Litanga 22 - KITABU KITAKATIFU

¹ Inyima wevindu yivi, Nyasaye ya geridza Abrahamu, na a mu voiera, Abrahamu; naye ya bugira yo Mbeye hano.

² Na ya mu volera U vugule mwana wowo, mwana wowo muderwa, wa u yanza, Isaka, u tsie mu kivala kya Moria; u mu haane yaho a ve kihaanwa kyokusambwa ku kigulu kya nkumannya.

³ Na Abrahamu ya vuka mabwebwe, na yaala ku isukiri vyokwikala ku, na a hila avasoleli veve vaviri, na Isaka mwana wewe; kandi ya syaga tsinku tsyekihaanwa kyokusambwa na a twula na a tsia ha Nyasaye ya li kumuvolera.

⁴ Ku lidiku lya kavaka Abrahamu ya ginga tsimoni tsitsye, na a lola ha zana ha veye ihale.

⁵ Na Abrahamu ya volera avasoleli veve, Mu linde hano na isukiri, na inze na mwana ku la tsia yira; na ku la kola miluka nokwirana kandi ku mwinye.

⁶ Na Abrahamu ya vugula tsinku tsyekihaanwa kyokusambwa, na a dwika Isaka mwana wewe; naye ya ginga mmukono gwigwe muliru nombano; navo vombi va tsia halala.

⁷ Na Isaka ya volera Abrahamu dada wewe, na a vola, Dada wange: naye ya bugira, Mbeye hano, mwana wange. Na a vola, Henza, muliru netsinku: navutswa mwana weligondi lyekihaanwa kyokusambwa li veye haliha?

⁸ Na Abrahamu ya vola, Mwana wange, Nyasaye mwene a lenyolera mwana weligondi lyekihaanwa kyokusambwa: kunangwa va tsia vombi halala.

⁹ Na va duka ha zana ha Nyasaye ya li kumuvolera; na Abrahamu yombaka ho ubwali, na a lohidza ku tsinku, kandi ya boha Isaka mwana wewe, nokumuvika ku bwali, ku tsinku.

¹⁰ Na Abrahamu ya nyira mukono gwigwe kuvugula mbano kwiita mwana wewe.

¹¹ Na ingelosi wa Yahova ya mu langa kutwula migulu na a vola, Abrahamu, Abrahamu: naye ya bugira yo, Mbeye hano.

¹² Naye ya vola, U ta hila mukono gugwo ku mwana, kandi u ta kola kindu kuye; kigira kalunu mmanya ive u tidzanga Nyasaye, kigira si u nyimi mwana wowo, mwana muderwa wowo.

¹³ Kunangwa Abrahamu ya ginga tsimoni tsitsye, na a lola, na henza, inyima wewe ha veye neligondi likole li gimeywi tsinziga tsyalyo mbulimu: na Abrahamu ya tsia na a vugula ligondi likole, na a li haana kihaanwa kyokusambwa mbugono bwomwana wewe.

¹⁴ Na Abrahamu ya gulika ha zana Yahova jireh: kuli ha volangwa kuduka lero, Mu kigulu kya Yahova ki la loleka.

¹⁵ Kandi ingelosi wa Yahova ya langa Abrahamu hali kaviri kutwula migulu,

¹⁶ na a vola, Ndisuha ku inze mwene, Yahova a vola, kigira u koli inkuva yiyi, kandi si u nyimi mwana wowo, mwana muderwa wowo,

¹⁷ mu ligasidza nda ku gasidza, nomu limeda nda meda kisukululwi kikyo vi ve kuli tsing'ereng'ani tsyomigulu, kandi kuli umuyeke gwoluginga lwenyanza; kandi kisukululwi ki lameha ku kiribwa kyavasigu vakyo;

¹⁸ na tsihiri tsyosi tsi la gasidzirwa ku kisukululwi kikyo, kigira ive u huliye mwoyo gwange.

¹⁹ Kunangwa Abrahamu yirana ku vasoleli veve, na va twula ni va tsia halala kuduka Beer-sheba; na Abrahamu ya menya Beersheba.

²⁰ Kunangwa inyima wevindu yivi, Abrahamu ya volerwa, kuvola, Henza, Milika kandi wivuliye amwavo wowo Nahoro avana:

²¹ Navo va veye Uzu munene, na Buzu amwavo wewe, na Kemueli dada wa Aram,

²² na Kesedu na Hazo, na Pilidashu, na Jidilaiu na Bethueli.

²³ Na Bethueli yivula Rebeka: yava vatano na vavaka Milika yivulira Nahoro, amwavo wa Abrahamu.

²⁴ Na suria wewe welieta lilye lya li Reuma naye kandi yivula Teba, na Gaham na Tahash, na Maaka.