Litanga 17 - KITABU KITAKATIFU

¹ Na lwa Abram ya duka mihiga makumi gatano na gane, na gyitano na gyine, Yahova ya loleka ku Abram, na a mu volera, Mbeye Nyasaye Wanyala Vyosi; Genda imbiri wange, na u ve mudukiru.

² Na nda lomba lilagana lyange hagati hange na ive, kandi nda ku meda ligali.

³ Abram ya gwa mammama: na Nyasaye ya volerana naye, na a vola,

⁴ Ku inze, ligali henza, lilagana lyange li veye na ive, na ive u la va dada wa tsihiri tsinyingi ligali.

⁵ Kandi lieta lilyo si li la langwa kandi Abram, navutswa lieta lilyo li la va Abrahamu; kigira nkoli ive dada wetsihiri tsinyingi.

⁶ Kandi nda kola ive kwaala ligali, kandi nda ku kola kuva tsihiri, na avami va la twula ku ive.

⁷ Kandi nda singeridza lilagana lyange hagati hange na ive na visukululwi vivyo inyima wowo, mu visukululwi vyavo li ve lilagana lyemihiga nemihiga, nduke kuva Nyasaye ku ive noku visukululwi vivyo inyima wowo.

⁸ Kandi nda ha ive na visukululwi vivyo inyima wowo, kivala kya limenya lilyo, kivala kyosi kya Kanani, ki ve miyandu gyemihiga nemihiga; na nda va Nyasaye wavo.

⁹ Kandi Nyasaye ya volera Abrahamu, Ku ive, u la gumira lilagana lyange, ive, na visukululwi vivyo inyima wowo kuduka ku visukululwi vyavo vyosi.

¹⁰ Yili ni lilagana lyange, lya mu la gumira, hagati hange na mwinye na visukululwi vivyo inyima wowo: avasatsa vosi va veye ku mwinye sa mulala va la kevwa.

¹¹ Na mwinye mu la kevwa ku magodo gemibiri gyenyu; na yaga ga la va lilolekidza lyelilagana hagati hange na mwinye.

¹² Uyu u duka madiku gatano na gavaka hagati henyu a la kevwa, ku avana vosi avayai mu visukululwi vyenyu, wivulwa mu inyumba, kandi uyu wa gulwa nefetha ku vamenya vosi ava ta li ku visukululwi vivyo.

¹³ Uyu wivulwa mu inyumba yoyo, kandi uyu u gulangwa nefetha yoyo, ga mu dukira ku kevwa: na lilagana lyange li la va ku tsinyama tsyemibiri kuva lilaganalyemihiganemihiga.

¹⁴ Na musatsa mugasa u vula kukevwa ku ligodo lyombiri gwigwe, a la twulidzwa ku avandu veve; wononyi lilagana lyange.

¹⁵ Kandi Nyasaye ya volera Abrahamu, Ku Sarai mukali wowo, si u la mu langa lieta lilye Sarai, navutswa lieta lilye li la va Sara.

¹⁶ Na nda mu gasidza, kandi nda ku ha mwana kuye; yee, nda mu gasidza, na a la va mama wa tsihiri tsinyingi; avami vavandu va la twula kuye.

¹⁷ Hene yaho Abrahamu ya gwa mammama, na a seka, na a vola mmwoyo gwigwe, mwana a nyala kwivulirwa uyu wemihiga mia? Ka kandi Sara a veye wemihiga makumi gatano na gane a nyala kwivula?

¹⁸ Na Abrahamu ya volera Nyasaye, Nkano Ishmaeli a nyala kuhindira imbiri wowo

¹⁹ Nyasaye ya vola, Auwa, navutswa Sara mukali wowo a la kwivulira mwana; na u la mu gulika lieta lilye Isaka, na nda singeridza lilagana lyange naye kuva lilagana lyemihiga nemihiga noku visukululwi vivye inyima wewe.

²⁰ Na ku Ishmaeli nku huliye: henza, mmu gasidzi, na nda mu kola kuva nolwaalo lunyingi, kandi nda mu meda ligali; a livula avami likumi na vaviri, na nda mu kola kuva ihiri inene.

²¹ Navutswa nda singeridza lilagana lyange na Isaka, wa Sara a li kwivulira ku inyinga i lageywi ku muhiga gudzanga.

²² Na ya leka kuvolerana naye, na Nyasaye yanegira igulu kutwula ku Abrahamu.

²³ Na Abrahamu ya vugula Ishmaeli mwana wewe, na vosi avivulwa mu inyumba yeye, na vosi ava gulwa na ifetha yeye, avasatsa avombandu va inyumba ya Abrahamu, na a va keva magodo gemibiri gyavo ku lidiku zana, kuli Nyasaye ya mu volera.

²⁴ Na Abrahamu ya li wemihiga makumi gatano na gane na gyitano na gyine, lwa ya kevwa ligodo lyombiri gwigwe.

²⁵ Na Ishmaeli mwana wewe ya li wemihiga likumi na gyivaka, lwa ya kevwa ligodo lyombiri gwigwe.

²⁶ Mu lidiku zana lilala, Abrahamu ya kevwa, na Ishmaeli mwana wewe.

²⁷ Kandi avasatsa vosi venyumba yeye, avivulwa mu inyumba yeye, na vagulwa nefetha ku mmenya, va kevwa halala naye.