Litanga 30 - KITABU KITAKATIFU

¹ Lwa Raheli ya lola ya vula kwivulira Yakobo avana, Raheli ya kendeka ku amwavo wewe; kandi ya volera Yakobo, Mbe avana, kinga nda kudza.

² Na Yakobo ya vihirirwa na Raheli: na a teva, Inze mbeye mbugono bwa Nyasaye, wa ku gaya lwivulu lwe inda?

³ Na Raheli ya vola, Henza, mutugwa wange Bilha, u ve naye; uyu a duke kwivula ku masigamo gange, na inze kandi nda nyola avana kuye.

⁴ Na ya mu ha Bilha mutugwa wewe kuva mukali wewe: na Yakobo ya li naye.

⁵ Na Bilha ya vereka, ni yivulira Yakobo mwana muyai.

⁶ Na Raheli ya vola, Nyasaye u nkalagiye, kandi u huliye mwoyo gwange, na u mbeye mwana muyai: kunangwa ya mu gulika Dan.

⁷ Na Bilha mutugwa wa Raheli ya vereka kandi, na yivulira Yakobo mwana muyai wa kaviri.

⁸ Na Raheli ya vola, Mmali kulwana na amwavo wange ubulwane ubunene, na mmu guuti: na a mu gulika Nafitali.

⁹ Na Leah lwa ya lola ya leka kwivula, ya leta Zilipa mukana mutugwa wewe, na a mu ha Yakobo kuva mukali wewe.

¹⁰ Na Zilipa mukana mutugwa wa Leah yivulira Yakobo mwana muyai.

¹¹ Na Leah ya vola, I veye inkavi yange: na a mu gulika Gadi.

¹² Na Zilipa yivulira Yakobo mwana muyai wa kaviri.

¹³ Na Leah ya vola, Mbeye nobugasu kigira avakali va la nanga ubugasu: na ya mu gulika Asheri.

¹⁴ Na Rubeni ya tsia mmadiku geligesa lyengano, na a nyola makuyu gombulimu, na a ga leta ku mama wewe Leah. Ma Raheli ya volera Leah, Mwadza, u mbe ku makuyu gomwana wowo.

¹⁵ Naye ya mu volera, I veye inkuva inkekeke ive kuhila musatsa wange? Wenya kuhila makuyu gomwana wange kandi? Na Raheli ya vola, Kunangwa a la va nive ubudiku yibu kigira makuyu gomwana wowo.

¹⁶ Na Yakobo ya twula mmulimi mgolova, na Leah ya tsia kumwaganira, na a mu volera, Ga ku dukiranga kwingira ku inze; kigira nda ku laganira ku makuyu gomwana wange. Na ya li naye ubudiku yibwo.

¹⁷ Na Nyasaye ya hulira Leah, naye ya vereka, na yivulira Yakobo mwana muyai wa katano.

¹⁸ Na Leah ya vola, Nyasaye u mbeye madanyi gange, kigira nda ha musatsa wange mutugwa wange: na ya mu gulika lieta Isakari.

¹⁹ Na Leah ya vereka kandi, na yivulira Yakobo mwana muyai wa katano na mulala.

²⁰ Na Leah ya vola, Nyasaye u mbeye kihaanwa kilahi; kalunu musatsa wange a la menya ninze, kigira mmwivuliye avana vayai vatano na mulala: na ya gulika lieta lilye Zebuloni.

²¹ Na lwenyima yivula mukana, na ya mu gulika lieta Dina.

²² Na Nyasaye yidzulitsa Raheli, na a boholola inda yeye.

²³ Naye ya vereka, na yivula mwana, na ya vola, Nyasaye u twulidzi linyegwa ku inze:

²⁴ na ya mu gulika lieta lilye Yosefa, na a vola, Yahova u medi ku inze mwana wundi muyai.

²⁵ Kunangwa lwa Raheli ya li ni yivula Yosefa, Yakobo va volera Labani, U mbe munwa ntsie kuduka hango hange, nomu kivala kyange.

²⁶ Mbe avakali vange na vana vange ava nku tumekiye, na u leke ntsie: kigira u manya ubutumiki bwange bwa nku tumekive.

²⁷ Na Labani ya mu volera, Ni mba ni nyoye tsimbabasi imbiri wowo, u menye: kigira ndoli Yahova u ngasidzi kigira ive.

²⁸ Kandi u mbolere madanyi gogo, na nda ku ha.

²⁹ Naye ya mu volera, Ive u manya kuli nda ku tumekira, kandi kuli liva lyemitugu gyigyo gya li mmakono gange.

³⁰ Kigira gya li mikekeke gya wa li nagyo lwa nkikiri kuduka, nagyo gyi medeki kuva minyingi; na Yahova u ku gasidzi hosi ha nda tsia: na kalunu nda duka inyinga ki kulombera avenyumba yange?

³¹ Naye ya teva, nda kuha ikindu ki? Na Yakobo ya vola, U ta mpa kindu: nu u va nu u nkolera inkuva yiyi, nda kwayira mitugu gyigyo kandi nokugyilinda.

³² Nda vita hagati hemitugu gyigyo lero, na nda twulidza mitugu gyosi gyi veye na mavahu, na mibalabale, na mamwamu mu magondi, na gyosi gya mavahu na mibalabale mu tsimbuli: na ku yigyo gyi la va madanyi gange.

³³ Kunangwa ubulungi bwange bu la ndolekidza lwenyima, inyinga yokuvalidza madanyi imbiri w owo: ku mitigu gyosi gu ta li na mavahu kinga mibalabale mu tsimbuli, kinga mamwamu mu magondi, yigu ni gu nyoleka mu gyange, u la vola gwibeywi.

³⁴ Na Labani ya vola, Nkano ga ka va kuli livola lilyo.

³⁵ Naye ku lidiku yilyo ya twulidza tsikole tsinkalanye, na tsisanzali, na tsimbuli tsinkali tsyosi tsimbalabale na tsisanzali, na tsyosi tsi veye na lilavu ku mbiri, na magondi gosi amamwamu, na a gyi vika mu makono ga avana veve;

³⁶ na ya gyi hila ha duka ulugendo lwa madiku gavaka hagati hehe na Yakobo: na Yakobo yaya imitugu gya Labani gya tigala.

³⁷ Na Yakobo ya vugula misala kuli mitaave, na migusa na gyemiserevenze; na a gyi kuvula ububala bale, na a kola ubulavu bwa li mumisala bu loleke.

³⁸ Na ya singeridza misala gya ya li kukuvula imbiri we vyayo mu miieregyi na ha vyayo vi nweranga; navyo vya vohola inyinga vidzanga kunwa.

³⁹ Na vyayo vya voholera imbiri wemisala, na vyayo vivula vimeme vikalanye na vibalabale, na visanzali.

⁴⁰ Na Yakobo yahula vimeme, na a henzidza vyayo vi henzi ku mikalanye na gyosi mimwamu mu kyayo kya i Labani: na a vika vyayo vivye haluvega, si a vi sanya nemitugu gya Labani mba.

⁴¹ Kunangwa, lwa gyetsingulu gyekyayo gya tumanga, Yakobo ya vika misala imbiri wetsimoni tsyevyayo muferegyi, gyi voholere hagati nemisala;

⁴² navutswa lwe kyayo kya li king'ahu, si ya ki vikira misala mba: kunangwa ving'ahu vya li vya Labani, na vikomeru vya li vya Yakobo.

⁴³ Namundu uyu ya medeka ligali, na ya li nevyayo vinene, navatugwa avakana navatugwa avayai, na tsing'amia, na tsisukiri.