Litanga 25 - KITABU KITAKATIFU

¹ Lwenyima Abrahamu ya leta mukali wundi, na lieta lilye lya langwa Ketura.

² Naye ya mwivulira Zimrani, na Jokshani, na Medan na Midiani, na Ishibaku, na Shua.

³ Na Jokshani yivula Sheba, na Dedan. Na avana va Dedan va li Ashurim, na Letushim, na Leumim.

⁴ Na avana va Midiani: Efa, na Eferi, na Hanoku, na Abida, na Eldaha. Yava va li avana va Ketura.

⁵ Na Abrahamu ya ha Isaka vyosi vya ya li navyo.

⁶ Navutswa avana va vasuria Abrahamu ya va ha vihaanwa; na a vavukanya ku Isaka mwana wewe, lwa a kiri mwoyo, va tsie ku luvega lwevugwe ku duka mu kivala kyevugwe.

⁷ Yaga na madiku gemihiga gyobuhindiri bwa Abrahamu ya hindira, mihiga mia na makumi gatano na gaviri na gyitano.

⁸ Na Abrahamu, mwoyo gwa twula kuye, na a kudza mu lihindira lilahi, musakulu, wizula mihiga, na a vungidzwa ku aviko veve.

⁹ Na Isaka na Ishmaeli avana veve va mu ta mu luhangaywa lwa Makipela, mu mulimi gwa Efroni, mwana wa Zoharu Muhiti, gu veye ku luvega lwa Mamre;

¹⁰ mulimi gwa Abrahamu ya gula ku avana va Hethu: Abrahamu ya tebwa yo, kandi Sara mukali wewe.

¹¹ Kunangwa inyima welikudza lya Abrahamu, Nyasaye ya gasidza Isaka mwana wewe: na Isaka ya menva ha Beerlahairoi.

¹² Yivi ni visukululwi vya Ishmaeli, mwana wa Abrabamu, wa Hagari Muegepeti, mukana mutugwa wa Sara, yivulira Abrahamu:

¹³ na yaga nameta ga vana va lshmaeli, kuli ameta gavo, kandi kuli visukululwi vyavo: munene wa Ishmaeli va Nebaiothu; na Kedari, na Adibeeli, na Mibisam,

¹⁴ na Mishima, na Duma, na Masa,

¹⁵ na Hadadi, na Tema, na Jeturu, na Nafishi, na Kedema:

¹⁶ yava na vana va Ishmaeli, na yaga nameta gavo, kuli madala gavo, na kuli mahema gavo avami likumi na vaviri kuli tsihiri tsyavo.

¹⁷ Yigyi ni mihiga gyobuhindiri bwa Ishmaeli, gya li mihiga mia namakumi gavaka na gyitano na gyiviri: na mwoyo gwa twula kuye, na a kudza, na a vungidzwa ku aviko veve.

¹⁸ Navo va menya kutwula Havila kuduka Shur, ki veye ku luvega lwa Egepeti, lwa u tsia Asuria: na ya menya imbiri wa vamwavo veve vosi.

¹⁹ Na yivi ni visukululwi vya Isaka, mwana wa Abrahamu: Abrahamu yivula Isaka:

²⁰ na Isaka ya li nemihiga makumi gane lwa ya leta Rebeka, mukana wa Bethueli Musiria wa Padan-aram, mbotso wa Labani Musiria, kuva mukali wewe.

²¹ Na Isaka ya saalira mukali wewe ku Yahova, kigira ya li mugumba: na ya mu hulira, na Rebeka mukali wewe ya vereka.

²² Na avana va kola kivihiri mmunda mwimwe; naye ya vola, Ni ga va ni ga veye ndi, mbindira kigira ki? Naye ya tsia kuteva Yahova.

²³ Na Yahova ya mu volera, Tsihiri tsiviri tsi veye mmunda mwumwo, Na avandu tsing'ano tsiviri va la vukana kutwula mmunda mwumwo: Na avandu lugano lulala va la va netsingulu kuvita lugano lundi; Na munene a la tumekiri muke.

²⁴ Kandi lwa madiku gege gokwivula ga duka, henza, malongo ga li mmunda mwimwe.

²⁵ Na wokutanga ya twula mwakanyu, kuli ingubo ya maswa; na va mu gulika lieta Esau.

²⁶ Na inyima amwavo wewe ya twula, na mukono gwigwe gwa gumira liki lya Esau; naye ya gulikwa lieta lilye Yakobo: na Isaka y a li weminiga makumi gatano na lilala lwa mukali ya vivula.

²⁷ Kandi avayai va viruka: na Esau ya li muhimi wobugeeri, mundu womigendanyama; na Yakobo ya li muhokva, wa menya mu mahema.

²⁸ Kunangwa Isaka mwene ya yanza Esau, kigira ya lia tsinyama tsitsye tsyomigendanyama: na Rebeka ya yanza Yakobo.

²⁹ Kandi Yakobo ya deka muduya: na Esau yadza kutwula migendanyama, naye ya li na a luhi ligali:

³⁰ na Esau ya volera Yakobo, Mwadza, u mbe vyokulia u mbe muduya zana mwakanyu: kigira nduhi ligali: kigira yaga lieta lilye lya langwa Edom.

³¹ Na Yakobo ya vola, Tanga lero ndi u ngulidze ubunene bubwo bwelivulwa.

³² Na Esau ya vola, Henza, nkudzanga, na ubunene bwelivulwa bwange bu la nkonya ki?

³³ Na Yakobo ya vola, U nzisuhire lero ndi; naye ya mwisuhira: naye ya gulidza Yakobo ubunenebwibwebwelivulwa.

³⁴ Kunangwa Yakobo ya ha Esau ubukima na muduya gwetsimpindi; naye ya lagira na a nwa, na a vuka, na a tsia: na ndiyo Esau ya lega ubunene bwibwe bwelivulwa.