Litanga 41 - KITABU KITAKATIFU

¹ Kunangwa inyima wemihjga gyiviri gya vita, Farao ya lota: na henza, ya singira ku luginga lwomugera.

² Na henza, tsing'ombe tsya senuka kutwula mu mugera, tsya li tsindahi na tsinkomeru; natsyo tsya tsia kwaya lilago.

³ Na henza, tsing'ombe tsindi tsitano na tsiviri tsya li inyima watsyo kutwula mu mugera, tsindamano na tsing'ahu, na tsya singira himbi na tsing'ombe tsindi ku luginga lwomugera.

⁴ Ma tsing'ombe tsindamano na tsing'ahu tsya lia tsindahi na tsinkomeru. Ma Farao ya vuka.

⁵ Kandi ya gona na a lota hali kaviri: na henza, vyangala vitano na viviri vya twula ku kikuvati kilala, vizula na vilahi.

⁶ Na henza, vyangala vitano na viviri vya mera inyima wavyo, vinyerere vye mbuudza ya ivugwe ya niyalidza.

⁷ Na vinyerere yivi vya mira vyangala vitano na viviri vizula na vilahi. Na Farao ya vuka, na henza, lya li liloto.

⁸ Kunangwa mugamba mwoyo gwigwe gwa henda; naye tuma, na a langa avakumu vosi va Egepeti, na avageeri vosi: na Farao ya va volera liloto lilye; navutswa si ha li nomulala wa nyala kuvuulira Farao maloto gege.

⁹ Hene yaho munene wa avanwehidzi ya volera Farao, na a vola Inze nzidzulitsa mahyolo gange lero;

¹⁰ ive, Farao wa vihirirwa na avatumekiri vovo, na wa mbika kulindwa mu inyumba yomunene wa valindi, inze halala na munene wa avadeki:

¹¹ na kwinye kwa lota maloto ubudiku bulala, inze na uyu, kwa lota mundu sa mulala kuli livuulira lya liloto lilye.

¹² Na ya li ho halala na kwinye muyai, Muhebraina, mutumekiri womunene wa avalindi; na kwa mu volera, naye ya ku vuulira maloto getu; ku mundu sa mulala kuli liloto lilye lya li ya ku vuulira.

¹³ Kunangwa, kuli ya ku vuulira, ga manya ni ga va ndiyo; inze ya nziranya mu bugono bwange, na uyu ya mu sunga.

¹⁴ Hene yaho Farao ya tuma na a langa Yosefa, navo va mu leta bwangu kutwula mu inyumba ya hasi: naye yevega, nokugirunkanya tsingubo tsitsye, nokwingira imbiri wa Farao.

¹⁵ Na Farao ya volera Yosefa, Ndoti maloto, na si ha veye na u nyala kumbuuiira: na inze mbuliye makuva gogo, lwa u hulira maloto u nyala kugavuula.

¹⁶ Na Yosefa ya tivulira Farao, na a vola, Si ga veye mu inze: Nyasaye a la ha Farao litivula lyemirembe.

¹⁷ Na Farao ya volera Yosefa, Mu maloto gange, nda li ni singiye ku luginga lwomugera:

¹⁸ na henza, tsing'ombe tsitano na tsiviri tsya senuka kutwula mu mugera, tsikomeru na tsindahi; natsyo tsyaya mu lilago:

¹⁹ kandi, henza, tsing'ombe tsindi tsitano na tsiviri, tsya senuka inyima watsyo, tsindamano na tsimbi ligali, na tsing'ahu, tsya nkikiri kulola lifwana lyatsyo mu kivala kyosi kya Egepeti mu budamano bwatsyo:

²⁰ na tsing'ombe tsing'ahu na tsindamano tsya lia tsing'mbe tsyoku tanga tsitano natsiviri tsinkomeru:

²¹ na lwa tsya mala kutsilia, si tsya manyekana tsya tsi lia; navutswa tsya li tsindamano, kuli wa tsya li matsyambiri. Ma nda vuka.

²² Kandi nda lota mu maloto gange, na henza, vyangala vitano na viviri vya twula ku kikuvati kilala, vizula na vilahi:

²³ na henza, vyangala vitano na viviri vya twula inyima watsyo, vya niyala, na vinyerere, na vyembuudza yevugwe yominya:

²⁴ na vyangala vinyerere vya mira vyangala vitano na viviri vilahi: ma nda volera avakumu navutswa si ha li nomulala wa nyaia kumbuulira.

²⁵ Na Yosefa ya volera Farao, Liloto lya Farao li veye lilala: Nyasaye u voleye Farao aga yenya kukola.

²⁶ Tsing'ombe tsindahi tsitano na tsiviri tsi veye mihiga gyitano na gyiviri; kandi vyangala vilahi vitano na viviri vi veye mihiga gyitano na gyiviri: liloto ni lilala.

²⁷ Kandi tsing'ombe tsitano na tsiviri tsing'ahu na tsindamano tsya senuka inyima watsyo ni mihiga gyitano na gyiviri, na kandi vyangala vitano na viviri vinyerere na vyembuudza yevugwe ya niyalidza; vi la va mihiga gyitano na gyiviri gyenzala.

²⁸ Yiki ni kindu kya mbolera Farao: Nyasaye a mannyanga Farao aga yenya kukola.

