Litanga 34 - KITABU KITAKATIFU

¹ Kandi Dina mukana wa Leah, wa yivulira Yakobo, ya tsia kulola avakana vekivala.

² Na Shekem mwana wa Hamoru Muhivi, munene wekivala, ya mu lola, na a mu vugula, na a va halala naye, na a mwononya.

³ Na mwoyo gwigwe gwa hambana na Dina mukana wa Yakobo, naye ya yanza mukana uyu, na a volera mukana makuva malahi.

⁴ Kandi Shekem ya volera dada wewe Hamoru, na a vola, U mbugulire mukana uyu, a ve mukali wange.

⁵ Kunangwa Yakobo ya hulira uyu yononya Dina mukana wewe; na avayai veve va li mu kyayiru halala nemitugu: na Yakobo ya kiring'ana kuduka lwa vadza.

⁶ Na Hamoru dada wa Shekem ya tsia ku Yakobo kuvolerana naye.

⁷ Na avayai va Yakobo va twula mu kyayiru lwa va hulira: na avandu yava va verera ligali, ni va vihirirwa muno, kigira ya kola kifwabwi mu Israeli ku va halala na mukana wa Yakobo; inkuva i ta dukana kukolwa.

⁸ Na Hamoru ya volerana navo, na a vola, Mwoyo gwa Shekem mwana wange, gu kayirangwa ligali mukana wenyu: mwadza, mu mu he a ve mukali wewe.

⁹ Na mwinye mu lombe lihilana nekwinye; mu ku he avakana venyu, na mwinye mu vugule ku avakana vetu.

¹⁰ Na mwinye mu la menya halala nekwinye: na kivala ki la va imbiri wenyu; mu menye nokukiranya yimu, na mwenyolira miyandu yimu.

¹¹ Na Shekem ya volera dada wa Dina na avabotso veve, Mwadza, nyole tsimbabasi imbiri wenyu, na ku vyosi vya mu mbolera, nda ki haana.

¹² Mu teve ku inze ubukwi nevihaanwa vya mwenya, na inze nda haana kuli mu mbolera: navutswa mu mpe mukana a ve mukali wange.

¹³ Na avana va Yakobo va tivulira Shekem na Hamoru dada wewe nobugadi, ni va vola, kigira ya li ni yononyi Dina mbotso wavo,

¹⁴ ni va va volera, Si ku nyala kukola inkuva yiyi, kuha mundu wa vula kukevwa, mbotso wetu, kigira inkuva yiyi i la va tsisoni ku kwinye.

¹⁵ Ku inkuva yiyi indala yeng'ine ya ku la bugirira ku mwinye: ni mu va ni mu bugirira kuva kuli kwinye, avasatsa venyu vosi va kevwe;

¹⁶ kunangwa ku la mu ha avakana vetu, na kwinye ku la vugula avakana venyu, na ku la menya halala nemwinye, na ku la gwa ihiri indala.

¹⁷ Navutswa ni mu va ni mu ta ku hulira mu kevwe; kunangwa ku la vugula mukana wetu, na ku la tsia iwetu.

¹⁸ Kunangwa makuva gavo ga yanzidza Hamoru, na Shekem mwana wa Hamoru.

¹⁹ Na musoleli si ya lindagira kukola inkuva yiyi mba, kigira ya li na a yanza mukana wa Yakobo: naye yidzominywa kuvita vosi avenyumba ya dada wewe.

²⁰ Na Hamoru na Shekem mwana wewe va duka ku kiribwa kyelidala lyavo, nokuvolerana na avasatsa velidala, ni va vola,

²¹ Avandu yava va veye nemirembe ku kwinye; kunangwa ku leke va menye mu kivala kyetu, nokukirannya mu; kigira henza, kivala ki veye nobwiyangu bu duki kuvo; ku vugule avakana vavo kuva avakali vetu, nokuvaha avakana vetu.

²² Navutswa inkuva indala yeng'ine va duke kubugirira kumenya halala na kwinye, kugwa ihiri indala, ni yiyi avasatsa vosi ku kwinye va kevwe kuli vava va kevangwa kevwe, kuli yava va kevangwa.

²³ Tsing'ombe tsyavo, nobutugi bwavo, nemitugu gyavo gyosi, si vi la va vyetu? Ku bugirire inkuva yiyi yeng'ine kuvo, navo va la menya halala na kwinye.

²⁴ Na vosi ava twula mu kiribwa kyelidala, va hulira makuva ga Hamoru na Shekem mwana wewe; na avasatsa vosi va kevwa; vosi ava twula mu kiribwa kvelidala

²⁵ Na ga duka ku lidiku lya kavaka, lwa va salira ligali, avayai vaviri va Yakobo, Simeoni na Levi, avabotso va Dina, va vugula sa mulala kivavi kikye, nokutsia kulidala yilyo makiriri, nokwiita avasatsa vosi.

²⁶ Kandi vita Hamoru na Shekem mwana wewe nobwogi bwekivavi, na va twulidza Dina mu inyumba ya Shekem, ni va tsia.

²⁷ Na avayai va Yakobo vadza ku yava aviitwa, ni va fwula lidala, kigira va li kwononya mbotso wavo.

²⁸ Na va hila vyayo vyamagondi, nevyetsing'ombe, na tsisukiri, na vyosi vya li mu lidala, na vyosi vya li mu mulimi;

²⁹ nobutugi bwavo bwosi, na avana vavo, na avakali vavo, va va vugula, ni va va fwula, nokuvalanya, kali vyosi vya li mu inyumba.

³⁰ Na Yakobo ya volera Simeoni na Levi, Mwinye mu ndambidzi, nokunkola kufunya ubudamano mu avandu vekivala yiki, hagati ha Vakanani na Vaperizi: na inze mbeye na vakekeke, va levuganya ku inze, nokunduya; na nda diva, inze nenyumba yange.

³¹ Navo va vola, Ga dukanga a kole mbotso wetu kuli va kola wamalaya?