Litanga 36 - KITABU KITAKATIFU

¹ Yivi ni visukululwi vya Esau (uyu ni Edom)

² Esau ya vugula avakali veve ku avakana va Kanani: Ada mukana wa Elon Muhiti, na Oholibama mukana wa Ana, mukana wa Zibeon Muhivi,

³ na Basemathu mukana wa Ishmaeli, mbotso wa Nebaiothu.

⁴ Na Ada yivulira Esau Elifazu, na Basemathu yivula Reueli;

⁵ na Oholibama yivula Jeusha, na Jalam, na Kora: yava ni avana va Esau, avivulwa kuye mu kivala kya Kanani.

⁶ Na Esau ya hila avakali veve, navayai veve, na avakana veve, na vosi avenyumba yeye, na tsing'mbe tsitsye tsyosi, na imitugu gyigye gyosi, na ubutugi bwibwe bya ya vungidza mu kivala kya Kanani; na a tsia ku kivala kindi kutwula ku amwavo wewe Yakobo.

⁷ Kigira ubutugi bwavo bwa li bunene kuvita bwa va ta nyala kumenyera halala. Na kivala kya va menya mu si kya nyala kuduka kuvo kigira imitugu gyavo.

⁸ Na Esau ya menya mu kigulu kya Seiru: Esau ni Edom.

⁹ Kandi yivi ni visukululwi vya Esau dada wa Vaedom mu kigulu kya Seiru:

¹⁰ yaga ni ameta ga avayai va Esau: Elifazu mwana wa Ada mukali wa Esau, Reueli mwana wa Basemathu mukali wa Esau.

¹¹ Na avana vayai va Elifazu ni Teman, Omar, Zefo, na Gatam, na Kenazu.

¹² Na Timina ya li suria wa Elifazu, mwana wa Esau: naye yivulira Elifazu Amaleki: yava nivo avana va Ada, mukali wa Esau.

¹³ Kandi yava va li avana avayai va Reueli: Nahathu, na Zera, Shama, na Miza: yava nivo avana va Basemathu, mukali wa Esau.

¹⁴ Na yava na avana va Oholibama mukana wa Ana, mukana wa Zibeon, mukali wa Esau: naye yivulira Esau, Jeusha, na Jalam, na Kora.

¹⁵ Yava va veye avami va avana avayai va Esau: avana avayai va Elifazu munene wa Esau: mwami Teman, na mwami Omar, na mwami Zefo, na mwami Kenazu,

¹⁶ mwami Kora, mwami Gatam, mwami Amaleki, yava va veye avami va twula ku Elifazu mu kivala kya Edom; yava va veye avana va Ada.

¹⁷ Kandi yava va veye avana va Reueli, muyai wa Esau: mwami Nahathu, mwami Zera, mwami Shama, mwami Miza: yava va veye avami va twula ku Reueli mu kivala kya Edom; yava va veye avana avayai va Basemathu, mukali wa Esau.

¹⁸ Na yava va veye avana avayai va Oholibama, mukali wa Esau: mwami Jeusha, mwami Jalam, mwami Kora; yava va veye avana vayai va twula ku Oholibama mwana wa Ada, mukali wa Esau.

¹⁹ Yava va veye avana avayai va Esau, na yava va veye avami vavo: uyu a veye Edom.

²⁰ Yava va veye avana avayai va Seiru Muhori, avandu avomukivala: Lotan na Shobali na Zibeon na Ana,

²¹ na Dishon na Ezeri na Dishan: yava va veye avami ava twula ku Vahori, avana va Seiru mu kivala kya Edom.

²² Kandi avana va Lotan va li Hori na Heman; na mbotso wa Lotan ya li Timina.

²³ Kandi yava va veye avana va Shobali: Alvan na Manahathu na Ebali, Shefo na Onam.

²⁴ Kandi yava va veye avana va Zibeon: Aia na Ana; uyu a veye Ana wa nyola visenukiru vya amadzi amahyu, lwa yayanga tsisukiri tsya Zibeon dada wewe, mwigendanyama.

²⁵ Kandi yava va veye avana va Ana: Dishon na Oholibama mukana wa Ana.

²⁶ Kandi yava va veye avana va Dishon: Hamdan na Eshban na Ithran na Keran.

²⁷ Yava va veye avana va Ezeri: Bilhan na Zavan na Akan.

²⁸ Yava va veye avana va Dishan: Uzu na Aran.

²⁹ Yava va veye avami ava twula ku Vahori; mwami Lotan, mwami Shobali, mwami Zibeon, mwami Ana,

³⁰ mwami Dishon mwami Ezeri, mwami Dishan: yava va veye avami ava twula ku Vahori, kuli avami vavo avekivala kya Seiru.

³¹ Kandi yava va veye avami avameha mu kivala kya Edom, lwembiri lwomwami ya kikiri kwameha ku avana va Israeli.

³² Na Bela mwana wa Beoru yameha mu Edom; na lieta lyelidala lilye lya li Dinhaba.

³³ Na Bela ya kudza, na Jobabu mwana wa Sera wa Bozra yameha mbugono bwibwe.

³⁴ Na Jobabu ya kudza, na Husham wekivala kya Vatemani yameha mbugono bwibwe.

³⁵ Na Husham ya kudza, na Hadadi mwana wa Bedadi, uyu wa duya Midiani mu kivala kya Moabu, yameha mbugono bwibwe: na lieta lyelidala lilye lya li Avithu.

³⁶ Na Hadadi ya kudza, na Samla wa Masereka yameha mbugono bwibwe.

³⁷ Na Samla ya kudza, na Shaulu wa Rehobothu himbi ku Mugera yameha mbugono bwibwe.

³⁸ Na Shaulu ya kudza, na Baalhanan mwana wa Akibori yameha mbugono bwibwe.

³⁹ Na Baalhanan mwana wa Akibori ya kudza, na Hadari yameha mbugono bwibwe: na lieta lyelidala lilye lya li Pau; na lieta lyomukali wewe lya li Mehetabeli, mukana wa Matiredi, mwana wa Mezahaba.

⁴⁰ Na yaga na ameta ga avami ava twula ku Esau, kuli aviko vavo, kuli hango havo, kuli ameta gavo: mwami Timina, mwami Alva, mwami Jethethu,

⁴¹ mwami Oholibama, mwami Ela, mwami Pinon,

⁴² mwami Kenazu, mwami Teman, mwami Mibizaru,

⁴³ mwami Magidieli, mwami Iram: yava navami va Edom, kuli limenya lyavo mu kivala kyemiyandu gyavo. Uyu ni Esau dada wa Avaedom.