Litanga 35 - KITABU KITAKATIFU

¹ Kandi Nyasaye ya volera Yakobo, Vuka, u tsie Betheli u menye yo: na u lon be yo ubwali ku Nyasaye, wa loleka ku ive lwa wiruka kutwula imbiri wa Esau amwavo wowo.

² Kunangwa Yakobo ya volera avenyumba yeye, na vosi ava li halala naye, Mu vike haluvega avanyasaye avageni ava li halala nemwinye, na mwetakase avene, na mwivike tsingubo tsindi:

³ ku vuke nokutsia Betheli; na inze nda lomba yo ubwali ku Nyasaye, wa ntivulira mu lidiku lyobusaliri bwange, na ya li ninze halala ku inzira ya nda tsia ku.

⁴ Na va ha Yakobo avanyasaye vageni vosi ava li mu makono gavo, halala netsimingiri tsya li mu matu gavo; na Yakobo ya vi visa isi womusala munene gwa li himbi Shekem.

⁵ Na va samula: na ubutii bwa Nyasaye bwa li ku madala aga va kumbiridza, navo va wla kulonderera avana va Yakobo.

⁶ Kunangwa Yakobo ya duka Luz, li veye mu kivala kya Kanani (yili li veye Betheli), uyu na avandu vosi ava li halala naye.

⁷ Na yombaka yo ubwali, na ya gulika ha zana El-beth-eli, kigira Nyasaye ya loleka kuye, lwa yiruka kutwula imbiri wa amwavo wewe.

⁸ Kandi Debora, mutugwa wa Rebeka ya kudza, na ya tebwa isi wa Betheli, isi womusala: na lieta lya musala zana lya gulikwa Alon-bakuthu.

⁹ Na Nyasaye ya loleka ku Yakobo kandi, lwa ya duka kutwula Padanaram, na a mu gasidza.

¹⁰ Na Nyasaye ya mu volera, Lieta lilyo li yeye Yakobo: lieta lilyo li ta langwa Yakobo kandi, navutswa li la langwa Israeli: na ya langa lieta lilye Israeli.

¹¹ Na Nyasaye ya mu volera, Inze mbeye Nyasaye Wanyala Vyosi: u ve nolwivulu lunyingi, nokumedeka; ihiri nobunyingi bwetsihiri tsi la twula ku ive, kandi avami va la twula ku inda yoyo;

¹² kandi kivala kya nda ha Abrahamu na Isaka, nda ha ive, na kisukululwi kikyo inyima wowo nda va ha kivala.

¹³ Na Nyasaye yanegira kutwula kuye ha zana ha ya volerana naye.

¹⁴ Na Yakobo ya singeridza munara ha zana ha ya volerana naye, munara gwa magina: na ya tsuka ku kihaanwa kyokunwa, kandi ya tsuka ku maguta.

¹⁵ Na Yakobo ya gulika ha Nyasaye ya volerana naye, Betheli.

¹⁶ Navo va samula kutwula Betheli: ni va kikiri kuduka Efirathu: na Raheli ya lumwa, na ya li nelilumwa linene.

¹⁷ Kunangwa, lwa ya li nelilumwa linene, mwivulidzi ya mu volera, U ta tia; kigira u livula mwana wundi muyai.

¹⁸ Kunangwa mwoyo gwigwe, lwa gwa li ni gu twula kuye (kigira ya kudza), ya mu gulika lieta lilye Ben-oni: navutswa dada wewe ya mu gulika lieta lilye Benjamini.

¹⁹ Na Raheli ya kudza, na ya tebwa ku inzira i tsitsanga Efirathu (li veye Beth-lehemu).

²⁰ Na Yakobo ya singeridza munara ku kilindwa kikye: ha zana ha veye Nomunara gwa kilindwa kya Raheli kuduka lero.

²¹ Na Israeli ya samula kutsia imbiri, na yombaka lihema lilye ha ya mala kuvita munara gwa Ederi.

²² Ga duka, lwa Israeli ya menya mu kivala yikyo, Ruben; ya tsia kuva halala na Bilha, suria wa dada wewe: na Israeli ya hulira. Henza, avana va Yakobo va li likumi na vaviri:

²³ avana va Leah: va li Rubeni, munene wa Yakobo, na Simeoni, na Levi, na Yuda, na Isakari, na Zebuloni;

²⁴ na avana va Raheli, va li Yosefa na Benjamini;

²⁵ na avana va Bilha, mukana mutugwa wa Raheli: Dan na Nafitali;

²⁶ na avana va Zilipa, mukana mutugwa wa Leah: Gadi na Asheri: yava nivo avana va Yakobo avivulwa kuye mu Padan-aram.

²⁷ Na Yakobo yadza ku Isaka dad wewe ku Mamre ku Kiriathu-arba (li veye Hebironi) ha Abrahamu na Isaka va menya.

²⁸ Na madiku ga Isaka ga li mia na makumi gatano na gavaka.

²⁹ Isaka, mwoyo gwa twula kuye, na a kudza, na a vungidzwa ku avandu veve, musakulu wa madiku manyingi: na avana veve Esau na Yakobo va mu ta.