Litanga 31 - KITABU KITAKATIFU

¹ Naye ya hulira makuva ga vana va Labani, ni va vola, Yakobo u hili vyosi vya li vya dada wetu; na yenyolera ubutugi yibu bwosi mu vya li vya dada wetu.

² Na Yakobo ya lola mumoni mwa Labani, si mwa yeka kuye kuli matsyambiri.

³ Na Yahova ya volera Yakobo, Wirane ku kivala kya vadada vovo, noku aviko vovo, na inze nda va halala nive.

⁴ Na Yakobo ya tuma mundu kulanga Raheli na Leah vadze mu kyayiru ku kyayo kikye

⁵ na a va volera, Ndoli mumon; mwa dada wenyu si mu yeki ku inze kuli matsyambiri; navutswa Nyasaye wa dada wange a veye halala ninze.

⁶ Na mwinye mu manya nda tumekira dada wenyu netsingulu tsyange tsyosi.

⁷ Na dada wenyu ya ngada, na a girunkanya madanyi gange hali likumi; navutswa Nyasaye si ya mu leka kunzononya.

⁸ Lwa ya vola, kya mavahu ki la va madanyi gogo; hene yaho kyayo kyosi kyivula kya mavahu: na lwa ya vola, Vikalanye vi la va madanyi gogo; hene yaho kyayo kyosi kyivula vikalanye.

⁹ Na ndiyo Nyasaye ya hila mitugu gya dada wenyu, ni ya mpa.

¹⁰ Kunangwa inyinga yekyayo kya vohola, nda ginga tsimoni tsyange na ndola mu lilota, henza, tsikole tsi tumanga ku kyayo tsya li tsinkalanye, na tsimbalabale, na tsisembe.

¹¹ Na ingelosi wa Nyasaye ya mbolera mu maloto, Yakobo: na inze nda vola Mbeye hano.

¹² Naye ya vola, U ginge tsimoni tsitsyo, u lole, tsikole tsyosi tsi tumanga ku kyayo tsi veye tsinkalanye, na tsimbalabale, na tsisembe: kigira ndoli gosi ga Labani a ku koleranga.

¹³ Mbeye Nyasaye wa Beth-eli, ha wa vaka munara, ha wa singeridza lilagana na inze: kalunu vuka, u twule mu kivala yiki, wirane mu kivala kya wivulwa mu.

¹⁴ Na Raheli na Leah va tivula, ni va mu volera, Kwinye ku veye neki, dieli kinga miyandu kandi mu inyumba ya dada wetu?

¹⁵ Si ku volangwa kuye kuva avamenya? Kigira ya ku gulidza, na ya lia vyobugulidzana.

¹⁶ Kigira ubutugi bwosi bwa Nyasaye ya twulidza ku dada wetu, yibu bu veye bwetu, nobwa avana vetu: kalunu, vyosi vya Nyasaye a ku voleye, u kole.

¹⁷ Kunangwa Yakobo ya vuka, na a nyinya avana veve na vakali veve ku tsing'amia;

¹⁸ kandi ya hila imitugu gyigye gyosi, nobutugi bwibwe bwosi bwa ya li kuvungidza, nemitugu gyosi gya yenyolera gya ya vungidzira mu Padan-aram, kutsia wa Isaka dada wewe rnu kivaia kya Kanani.

¹⁹ Inyinga zana, Labani ya li na a tsiye kukalaga ubwoya bwa magondi gege: na Raheli yiba vifwananyi vya dada wewe.

²⁰ Na Yakobo ya tsia makiriri, na Labani Musiria ya vula kumanya, kigira si ya mu volera, yiruka.

²¹ Kunangwa yiruka na vyosi vya ya li navyo; naye ya vuka, ni yambuka Mugera, na a henzidza mumoni mwimwe ku kigulu kya Gileadi.

²² Na ku lidiku lya kavaka Labani ya volerwa, Yakobo yiruki.

²³ Naye ya vugula amwavo veve, nokumulonderera ulugendo lwa madiku gatano na gaviri; na a mu nyola mu kigulu kya Gileadi.

²⁴ Na Nyasaye yadza ku Labani Musiria mu lilota lyobudiku, na a mu volera, Welinde u ta volera Yakobo malahi kinga madamano.

²⁵ Na Labani ya duka ku Yakobo. Na Yakobo ya li ni yombaki lihema lilye mu kigulu: na Labani navamwavo veve vombaka mahema gavo mu kigulu kya Gileadi.

²⁶ Na Labani ya volera Yakobo, U koli kindu ki, u leke inze makiriri, nokuhila avana vange kuli va veye vilanye vi nyoleki nekivavi?

²⁷ Kigira ki wiruka makiriri nokungada; na wa vula kumbolera, nduke kusiivulana nive nobuyanzi netsinyimbu, nesigudi nobukana;

²⁸ kandi si wa mba ubwiyangu bwokubusa avana vange, avayai navakana? Kalunu u koli ubusiru.

²⁹ Mbeye netsingulu mmukono gwange kukukolera ubudamano: navutswa Nyasaye wa dada wowo ya volerana ninze ubudiku lwa veye, ve na a mbolera, Welinde u ta volera Yakobo amalahi kinga madamano.

³⁰ Na kalunu u mali kutsia, kigira u kayirangwa inyumba ya dada wowo navufswa kigira ki wibi vanyasaye vange?

