Litanga 43 - KITABU KITAKATIFU

¹ Na inzala ya li yekihalatu mu kivala.

² Kunangwa lwa va mala kulagira ubuswage bwa va leta kutwula mu kivala kya Egepeti, dada wavo ya va volera, Mu tsie kandi kukugulira vyokulia vikekeke.

³ Na Yuda ya mu volera, na a vola, Mundu uyu ya kweganehidza ligali, na a vola, Si mu li lola mumoni mwange bu'gira amwavo wenyu kuva halala na mwinye.

⁴ Nu u va nu u hila amwavo wetu halala na kwinye, ku la sulunguta kukugulira vyokulia:

⁵ navutswa nu u va nu u sula kumuhila, si ku la sulunguta mba; kigira mundu uyu ya ku volera, Si mu li lola mumoni mwange bugira kuva namwavo wenyu halala na mwinye.

⁶ Na Israeli ya vola, Kigira ki mwinye mwa nkolera ubudamano kuli yibu, kuvolera mundu uyu mu veye namwavo wenyu wundi?

⁷ Navo va mu volera, Mundu uyu ya ku teveridza ligali makuva getu, na ga ihiri yetu, na a vola, Dada wenyu a veye mwoyo? Na mu veye namwavo wundi? Na kwinye kwa mu tivulira kuli mateva yaga: kwinye kwa li ku nyale ndi kumanya a la ku volera, Mu sulungutidze amwavo wenyu hano?

⁸ Na Yuda ya volera Israeli dada wewe, U sulungutidze mwana halala na inze, na ku la tsia; ku duke kuva mwoyo, ku vule kukudza, kwinye na ive, na avana vetu kandi.

⁹ Na inze nda va kihambiriru kigira uyu; u la mu vanza ku mukono gwange: ni mba ni mbula kumuleta ku ive, nokumuvika imbiri wowo, hene yaho inze nda ginga likyenwa mihiga nemihiga:

¹⁰ kigira bugira kulindagira nkano kwirani hali kaviri.

¹¹ Na dada wavo Israeli ya va volera, Ni ga va ni ga veye ndiyo, mu kole yaga: mu vugule makuyu malahi gekivala mu viju vyenyu, na mu hilire mundu uyu kihaanwa, hailubani inkekeke, nobwuki bukekeke, nomunyovo, na manemane, na tsinzoli tsyokulia, na tsinzoli tsyomulodzi;

¹² na mu hile ifetha i duka hali kaviri mu mukono gwenyu; kandi mu hile mu mukono gwenyu ifetha yiranywa mu tsimuya tsyenyu; mbula va vula kugilola:

¹³ mu hile kandi amwavo wenyu, na mu vuke mu tsie kandi ku mundu uyu:

¹⁴ na Nyasaye Wanyala Vyosi a mu he tsimbabasi imbiri womundu uyu, a duke kumubohololera amwavo wenyu wundi na Benjamini. Ni mbereridzwa ku avana vange, li la va livereridzwa.

¹⁵ Na avandu yavo va vugula kihaanwa, na ifetha i duka hali kaviri mu mukono gwavo, na Benjamini; ni va vuka, ni va sulunguta Egepeti, ni va singira imbiri wa Yosefa.

¹⁶ Na Yosefa lwa ya lola Benjamini halala navo, ya volera mulindi wenyumba yeye, Leta avandu yava mu inyumba, mwiite inyama nokulomba vyokulia; kigira avandu yava va la lia vyokulia halala ninze mbasu.

¹⁷ Na mundu ya kola kuli Yosefa ya mu volera; na mundu uyu ya leta avandu yava nokuvavika mu inyumba ya Yosefa.

¹⁸ Na avandu yava va tia, kigira va vikwa mu inyumba ya Yosefa; na va vola, Ku leteywi mu kigira if etha yiranywa mu tsimuya tsyetu ku matsyambiri; a nyole ku kwinye kivune, nokukugwira, nokukukola avatugwa veve, na tsisukiri tsyetu.

¹⁹ Navo visunda himbi ku mulindi wenyumba ya Yosefa, ni va volerana naye ha muliango gwenyumba,

²⁰ ni va vola, O mwami wange, kwinye ligali kwa sulunguta matsyambiri kugula vyokulia:

²¹ kunangwa, lwa kwa duka hokugona, kwa kunula tsimuya tsyetu, na henza, sa mulala ya lola ifetha yeye mu imuya yeye, neligerwa lyayo lyosi: na kwinye ku gi leti kandi mu mukono gwetu.

²² Kandi ku letani ifetha yindi mu mukono gwetu kugula vyokulia: si ku manya ibwaha wa vika ifetha yetu mu tsimuya tsyetu.

²³ Naye ya vola, Mu ve nemirembe, mu ta tia mba: Nyasaye wenyu na Nyasaye wa dada wenyu, ya mu ha madanyi mu tsimuya tsyenyu: inze nda li nefetha yenyu. Naye ya va letera Simeoni.

²⁴ Na mundu ya leta avandu yava mu inyumba ya Yosefa, na a va ha amadzi na va savidza virenge vyavo; na a ha tsisukiri tsyavo vyokulia.

²⁵ Navo va lomba kihaanwa kyetegeke lwa Yosefa a duka mbasu hagati: kigira va hulira va la lia ho vyokulia.

²⁶ Na lwa Yosefa ya duka mu inyumba yeye, va mu letera mu inyumba, vihaanwa vya li mu mukono gwavo, nokwinama imbiri wewe kuduka hasi

²⁷ naye ya va teva makuva gavo, na a vola, Dada wenyu a veye mulamu, musakulu wa mwa mbolera makuva gege? Kuduka kalunu a veye mwoyo?

²⁸ Navo va mu volera, Mutumekiri wowo dada wetu a veye mulamu, a veye mwoyo kuduka lero. Na vinaminya mitwe ni va mu sigamira.

²⁹ Naye ya ginga tsimoni tsitsye, na a lola amwavo wewe Benjamini mwana wa mama wewe, na a teva Uyu niye mukogoti, wa mwa mbolera makuva gege? Naye ya vola, Nyasaye a ku vererere, mwana wange.

³⁰ Na Yosefa ya genda bwangu; kigira mwoyo gwigwe gwa ng'uswa ku amwavo wewe: naye yenya hokulilira; na yingira ubuliri, na a lilira yo.

³¹ Ma yisava mumoni, na a tsia kyova; na yigalira, na a vola, Mu lete vyokulia.

³² Na va mu vikira vivye yeng'ine, na vya yavo veng'ine, na vya Vaegepeti, ava lia halala naye, veng'ine: kigira Avaegepeti si va nyala kulia halala na Vahebraina; kigira nu mugyiru ku Vaegepeti.

³³ Navo vikala imbiri wewe, munene kuli ubunene bwelivulwa lilye, na mukogoti wavo kuli ubuke bwibwe: na avandu yava va genya avene na avene.

³⁴ Naye ya gavulira sa mulala kidieli kyevyokulia vya li imbiri wewe: navutswa kidieli kya Benjamini kya li kinene kuvita vidieli vya avamwavo veve hali katano. Ni va nwa, nokusangala halala naye.