Litanga 11 - KITABU KITAKATIFU

¹ Na lirova lyosi lya li nolulimi lulala, na livola lilala.

² Kunangwa lwa va samula kutsia ivugwe va nyola kivala kereremu mu kivala kya Shinaru; na va menya ho.

³ Ma va volerana avene na avene, Gendi, ku lombe matafali, nokugasamba ligali. Navo va li na matafali ga li mbugono bwamagina, na va li nobudohi bwekivala bwa li choka yavo.

⁴ Kandi va volerana avene na avene, Gendi, kweyombakire avene lidala, na munara, gwobutambi bwagwo bu duka ku ligulu, nokwelombera lieta; gase ku la salanywa ku lirova lyosi.

⁵ Na Yahova yika a duke kulola lidala na munara, gwa avana va vandu vombaka.

⁶ Na Yahova ya vola, Henza, va veye avandu valala, navo vosi va veye nolulimi lulala; navo va tangi kulomba inkuva yiyi: na kalunu si va la gaywa ku likola kindu ku vyosi vya va ganagana kukola.

⁷ Gendi, kwike, ku vike ligoyana mu lulimi lwavo, va vule kuhuliridzana avene na avene.

⁸ Kunangwa Yahova ya va salanya kutwula yaho va tsie ku lirova lyosi: na va leka kwombaka lidala.

⁹ Kigira yaga lieta lyalyo lya langwa Babeli; kigira Yahova ya vika ligoyana mu lulimi lwelirova lyosi: kandi Yahova ya va salanya ku lirova lyosi.

¹⁰ Yivi ni visukululwi vya Shem, Shem ya li nemihiga mia, na yivula Aripakishadi mihiga gyiviri inyima wa madzi manene:

¹¹ na Shem ya hindira inyima wokwivula Aripakishadi mihiga tsimia tsitano, na yivula avayai navakana.

¹² Na Aripakishadi ya hindira mihiga makumi gavaka na mihiga gyitano, na yivula Shela:

¹³ na Aripakishadi ya hindira inyima wokwivula Shela tsimia tsine na mihiga gyivaka, na yivula avayai na vakana.

¹⁴ Na Shela ya hindira mihiga makumi gavaka, na yivula Eberi:

¹⁵ na Shela ya hindira inyima wokwivula Eberi mihiga tsimia tsine na mihiga gyivaka, na yivula avayai na vakana.

¹⁶ Na Eberi ya hindira mihiga makumi gavaka na mihiga gyine, na yivula Pelegu:

¹⁷ na Eberi ya hindira inyima wokwivula Pelega mihiga tsimia tsine na makumi gavaka, na yivula avayai na vakana.

¹⁸ Na Pelegu ya hindira mihiga makumi gavaka, na yivula Reu:

¹⁹ na Pelegu ya hindira inyima wokwivula Reu mihiga tsimia tsiviri na gyitano na gyine, na yivula avayai na vakana.

²⁰ Na Reu ya hindira mihiga makumi gavaka na gyiviri, na yivula Serugu:

²¹ na Reu ya hindira inyima wokwivula Serugu mihiga tsimia tsiviri na gyitano na gyiviri, na yivula avayai na vakana.

²² Na Serugu ya hindira mihiga makumi gavaka, na yivula Nahoro:

²³ na Serugu ya hindira inyima wokwivula Nahoro mihiga tsimia tsiviri, na yivula avayai na vakana.

²⁴ Na Nahoro ya hindira mihiga amakumi gaviri na gyitano na gyine, na yivula Tera:

²⁵ na Nahoro ya hindira mihiga mia ne likumi na gyitano na gyine, na yivula avayai na vakana.

²⁶ Na Tera ya hindira mihiga makumi gatano na gaviri, na yivula Abram, Nahoro, na Harani.

²⁷ Yivi ni visukululwi vya Tera. Tera yivula Abram, Nahoro, na Harani; na Harani yivula Loti.

²⁸ Na Harani ya kudza imbiri wa dada wewe Tera mu kivala kya yivulwa mu, mu Uru kya Vakalidei.

²⁹ Kunangwa Abram na Nahoro va vugula avakali vavo: lieta lya mukali wa Abram lya li Sarai; na lieta lya mukali wa Nahoro lya li Milika, mkana wa Harani, wa li dada wa Milika na wa Isika.

³⁰ Na Sarai ya li mugumba; si ya li nomwana.

³¹ Na Tera ya vugula Abram mwana wewe, na Loti mwana wa Harani, mwana wa mwana wewe, na Sarai navizala wewe, mukali wa Abram mwana wewe; na va tsia vosi halala kutwula mu kivala kya Uru kya Vakalidei, kutsia mu kivala kya Kanani; na va duka Harani, ni va menya yo.

³² Na madiku ga Tera ga li mihiga tsimia tsiviri na gyitano: na Tera ya kudzera mu Harani.