²⁹ Henza, mihiga gyitano na gyiviri gyidzanga gyevyokulia vinyingi mu kivala kyosi kya Egepeti:

³⁰ kandi inyima wagyo gyi ladza mihiga gyitano na gyiviri gyenzala; na ubuhinda bwosi bu livirirwa mu kivala kyosi kya Egepeti; na inzala zana i la dividza kivala;

³¹ kandi ubuhinda bu la vula kumanyekana mu kivala kigira inzala i londanga; kigira i la va yekihalatu.

³² Kandi ku maloto ga Farao ya lotidzwa hali kaviri, ga veye kigira inkuva yiyi Nyasaye u gi singeridzi, na Nyasaye a la gi leta bwangu.

³³ Kunangwa Farao yenye mundu mugeeri na welimanya, nokumuvika ku kivala kya Egepeti.

³⁴ Farao a kole inkuva yiyi, kandi a vike avalindi ku kivala va vugule kidieli kilala mu vitano kyekivala kya Egepeti mu mihiga gyitano na gyiviri gyobuhinda.

³⁵ Na va vungidze vyokulia vyosi vyemihiga gyitano na gyiviri milahi gyi ladza nokuvika ubuswage bu duke kuve vyokulia mu madala mu mukono gwa Farao, navo va bu linde.

³⁶ Na vyokulia yivi vi la va akiba yekivala mu mihiga gyitano na gyiviri gyenzala i la va mu kivala kya Egepeti; kivala ki vule kudiva kigira inzala yiyi.

³⁷ Na inkuva yiyi ya li indahi imbiri wa Farao, na imbiri wavatumekiri veve vosi.

³⁸ Na Farao ya volera avatumekiri veve, Ku nyala kunyola mulala u fwana mundu uyu, wa Roho wa Nyasaye a veye muye?

³⁹ Kunangwa Farao ya volera Yosefa, Kigira Nyasaye ya ku mannya inkuva yiyi yosi, si ha veye nowobugeeri na welimanya kuli ive:

⁴⁰ ive u la va ku inyumba yange, kandi kuli likuva lilyo avandu vange vosi va la lagwa ndiyo: na mu intebe yohwami yeng'ine inze nda va munene kuvita ive.

⁴¹ Na Farao ya volera Yosefa, Henza, nku viki ku kivala kyosi kya Egepeti.

⁴² Na Farao ya twulidza imingiri yomuhuri ku mukono gwigwe, na a gi vika Yosefa ku mukono gwigwe, kandi ya mu vika tsingubo tsyekatani tsindahi, nokumuvika munyolo gwethahabu mwigoti mwimwe;

⁴³ na a mu nyinya mu ligari lya kaviri lya ya li nalyo; na vimira imbiri wewe ni va hanzuka Mu sigame: na ya mu vika ku kivala kyosi kya Egepeti.

⁴⁴ Na Farao ya volera Yosefa, Inze mbeye Farao, kandi si ha veye nomundu mu kivala yiki kyosi kya Egepeti u nyala kuginga mukono kinga kirenge bugira ive.

⁴⁵ Na Farao ya gulika Yosefa lieta lilye, Zefenath-panea: kandi ya mu kwehidza mukana Asenathu, mwana wa Potifera musalisi wa On. Na Yosefa ya twuia, na a tsia ku kivala kyosi kya Egepeti.

⁴⁶ Kandi Yosefa ya li nemihiga makumi gavaka lwa ya singira imbiri wa Farao mwami wa Egepeti. Na Yosefa ya twula imbiri wa Farao, na a kia mu kivala kyosi kya Egepeti.

⁴⁷ Na mu mihiga gyitano na gyiviri gyenziguta lirova lyama vinyingi.

⁴⁸ Naye ya vungidza vyosi vyemihiga gyitano na gyiviri gya li mu Egepeti, na a vika vyokulia zana mu madala: vyokulia vyemilimi gya kumbiridza lidala, ya vi vika mu lidala lyene.

⁴⁹ Na Yosefa ya vika ubuswage kuli muyeke gwenyanza, bunyingi ligali, kuduka ya luha ya leka kuvalidza; kigira si bwa li nelivalidzwa.

⁵⁰ Kandi Yosefa yivulirwa avana vaviri avayai, muhiga gwenzala ni gu kikiri kuduka, ava Asenathu mukana wa n Potifera musalisi wa On, ya mwivulira.

⁵¹ Na Yosefa ya gulika munene Manase; ya vola, Kigira Nyasaye mpeye kwivirira kivi kyange kyosi, na kyenyumba yosi ya dada wange.

⁵² Na lieta lya wakaviri ya gulika Efiraim: ya vola, Kigira Nyasaye u mpeye lwevulu mu kivala kyobusaliri bwange.

⁵³ Na mihiga gyitano na gyiviri gyenziguta, gya li mu kivala kya Egepeti, gya vita.

⁵⁴ Na mihiga gyitano na gyiviri gyenzala gya tanga kuduka, kuli wa Yosefa ya vola: ha li nenzala mu vivala vyosi; navutswa mu kivala kya Egepeti vyokulia vya li yo.

⁵⁵ Na lwa itodzo ya duka mu kivala kya Egepeti kyosi, avandu va lilira Farao a va he vyokulia. Na Farao ya volera Avaegepeti vosi, Tsii ku Yosefa; aga a mu volera, mu kole.

⁵⁶ Na inzala ya li ku lirova lyosi: na Yosefa ya homolola magungi gosi, na a gulidza Avaegepeti, na inzala ya li yekihalatu mu kivala kya Egepeti.

⁵⁷ Na avevivala vyosi va duka Egepeti ku Yosefa kugula ubuswage; kigira inzala ya li yekihalatu mu lirova lyosi.