Litanga 2 - KITABU KITAKATIFU

¹ Na ligulu nelirova vya mala kulombwa, nelihe lyavyo lyosi.

² Kandi ku lidiku lya gatano na gaviri Nyasaye ya mala miyinzi gya ya li kulomba; na ya sosa ku lidiku lya gatano na gaviri ku miyinzi gyosi gya ya lomba.

³ Kandi Nyasaye ya gasidza lidiku lya gatano na gaviri, na a li kola litakatifu; kigira ku lidiku yili ya sosa ku miyinzi gyigye gyosi gya Nyasaye ya lomba nokukola.

⁴ Yivi ni visukululwi vyeligulu na vyelirova ku lidiku lya Yahova Nyasaye ya lomba lirova ne ligulu.

⁵ Na misala gyomulimi si gya li mu lirova kali mulala, na tsingutsa tyomulimi si tsya mera; kigira Yahova Nyasaye ya li na a kikiri kukupidza imbula ku lirova kandi si ha li nomundu kulima lirova;

⁶ navutswa lirova lya vuyidza lilumbe, na lya kindidza marova gosi.

⁷ Na Yahova Nyasaye ya lomba mundu nolugukyi lwamarova, na a huudza mmolu gege mwika gwelivamwoyo: na mundu ya gwa mwoyo gwelivamwoyo.

⁸ Kandi Yahova Nyasaye ya simika mulimi ku luvega lwevugwe mu Edenina a vika ho mundu wa ya lomba.

⁹ Na Yahova Nyasaye ya meridza misala gyosi gyi yanzidzanga ku liloleka lyagyo, na gyi veye milahi ku vyokulia, kandi musala gwelivamu oyo hagati homulimi, na musala gwelimanya ubulahi nobudamano.

¹⁰ Kandi ha li nomugera gwa twula mu Edeni kukindidza mulimi; na kutwula yaho gwa vukana kugwa tsinzira tsine.

¹¹ Lieta lya gwokutanga li langwa Pishon: nigwo gu kumbiridza kivala kya Havila, hethahabu i nyoleka;

¹² na ithahabu yekivala yikyo i veye indahi: kandi ha veye na ibedola i veye mu kivala yiki na magina gobuguli budinyu.

¹³ Lieta lyomugera gwegyiviri li veye Gihon: yigwo nigwo gu kumbiridza kivala kyosi kya Ethiopia.

¹⁴ Na lieta lyomugera gwegyivaka li veye Hidekeli: nagwo gu vitanga ku luvega lwa Asuria. Kandi ugu kola gyine gu veye Farati.

¹⁵ Na Yahova Nyasaye ya vugula mundu, na a mbika mmulimi gwa Edeni a yinzire nokugulinda.

¹⁶ Yahova Nyasaye ya laga mundu, na a mbolera, Ku misala gyosi gyomulimi u nyala kulia kuli yanza:

¹⁷ navutswa ku musala gwelimanya ubulahi nobudamano, u ta lia kugwo: kigira ku lidiku lya u lia kugwo ligali u la kudza.

¹⁸ Kandi Yahova Nyasaye ya vola Si bu li bulahi mundu a ve yeng'ine, nda mu lombera mukonyi u dukana naye.

¹⁹ Yahova Nyasaye ya lomba tsyinyama tsyosi kutwula mmarova, na manyonyi gosi gombwerefu; na a vi leta ku mundu kumanya a la vi gulika ki: na ku lieta lyomundu ya gulika kilombe ku vyosi, yili lya li lieta lyakyo.

²⁰ Na mundu ya gulika mitugu gyosi ameta, namanyonyi gombwerefu, netsinyama tsyosi tsyombulimu; navutswa si kya loleka kilala ki dukana kuva mukonyi kuye.

²¹ Kunangwa Yahova Nyasaye ya hila Adamu mu tsindolo tsinene, naye ya gona; na a vugula luvalu lwilwe lulala, na yizulitsa ha zana inyama:

²² Noluvalu lwa Yahova Nyasaye ya vugula ku Adamu, ya lomba mukali, na a mu leta ku Adamu.

²³ Na Adamu ya vola, Uyu a veye kigumba kyevigumba vyange, nenyama yenyama yombiri gwange: a la gulikwa mukali, kigira ya twulidzwa ku musatsa.

²⁴ Kigira yaga musatsa a la leka dada wewe na mama wewe, na a hambane nomukali wewe: na vombi va la gwa inyama indala.

²⁵ Navo vombi va li kyahonyo, musatsa nomukali wewe, na si va li netsisoni.