Litanga 39 - KITABU KITAKATIFU

¹ Na Yosefa ya sulungutidzwa kutsia Egepeti; na Potifara, munyampara wa Farao, munene wavalindi, Muegepeti, ya mu gula mu makono ga Avaishmaeli, ava mu sulungutidza yo.

² Kandi Yahova ya li halala na Yosefa, naye ya li wobugasu; na ya li mu inyumba yomwami wewe Muegepeti.

³ Na mwami wewe ya lola Yahova a veye halala naye, na Yahova ya gasidza vyosi vya li mu makono gege.

⁴ Na Yosefa ya nyola tsimbabasi imbiri wewe, na ya mu tumekira: kandi ya mu kola a ve mulindi wenyumba yeye noku vyosi vya ya li navyo ya vika mu mukono gwigwe.

⁵ Kunangwa kutwula inyinga ya ya mu kola mulindi wenyumba yeye, kandi wevindu vyosi vya ya li navyo, Yahova ya gasidza inyumba ya Muegepeti kigira Yosefa; na ubugasu bwa Yahova bwa li ku vyosi vya ya li navyo, mu inyumba nomu mulimi.

⁶ Kandi ya leka vyosi vya ya li navyo mu mukono gwa Yosefa; na mwene si ya manya kindu kali kilala ku vya ya li navyo, navutswa vyokulia vya ya lia. Na Yosefa ya li mundu mulahi weligondo lilahi.

⁷ Kunangwa inyima wevindu yivi, mukali wa mwami wewe, yomika Yosefa; na a mu volera, U gone ninze.

⁸ Navutswa ya sula, na a volera mukali wa mwami wewe, Henza, mwami wange si a manya kya mbeye nakyo mu inyumba, kandi ya vika vyosi vya a veye navyo mu mukono gwange:

⁹ si ha veye nomunene mu inyumba yiyi kuvita inze; kandi si ya ngaya ku kindu kali kilala, navutswa ku ive, kigira ive u veye mukali wewe: kunangwa nyala ndi kukola ubudamano yibu bunene, nokwona ku Nyasaye?

¹⁰ Kunangwa, ya hongera kuvolera Yosefa, naye ya vula kubugirira kugona naye, kinga ku va halala naye.

¹¹ Kunangwa inyinga yeyo, yingira mu inyumba kukola miyinzi gyigye, na si ha li na wundi ku vasatsa venyumba mu inyumba yimu.

¹² Mukali uyu ya mu gumira ingubo yeye, na a vola, U gone ninze: na ya mu lekera ingubo yeye mu mukono gwigwe, ni yiruka na a tsia kyova.

¹³ Kunangwa, mukali lwa ya lola u mu lekeye ingubo yeye mu mukono gwigwe, nokutsia kyova,

¹⁴ ya langa avasatsa avenyumba yeye, na a va volera, na a vola, Henza, ya ku letera Muhebraina kukukolera kihenyahenye; yingira ku inze a duke kugona ninze, na nda kupa tsikwili nomwoyo munene:

¹⁵ kunangwa, lwa ya hulira ni nginga mwoyo gwange, nokukupa tsikwili, ya ndekera ingubo yeye ni yiruka, na a tsia kyova.

¹⁶ Naye ya vika ingubo yeye himbi naye, kuduka lwa mwami wewe yirana ingo.

¹⁷ Naye ya mu volera kuli makuva yaga, na a vola, Mutumekiri Muhebraina wa wa ku letera, ya duka ku inze kunkolera kihenyahenye:

¹⁸ kunangwa, lwa ng'ingi mwoyo gwange, nokukupa tsikwili, ya ndekera ingubo yeye ni yiruka kutsia kyova.

¹⁹ Kunangwa, mwami wewe lwa ya hulira makuva gomukali wewe, ga ya mu volera, na a vola, Mutumekiri wowo ya nkolera makuva kuli yaga; ya vihirirwa ligali.

²⁰ Na mwami wa Yosefa ya mu vugula, na a mu vika mbuhambe, ha avahambe vomwami va bohangwa: naye ya li hombuhambe.

²¹ Navutswa Yahova ya li halala na Yosefa, na a mu vera tsimbabasi imbiri womulindi wenyumba yavahambe.

²² Na mulindi wenyumba yavahambe ya vika avahambe vosi ava li mu inyumba yavahambe, mu mukono gwa Yosefa; na makuva gosi ga va kola yo, uyu ya li mukoli wago.

²³ Mulindi wenyumba yavahambe si ya henza kindu kali kilala, kya li mu mukono gwigwe, kigira Yahova ya li halala naye; na vyosi vya ya kola, Yahova ya vi kola vi ve nobugasu.