Litanga 29 - KITABU KITAKATIFU

¹ Kunangwa Yakobo ya simuka, na a tsia ku lugendo, na a duka ku kivala kya avana va ivugwe.

² Kandi ya ginga tsimoni, na henza, kidaho mu mulimi, na henza vyayo vivaka vya magondi vya gona himbi ne kidaho zana; kigira va li va nwehidza vyayo ku kidaho zana: na ligina lya kunika kidaho lya li linene

³ na ha zana vyayo vyosi vya vungidzwa: na va gomagominya ligina li twule ku kidaho, na va nwehidza magondi, ni viranya ligina kandi ku kidaho mbugono bwalyo.

⁴ Na Yakobo ya va teva, Avamitu, mu twula haliha? Navo va vola, Ku veye va Harani.

⁵ Naye ya va volera, Mu manya Labani mwana wa Nahoro? Navo va vola, Ku mu manyi.

⁶ Naye ya va teva, A veye mulahi? Navo va vola, A veye mulahi: na henza, mwana wewe Raheli yadzanga na magondi gege.

⁷ Na ya vola, Henza, gu kiri mbasu, si i veye inyinga yokuvungidza vyayo: mu nwehidze magondi, ma mu ga hile kandi kwaya.

⁸ Navo va vola, si ku nyala kuduka lwevyayo vyosi vi vungidzwa, na va gomagominya ligina li twule ku kidaho, ma ku nwehidza magondi.

⁹ Lwa ya volerana navo, Raheli yadza na magondi ga dada wewe; kigira yaya magondi.

¹⁰ Kunangwa, Yakobo lwa ya lola Raheli mwana wa Labani mbotso wa mama wewe, na magondi ga Labani mbotso wa mama wewe, Yakobo yisunda himbi, na a gomagominya ligina li twule ku kidaho, na a nwehidza kyayo kya Labani mbotso wa mama wewe.

¹¹ Na Yakobo ya busa Raheli, na a ginga mwoyo gwigwe na a lira.

¹² Na Yakobo ya volera Raheli a veye amwavo wa dada wewe, na kandi a veye mwana wa Rebeka: naye ya nyagula, na a tsia kuvolera dada wewe.

¹³ Kunangwa, Labani lwa ya hulira makuva ga Yakobo mwana wa mbotso wewe, ya nyagula na a tsia kumwaganira, na a mu kumberera, na a mu busa, na a mu leta mu inyumba yeye. Naye ya volera Labani vindu yivi vyosi.

¹⁴ Na Labani ya mu volera, Ligali ive u veye kigumba halala na inze, nenyama halala na inze. Na ya menya halala naye mweli mulala.

¹⁵ Na Labani ya volera Yakobo, Kigira ive u veye amitu wange, u nyala kuntumekira vutswa kigira yiki? U mbolere madanyi gogo ga la va kindu ki?

¹⁶ Na Labani ya li na vakana vaviri: munene ya langwa Leah, na muke ya langwa Raheli.

¹⁷ Na tsimoni tsya Leah tsya li tsindedekere; navutswa Raheli ya li mulahi na ligondo lilye lilahi.

¹⁸ Na Yakobo ya yanza Raheli; na ya volera Labani, Inze nda ku tumekira mihiga gyitano na gyiviri kigira Rahelimwanamuke.

¹⁹ Na Labani ya vola, Nubulahi kumuha ive, kuvita kumuha wundi mundu: u menye halala na inze.

²⁰ Na Yakobo ya tumika mihiga gyitano na gyiviri kigira Raheli; na gya li kuye kuli madiku makekeke, kigira liyanza lya ya li nalyo kuye.

²¹ Na Yakobo ya volera Labani, Mbe mukali wange, kigira madiku gange ga fweye, nduke kuva naye.

²² Na Labani ya vungidza avasatsa vosi velidala, na a lomba lilia.

²³ Kunangwa mgolova ya vugula Leah mukana wewe, na a mu leta kuye, na a va naye.

²⁴ Na Labani ya ha Leah mutugwa wewe Zilipa, a ve mutugwa wewe.

²⁵ Kunangwa mugamba, nkani a veye Leah: naye ya volera Labani, U nkoleye ki? Si nda tumekira ive kigira Raheli? Kunangwa kigira ki u ngadi?

²⁶ Na Labani ya vola, Si gyi li miima gya hano kuserera muke imbiri womunene.

²⁷ U malilidze lisidza lilye, na ku la ku ha wundi kandi kigira ubutumiki bwa u li ntumika bwemihiga gyitano na gyiviri kandi.

²⁸ Na Yakobo ya kola ndiyo, na a malilidza lisidza lilye: naye ya mu ha Raheli mwana wewe kuva mukali wewe.

²⁹ Na Labani ya ha Raheli mwana wewe mukana mutugwa wewe ya langwa Bulha kuva mutugwa wewe.

³⁰ Na ya va halala na Raheli, naye ya yanza Raheli kuvita Leah, na a mu tumekira mihiga gyindi gyitano na gyiviri.

³¹ Na Yahova ya lola Leah ya li kudunyirwa, na a mu ha lwivulu: navutswa Raheli ya li mugumba.

³² Na Leah ya vereka, na yivula mwana muyai, na a mu gulika Rubeni: kigira ya vola, Yahova u loli ubunyankani bwange; kigira kalunu musatsa wange a la nyanza.

³³ Naye ya vereka kandi, na yivula mwana muyai, na a vola, Kigira Yahova u huliye ndunyirangwa, kigira yaga u mbeye muana uyu kandi: na a mu gulika Simeoni.

³⁴ Na ya vereka kandi, na yivula mwana muyai; na a vola, Kalunu, inyinga yiyi musatsa wange a la hambanywa na inze, kigira mmwivuliye avayai vavaka: kigira yaga lieta lilye lya langwa Levi.

³⁵ Na ya vereka kandi, na yivula mwana muyai: nave ya vola, Inyinga yiyi nda kuminya Yahova: kunangwa ya mu gulika Yuda; na ya leka kwivula.