Litanga 23 - KITABU KITAKATIFU

¹ Na lihindira lya Sara lya duka mihiga mia na makumi gaviri na gyitano na gyiviri: yigyi ni mihiga gyelihindira lya Sara.

² Na Sara ya kudzira mu Kiriathu-arba (livola li veye Hebironi), mu kivala kya Kanani: na Abrahamu yadza kusyomera Sara, nokumulira.

³ Na Abrahamu ya singira na a twula imbiri womukudzu wewe, na a volera avana va Hethu, na a vola,

⁴ Inze mbeye mugeni nommenya halala na mwinye: mu mbe hokuta ha ve kilindwa, nduke kuta ho mukudzu wange a twule imbiri wange.

⁵ Na avana va Hethu va tivulira Abrahamu, na va vola,

⁶ U ku hulire, mwami wange; ive u veye munene wa Nyasaye hagati hetu: mu vilindwa vyetu ki veye kitovole u te mu mukudzu wowo; si ha veye nomundu ku kwinye u nyala kukugaya ku kilindwa kikye, u duke kuta mu mukudzu wowo.

⁷ Na Abrahamu ya singira, nokwinamira avandu vekivala, avana va Hethu.

⁸ Kandi ya volerana navo, na a vola, Ni bu va ni bu veye ubulaliri bwenyu inze nte mukudzu wange, a twule imbiri wange, mu mbulire, na mwinye mu ng'oonyere Efroni mwana wa Zoharu,

⁹ ya mbe luhangaywa lwa Makipela, lwa a veye nalwo, lu veye himbi ku lwako lwomulimi gwigwe; ya mbe nobuguli bwalwo bwosi ha ve hange, ha ve hokuta vakudzu.

¹⁰ Na Efroni ya li ni yikaye hagati ha vana va Hethu: na Efroni Muhiti ya tivulira Abrahamu imbiri welivugana lya avana va Hethu, kali lya vosi avingira mu kiribwa kyelidala lilye, na a vola,

¹¹ Auwa, mwami wange, u mbulire: mulimi yigwo nku ha, kandi luhangaywa lu veye mu nku ha; imbiri wa avana va vandu vange nku ha: u te mukudzu wowo.

¹² Na Abrahamu yinama hasi imbiri wa vandu vekivala.

¹³ Na ya volera Efroni imbiri wa vandu vekivala, na a vola, Navutswa nu u lalira, nku goonya, u mbulire: nda ku ha ubuguli bwomulimi zana; u bu vugule ku inze, na inze nda ta ho mukudzu wange.

¹⁴ Na Efroni ya tivulira Abrahamu, na a mbolera,

¹⁵ Mwami wange, u mbulire, mulimi gu duka ubuguli bwetsishekeli tsimia tsine tsyefetha, yibu bu veye ikindu ki hagati hange na ive? Kunangwa u te mukudzu wowo.

¹⁶ Na Abrahamu ya hulira Efroni; na Abrahamu ya gerera Efroni ifetha ya ya tala imbiri wa vana va Hethu, tsishekeli tsimia tsine tsyefetha, ifetha i tumekirangwa navakiranyi.

¹⁷ Kunangwa mulimi gwa Efroni, gwa li mu Makipela, gwa li ku luvega lwa Mamre, mulimi, na luhangaywa lwa li mugwo, na misala gyosi gya li mu mulimi, na gya li mu tsinzako tsyagwo tsimbega tsyosi, gwa dinyeridzwa kuva gwa Abrahamu

¹⁸ kuva ahehe imbiri wa vana va Hethu, imbiri wa vosi avingira kiribwa kye lidala lilye.

¹⁹ Na inyima wa yaga, Abrahamu ya ta Sara mukali wewe mu luhangaywa lwomulimi gwa Makipela ku luvega lwa Mamre (ha zana ha veye Hebironi), mu kivala kya Kanani.

²⁰ Na mulim, na luhangaywa lu veye mugwo, gwa dinyiridzwa na vana va Hethu kuva gwa Abrahamu mwene hokuta vakudzu.