Litanga 38 - KITABU KITAKATIFU

¹ Kunangwa inyinga yeyo, Yuda ya sulunguta kutwula ku avamwavo veve, na a tsia ku mundu mulala wa Adulam, welieta lilye lya li Hirah.

² Na Yuda ya lola yo mukana wa Mukanani welieta lilye lya li Shua; naye ya vugula mukana uyu, na a va halala naye.

³ Naye ya vereka, ni yivula muyai; naye ya mu gulika Eru.

⁴ Na vereka kandi ni yivula muyai; na a mu gulika Onan.

⁵ Na yivula kandi muyai, na a mu gulika lieta lilye Shela: na Yuda ya li ha Kezibu, lwa ya mwivula.

⁶ Na Yuda ya vugulira Eru munene wewe, mukali wa langwa Tamaru.

⁷ Na Eru, munene wa Yuda, ya li mudamano imbiri wa Yahova; na Yahova ya mwiita.

⁸ Na Yuda ya volera Onan, Wingire ku mukali wa amwavo wowo, u mu kolere kuli ga dukanga amwavo womusatsa wewe, u singeridzire amwavo wowo kisukululwi.

⁹ Na Onan ya manya kisukululwi zana si ki la volwa kuva kikye; kunangwa, lwa ya li halala nomukali wa amwavo wewe ya gotidzira hasi gase a la letera amwavo wewe kisukuiulwi.

¹⁰ Na inkuva yiyi ya ya kola ya li indamano imbiri wa Yahova: naye ya mwiita kandi.

¹¹ Hene yaho Yuda ya volera Tamaru navizala wewe, U menye mukunzakali mu inyumba ya dada wowo, kuduka lwa Shela mwana wange a li viruka; kigira ya vola, Gase a la kudza kuli avamwavo veve. Kunangwa Tamaru ya tsia kumenya mu inyumba ya dada wewe.

¹² Inyima wa yaga mukana wa Shua, mukali wa Yuda, ya kudza; na Yuda ya leminywa mwoyo, na a tsia ku avandu veve ava kalaga ubwoya bwamagondi mu Timna, uyu na mulina wewe Hira Muadulam.

¹³ Tamaru ya volerwa, Henza, navizala wowo yanegiranga kutsia Timna kukalaga magondi gege ubwoya.

¹⁴ Naye ya navula tsingubo tsitsye tsyobukunzakali, nokwivika ingubo yoku mutwe, nokwiyuhira ingubo ni yikala mu kiribwa kya Enaim, li veye ku inzira yokutsia Timna; kigira ya lola Shela ya viruka, naye si ya sererwa kuva mukali wewe.

¹⁵ Yuda lwa ya mu lola, ya ganagana a veye malaya; kigira ya kunika mumoni mwimwe.

¹⁶ Naye ta tsia ni yeveta kuye, na a mu volera, Mwadza, leka mbe halala nive: kigira si ya manya a veye navizala wewe. Naye ya vola, U la mpa kindu ki, u duke kuva halala ninze?

¹⁷ Naye ya vola, Nda ku letera kimeme kyembuli yekyayo. Naye ya teva, U la mpa kihambiriru, kuduka u li letera?

¹⁸ Naye ya vola, Nda ku ha kihambiriru ki? Naye ya vola, Mpe imimgiri yoyo yomuhuri, kandi musipi, kandi impimbo i veye mu mkono gugwo. Naye ya mu ha vindu, na a va halala naye na a mu kola inda.

¹⁹ Na mukali uyu ya vuka, na a tsia, na a navula ingubo yeye yomumoni, nokuvika tsingubo tsitsye tsyobukunzakali.

²⁰ Na Yuda ya hiliro kimeme mu mukono gwomulina wewe Muadulam, a duke kunyola kihambiriru mu mukono gwomukali zana: navutswa si ya mu nyola mba.

²¹ Hene yaho ya teva avasatsa va ha zana homukali uyu, na a vola, A veye haliha uyu malaya wa li mu Enaim ku inzira? Navo va vola, Si ha veye nomukali wa malaya hano.

²² Naye yirana ku Yuda, na a vola, Si ndoli uyu mba; kandi avasatsa va ha zana va vola, Si ha li nowamalaya hano.

²³ Na Yuda ya vola, Yenyolire yiki, gase ku la legenywa: henza, nda hila kimeme yiki, nive si u mu nyoye.

²⁴ Inyima wemyeli gyivaka, Yuda ya volerwa, Tamaru navizala wowo u koli malaya, kandi, henza, a veye inda yobuheyi. Na Yuda ya vola, U mu lete hano, a sambwe.

²⁵ Lwa ya letwa kyova, ya tuma ku navizala wewe, na a vola, Musatsa uyu wevindu yivi vi veye vivye, niye wa nkola inda: na ya vola, Mwadza, u manye vindu yivi vi veye vya bwaha, imingiri yomuhuri, na musipi, na impimbo.

²⁶ Na Yuda yeyama kuvyo, na a vola, Mukali uyu a veye nobulungi kuvita inze; kigira si nda mu ha Shela mwana wange mba. Naye si a li halala naye kandi.

²⁷ Kunangwa, inyinga yelilumwa lilye, ya li na avana vamalongo mmunda mwimwe.

²⁸ Kunangwa, lwa ya li ni yevulanga, mwana mulala ya twula mukono; na mwivulidzi ya vugula luvusi lwakanyu, na ya lu boha ku mukono gwigwe na a vola, Uyu ya tanga kwivulwa.

²⁹ Na ga duka, lwa yiranya mkono, henza, amwavo wewe ya tanga kwivulwa: naye ya vola, Kigira ki ive welombeye ubwiyangu bwokutwula? Kigira yaga ya gulikwa Pereze.

³⁰ Inyima wewe amwavo wewe yivulwa, uyu u veye noluvusi lwakanyu ku mukono gwigwe, na ya gulikwa Zera.