kitali, na mwoyo gwigwe gwa twula kuye, na a vungidzwa kuva halala na avandu veve.