³¹ Na Yakobo ya tivula na a volera Labani, Kigira nda tia: kigira nda vola, Gase u la nyaga ku inze avana avakana vovo netsingulu.

³² Ku vosi wa u lola a veye navanyasaye vovo, uyu si a la va mwoyo: imbiri wavamitu vetu, u manye ki veye kikyo mmukono gwange, u ki vugule. Kigira Yakobo si ya manya ni Raheli wiba vifwananyi.

³³ Kunangwa Labani yingira mu lihema lya Yakobo, nomu iya Leah, nomu lyavatugwa veve vaviri; navutswa si ya vi nyola. Na ya twula mu lihema lya Leah, na yingira mu lya Raheli.

³⁴ Kunangwa Raheli ya vugula vifwananyi, nokuvivika mu kyokwikala ku ku ing'amia, ni yikala kuvyo. Na Labani ya havatidza mu lihema lyosi, navutswa si ya vi nyola mba.

³⁵ Naye ya volera dada wewe Mwami wange a ta vihirirwa ni nta nyala kuvuka imbiri wowo; kigira miima gyavakali gyi veye ku inze. Naye yenya, navutswa si ya nyola vifwananyi.

³⁶ Na Yakobo ya vihirirwa, na a lembana na Labani: na Yakobo ya tivula na a volera Labani, Lihyola lyange li veye ki? Ubwoni bwange bu veye ikindu ki, kuduka ive u nondereye nobutima?

³⁷ Kalunu u havatidzi mu viju vyange vyosi, u lola ki ki veye ku viju vyenyumba yoyo? U ki vike hano imbiri wa vamwavo vange nowa vamwavo vovo, va kalage hagati hetu kwombi.

³⁸ Kalunu mmenyi hala na ive mihiga makumi gaviri; amagondi gogo amanyavuli, na tsimbuli tsinyavuli tsitsyo si tsya logosa mba, na magondi makole gevyayo vivyo si nda ga lia.

³⁹ Gyosi gyekindu kya lumaga, si nda gyi leta ku ive, nda bugirira ligota lyagyo; ive wa gyenya ku mukono gwange, ni gyi va ni gyibangwa mbasu kinga ubudiku.

⁴⁰ Na ndiyo nda li; mbasu gwa samba inze, nobudiku nda li mbukindu; na tsindolo tsya twula mu tsimoni tsyange.

⁴¹ Kalunu ndukidzi mihiga makumi gaviri mu inyumba yoyo; nda ku tumekira mihiga likumi na gyine kunyola avana vovo vaviri, na mihiga gyitano na mulala kunyola mitugu gyigyo: na ive wa girunkanya madanyi gange hali likumi.

⁴² Na a ta li Nyasaye wa dada wange, Nyasaye wa Abrahamu, na Uyu Welitibwa wa Isaka wa li halala ninze, nkano kalunu ligali, ive wa ka nkunga vutswa. Nyasaye u loli ubusaliri bwange na linyankana lya makono gange, na ya ku gaya ubudiku lwa veye.

⁴³ Kandi Labani ya tivula na a volera Yakobo, Avakana yava va veye avana vange, na avana yava va veye avakana vange, nemitugu yigyi gyi veye vyayo vyange, na vyosi vya u lola vi veye vyange: na inze nyala kukolera ki lero avakana vange, na avana vavo ava vivula?

⁴⁴ Na kalunu hamba, ku lombe lilagana, inze nive; li ve lilolekidza hagati hange nive.

⁴⁵ Na Yakobo ya vugula ligina, na a li singeridza kukola munara

⁴⁶ Kandi Yakobo ya volera avamwavo veve, Mu vungidze amagina: navo va ga vugula, nokukola kitumi: ni va liira ryokulia ha zana himbi nekitumi.

⁴⁷ Na Labani ya ki gulika Jegar-sahadutha: navutswa Yakobo ya ki gulika Galeed.

⁴⁸ Na Labani ya vola, Kitumi yiki ki veye kilolekidzu hagati hange nive lero. Kigira yaga lieta lyakyo lya langwa Galeed:

⁴⁹ na kandi Mizipa, kigira ya vola, Yahova a ve mulindi hagati hange nive, lwa kwavukana mulala ku wundi.

⁵⁰ Nu u va nu u dambidza avana vange, kandi nu u va nu u vugula avakali avandi halala na avana vange yava, si ha li nomundu halala nekwinye; Henza, Nyasaye a veye mulolekidzi hagati hange nive.

⁵¹ Na Labani ya volera Yakobo, Henza kitumi yiki, kandi munara yigu, gwa nda singeridza hagati hange nive.

⁵² Kitumi yiki ki ve kilolekidzu, na munara yigu gu ve kilolekidzu, inze si nda vita kitumi yiki kuduka ku ive, kandi ive si u la vita kitumi yiki na munara yigu kuduka ku inze kukola ubudamano.

⁵³ Nyasaye wa Abrahamu, na Nyasaye wa Nahoro, na Nyasaye wa dada wavo, a kalage hagati hetu. Na Yakobo yisuha ku Welitibwa wa Isaka dada wewe.

⁵⁴ Na Yakobo yiita isadaka mu kigulu, na a langa avamwavo veve vadze kulia vyokulia: navo va lia vyokulia, na va linda mu kigulu ubudiku bwosi.

⁵⁵ Na mugamba mabwebwe Labani ya vuka, na a busa avana veve avayai na vakana, na a va gasidza, ma Labani ya tsia ni yirana hehe.